Ñwed Mbon Rom 11
11
Ñyọhọnsʌhọ Ufọk Isrel
1Ami mbịp ndin mbo: Ado nte Abasi amaasịn ikọd amọ? Nwaaña nsa-o! Ami ndo awo Isrel ke idem mmi, nto ubon Ebraham, a-atooho ekpək Benyamin. 2Abasi ikisịnne ikọd amọ a-anye amaaketo adiọọñọ. Ado nte ndufo idiọọñọke se ikọ Abasi abo ke itie ñwed keed abaña Elaiya, naña anye aketọt Abasi abaña ndiọiñkpọ Isrel ate: 3“Abọọñ, ammọ e-ewoot mme prọfed mfo enyʌñ ewuut mme itie uwa mfo. Ami ikpọọñ ndisʌhọ, ndin ammọ esʌk eyem usʌñ adiñwot miin”? 4Ndin nsoo ikido ibọọrọ a-Abasi akenọọhọ anye? “Ami mmenịm nnọ idem mmi awo tọsịn itiaba (7,000) i-imiitọọñọke edọñ inọ Baal.” 5Kpa ntoro, ke ini ami, aba usadusʌhọ e-emekke eto mfọn. 6Ndin adieke atooho ke mfọn, itooho aba ke utom; akpedo ntoro mfọn ikpidooho aba mfọn.
7Nsoo ndin? Se nditọ Isrel ekenekke eyem, ammọ ikinieghe. Mme andimek ke atu ammọ ekenie, ado mbon ako emaesọñ esịd, 8kpa naña ewet:
“Abasi amaanọ Sịbidịd ñkpeñenye,
anyen i-imiikikanna ikịt ñkpọ,
ye utọñ i-imiikikanna ikop ikọ,
tutu asịm usen mfịn.”
9Ndin Defid abo:
“Yak usọrọ ndia ammọ akappa afia ye mfịne,
ado ñkpọiduọ ye ufen anọ ammọ.
10Yak anyen akịm ammọ mbaak ammọ edikịt ñkpọ,
ñko yak edem ammọ anʌhọ ke nsi-nsi.”
Mme Ñkọk e-Efaahafaak
11Yak mmaana mbịp: Nte ammọ eketuak ukod nọ eduọññọ ndin ikanna idakka ida aba? Nwaaña nsa-o! Ato ke ndudue ammọ ke adinyaaña akedisịm mme Gentile nọ Isrel enie ufịb ebaña ammọ. 12Ado adieke nnamndue ammọ akappake ado uwak inie anọ ederimbod, ndin ntakudua ammọ akappa ado uwak inie anọ mme Gentile, die ke mme edidiọñ ammọ adiikpon ke ini emaeben mme Yuu afịd esịn ke atu!
13Ami ntañ ikọ ami inọ ndufo mme Gentile. Akpesʌkado a-ami ndooho isʌñutom nnọ mme Gentile, ami mmewọk inua ke ubiọñutom mmi 14nọ ato do ami nnam kpa mme Yuu ñnyịn efịbe mme Gentile, nọ ñkan ñnyaaña usʌk mme Yuu. 15Sia adieke adisịn ammọ akedatta adidiana keed asịn ke ederimbod, nsoo ndin ke adinyịmme ammọ adiido ikan uwem a-awuọhọ ato ñkpa? 16Adieke ubaak usʌñuyo e-enọọhọ nte mme akpa mfịd asanake, ndin afịd itu amọ ado adisana; adieke adʌñ adooho adisana, mme ñkọk ñko enyʌñ edo ndisana.
17Adieke usʌk mme ñkọk e-emaekebʌññọ ewuọ, ndin afo, ñkọm afo ado ọlif a-akọttọ ke akai ikọd, ekpukpịkke eben edian ke atu mme ñkọk mbon ñko, ndin afo a-akeene awuana idahami ke udeeme nduañ uwem a-atooho eti adʌñ ọlif, 18ikiinam nte ndufo emefọn ekan mme ñkọk mbon ñko. Adieke enamma ntoro, ikere ntom ise: Ndufo inwamma adʌñ ado, ado adʌñ akappa inwam ndufo. 19Ndin afo ayaabo, “Ekekpooño ñkọk esioño nọ emben miin edian.” 20Yak ibo ke ado ntoro. Ado ekekpịkke ammọ esio ke ntak unana mbuọdidem, ndin afo ada ke mbuọdidem. Ke ntoro kuukokko idem, ado nie uteñe. 21Sia adieke Abasi imiikifeene inọ mme ñkọk eto, anye iduufeene fiin ñko.
22Kere ndin baña mfọn ye nsọñido Abasi: Nsọñido anọ mbon e-emaekeduọññọ, ado mfọnido unọ fiin, afo ukpukap ukaiso umʌm mfọnido amọ ukama. Mmiidooho ntoro eyaukpịkke fiin ñko esio. 23Ndin adieke ammọ imiikaaha iso ke unana adinịm ke akpanikọ, eyaeben ammọ edian, sia Abasi akeme adiben ammọ mmaana ndian. 24Ndin adieke ekukpịkkeke fiin esio ke uduud afai eto ọlif, ndin uben fiin edian ke eti uduud eto ọlif, die ndin ke mbon ami, mme ataa ñkọk ami, ke emaetịmme edidian ammọ ke eto ọlif, imiididianake mfọn-mfọn!
Eyaenyaaña Afịd Isrel
25Ami ñyemme ndufo enana ifiọk ebaña ndedịbe ñkpọ ami, nditọeka mmi ke Krais, mbaak ndufo idikokko idem: Nsọñiwuod nditọ Isrel adikpeene tutu afịd ibad mbon mme Gentile edʌk edi. 26Ndin ke utọ usʌñ ami eyaenyaaña afịd Isrel. Kpa naña ewet:
“Andinyaaña adiito ke Saiyọn idi;
anye ayaawọññọ unana adidiọọñọ Abasi akpọñ Yekọb.
27Ndin ami ado edioomo mmi ye ammọ,
ke mmaaben idiọọkñkpọ ammọ mfep.”
28Ke ntak eti etob, mme Yuu edoñño mme asua ke ntak mfo, ado ke ntak a-Abasi akemekke ammọ, ema ammọ ke ntak mme nsọbom ammọ, 29sia awo ikemeke adisọọk mme enọ Abasi ye ikood amọ mfep. 30Kpa naña ndufo e-ekesọññọ iwuod ke ini ako ye Abasi ado idahami e-ebọ mbọm ke ntak ntịdutọñ ammọ, 31kpasʌk ntoro ammọ, ke ntak mbọm a-Abasi inọọhọ ndufo, etịt utọñ idahami#11:31 Usʌk mme ikpañwed inieghe idahami nọ ammọ ebọ mbọm Abasi. 32Sia Abasi ayaak afịd awo asịn ke ntịdutọñ nọ ato do anye anie mbọm anọ afịd ammọ.
Itooro Abasi
33O, ntotəño inie, aniọñ ye ifiọk Abasi!
Die ke awo imiikanna iduuñọ mme ubiideikpe amọ,
mme usʌñ amọ a-akan se ekeme idiọọñọ.
34“Anie awo adiọọñọ akikere Abọọñ?
Anie ado andinọ anye item?
35Akenaanam anie anọ Abasi ñkpọ,
nọ Abasi adiinọ ammọ usiene?”
36Sia ato ke anye, aboiyo ke anye, afịd ñkpọ ebañña, ndin afịd ñkpọ enie anye.
Yak ubọọñ anie anye ke nsi-nsi! Amen.
Chwazi Kounye ya:
Ñwed Mbon Rom 11: ICB
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.