MOSIS KƐŊ IZIRAL TƖŊŊAA LƖƖ 17
17
Lɩɩŋ lɩɩ bʋŋ lɛ
1Ŋɩɩ nɛ Iziral tɩŋŋaa kala lɩɩ tintee-hɩlɩɩ-la ba sɩɩ yɩrɛ Sɩŋ a vɛŋ aŋ pɛ hɔnɔ wiesi ŋɩɩ halɩɩ arɩ La TƖƖNA sɩ dagɛba ŋɩɩ. Ba mʋ hɔŋ lee-la ba sɩɩ yɩrɛ Refidim lɛ, ama lɩɩŋ fa tuo lee-la dɩ nɩalɩŋ nyʋa. 2Ŋɩɩ nɛ ba ŋaa goŋ Mosis teeŋ a bʋl, “Pɩla lɩɩŋ dɩ la nyʋa.”
Ŋɩɩ nɛ Mosis bʋl, “Bɛɛ nɛ tɩɩ ma ŋɩŋaa goŋ mɩ nyuŋ? Bɛɛ nɛ tɩɩ maa magɩsɛ La TƖƖNA?”
3Lɩɩ-nyʋasʋŋ sɩ faasa kɛŋ nɩalɩŋ ŋɩɩ, ba ha gʋgʋrɩmɛ wɩaa Mosis teeŋ. Ba sɩ, “Bɛɛ nɛ tɩɩ ŋ kɛnla kaa kʋ lɩɩ Ijipiti tinteeŋ lɛ, dɩ ŋ leŋ lɩɩnyʋasʋŋ kpʋ la dɩ la biiriŋ arɩ la pʋsʋŋ kala dɩ la sʋʋ?”
4Ŋɩɩ nɛ Mosis bunso pɩ La TƖƖNA a bʋl, “Bɛɛ nɛ mɩ jaŋ ŋaa pɩ nɩaa deemba? Ba paala ŋaa siri nɛ dɩ ba yagɛmɛ kpʋ arɩ tabɩaa.”
5Ŋɩɩ nɛ La TƖƖNA bʋla pɩ Mosis, “Sii laa nɩalɩŋ sɩpaaŋ mʋ a pɛ kɛŋ Iziral tɩŋŋaa kʋhɩasɩŋ a joŋ ŋ dantɩga-la ŋ sɩ kaa ŋmoo Naayɩl fuo-la a kori. 6Mɩ jaŋ gbɛrɩŋ peel-la ba sɩɩ yɩrɛ Sɩnaɩ bʋŋ-la bʋbʋɔŋ. Dɩ ŋ nɛ ŋmoo bʋŋ-la arɩ ŋ dantɩga-la, lɩɩŋ jaŋ kʋ lɩɩ dɩ nɩalɩŋ nyʋa.” Ŋɩɩ nɛ Mosis ŋaa ŋɩɩ Iziral tɩŋŋaa kʋhɩasɩŋ sɩpaaŋ. 7Ʋ hɛ lee-la yɩrɩŋ Masa arɩ Mɛrɩba a tɩŋ Iziral tɩŋŋaa sɩ ŋaa goŋ-la a magɩsɛ La TƖƖNA a bʋl, “La TƖƖNA hɛ la teeŋ nɛ koo ʋ tuo nɛ?”
Ba yuo dii Amalɛk tɩŋŋaa
8Ŋɩɩ nɛ Amalɛk tɩŋŋaa sii kɔ dɩ ba yuo Iziral tɩŋŋaa Refidim lɛ. 9Ŋɩɩ nɛ Mosis bʋla pɩ Josua, “Tʋɔsɛ baala-la dɔnsʋŋ dɩ ma mʋ yuo Amalɛk tɩmma-la. Mɩ chie jaŋ chɩŋ peeliŋ nyuŋ a kori Wɩa dantɩga-la.”
10Ŋɩɩ nɛ Josua ŋaa ŋɩɩ Mosis sɩ dagʋ ba yuo Amalɛk tɩmma-la, ka Mosis arɩ Arɔŋ arɩ Huu jɩl peel-la nyuŋ. 11Mosis kɛŋ ʋ nɩsaa je. Ʋ sɩ ŋaa ŋɩɩ, Iziral tɩŋŋaa yuo didii Amalɛk tɩŋŋaa, ama dɩ Mosis nɩsaa nɛ kʋ tuu, Amalɛk tɩŋŋaa ma yie yuo didiiba nɛ. 12Mosis nɩsaa sɩ kʋ yʋɔrɛ, ba joŋ tabɩɩŋ bil, ʋ hɔŋ ʋ nyuŋ. Ka Arɔŋ arɩ Huu kɛŋ Mosis nɩsaa je, Arɔŋ chɩŋ sɛmɛ dɔŋɔ, Huu ma chɩŋ sɛmɛ dɔŋɔ. Ba kɛŋ Mosis nɩsaa je a chɩŋ ŋɩɩ halɩɩ wɩa tuu jʋʋ. 13Ŋɩɩ nɛ Josua arɩ ʋ nɩaa yuo dii Amalɛk tɩmma-la.
14Ŋɩɩ nɛ La TƖƖNA bʋla pɩ Mosis, “Ŋmʋnsɛ wɩɩŋ deeŋ hɛ teniŋ tʋɔŋ dɩ ʋ ŋaa wɩɩ ma sɩ jaŋ vɛnɛɛ liisi a leŋ dɩ Josua nɩɩʋ, arɩ mɩ jaŋ chei Amalɛk dɩ ʋ yɩrɩŋ lɛl dʋnɩa kala lɛ.”
15Ŋɩɩ nɛ Mosis saa Wɩɩsʋllɩ koruŋ a hɛ ʋ yɩrɩŋ, ‘La TƖƖNA nɛ ŋaa mɩ jɔnjɔŋ (Jehova nissi)’. 16Ʋ sɩ, “Mɩ joŋ mɩ yɩɛlaa hɛ La TƖƖNA lɛ nɛ. Ʋ jaŋ yuyuo Amalɛk tɩŋŋaa doho na-kala a kaa mʋ wuu.”
Chwazi Kounye ya:
MOSIS KƐŊ IZIRAL TƖŊŊAA LƖƖ 17: SIS
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
©Ghana Institute of Linguistics Literacy and Bible Translation 1984, 2014