Baɗitari 28
28
1Antə Ishaku kəga Yakub, ka vədzə alari barka, ka tsaktə ni abbər, “Ga aɗiya kəl mwala akwa nca maɗankwi ar mjir Kanana ni wa. 2Thlatə taktar, kara təra mwari ahar Paddan Aram, akwa kəi Bethluwel na baba' mama' nga, ka gə kətə pal akwa nca maɗankwiyir ɓzərma' mama' ngə ni ka tsa ndzi mwalankiri. 3Ka Hyel na ka Duna ta Shang vədza ala gə barka, ka tsa hara ka giri ya ka yatədzi hang, har ka giri ndzi tsəɗi na ola ar mji. 4Ka tsa na ala ga, ka shanga kəkayeri ar nga, jili barka tə tsa na aka Ibrahim, kamnyar ka gə dlu tsəɗi ngəni tə ga akwa apa mətəpi ni, ka gə ndzi mthlakari. Tsa an tsəɗi natə Hyel hamta aka Ibrahim.” 5Apani antə Ishaku ku salamtə Yakub. Antə Yakub ku təra ka mwari ahar Paddan Aram, adzə Laban na ɓzər Bethluwel na mdər Aram, na ɓzərma' Rubeka na mama' Yakub ka Isuwa.
Isuwa Ku Kəl Mwala Na Ngkwar Ishmayel
6Isuwa ku nggata abbər Ishaku ku vədzə barka aka Yakub, ka thlentə ni ahar Paddan Aram ka tsa ra kəl mwala anda, har ka tsaktə ni abbər tsa aɗiya kəl ngkwar mjir Kanana wa. 7Tsuwa tsa ku wuta abbər Yakub ku kələngkər aka baba'ni ka mama'ni ka təra mwari ahar Paddan Aram. 8Apani sakatə Isuwa wuta abbər maɗankwiyir mjir Kanana ni aɗi kəskəra baba'ni Ishaku wa, 9antə Isuwa təra mwari adzə Ishmayel ka kətə Mahalath na ngkwar Ishmayel na ɓzər Ibrahim tə tsa ndzi mwalankiɗa. Mahalath an ngkwarma' Nebayoth. Antə Mahalath ku ndzi mwalarni ata kəra mwanki damwa tə tsa kəgari.
Yakub Ku Hara Suni Laga Ahar Bethlel
10Aghəla nda antə Yakub ku zhar Beyersheba ka ləkwa lakur mwari ahar Haran.
11Sakatə tsa mzhitə vəi laga, antə tsa thləthlatə ka pi anda, kamnyar tə pci ku təri. Antə tsa kətə pela laga pal akwa nca pelayeri na anda, ka vətə kərari ata ka tsa heni. 12Antə tsa suni abbər lada laga aɗi saɓəl tə mdə thləli ata di, natə kərari ku mzhitə kutahyel. Tsuwa nggədza mjirthlentərhyel akwa ləmta ka səghəi ata. 13Tsuwa nggədza MTHLAKU athləthlata amta ata kəra lada ni, akwa pəla, “I an MTHLAKU, na Hyelər kəkar nga Ibrahim, ka Hyelər Ishaku. Antə tsəɗi ngəni tə gə pəpəi akwa ni, I ata hamta ni ala ga, kəga kəkayeri ar nga. 14Antə kəkayeri ar nga ata sə ndzi hang apa bərbər. Antə da ata sə titilidzi ka mwari təbwar ramta, ka bwar raghəi, ka bwar yala, ka bwar anəm. Atar nga ka atar kəkayeri ar nga antə shanga mjir duniya ata sə wutə barka. 15Nggədza tsuwa, I ata vəi duku ka ga, antə I ata ɓəlatə nga akwa kəlara vəi tə ga ata mwari ata, har kəi ngka ka ga akwa tsəɗi ngəni. Kamnyar I aɗi ata zhar ngə wa, tar ma I ku haratə su tə I ku kətə alkawalari ala ga.”
16Antə Yakub ku thlata ata heni ka pəla, “Jiri, MTHLAKU akwa vəi ngəni! Amma I aɗi səndə wa!” 17Apani tsa ku thlivər ka duna, ka pəla, “Kai! Vəi ngəni ata thlivərantə mda ka duna! Antə jiri, ngəni ata ndzi mbwar Hyel! Tsuwa tsa an nyarfur ləmtazi.”
18Səɓəla ɗəpari, antə Yakub thlatə ɗəɗəpə mbing, ka kətə pela tə tsa vətə kərari ata nda, ka nci ni apa shanggam, ka pungkər mal ata kəra pela ni. 19Antə tsa kəga thləma vəi ni Bethlel, watau mbwar Hyel. Amma waci thləma di ni an Luz. 20Antə Yakub hara alkawal ka kahyel abbər, “Ma Hyel an ata ndzi ata vəi duku ka iya, ka ɓəlatə ra akwa vəi tə I akwa mwarna ni, ka ni susəma tə kəi səma ka ləptu tə kəi hata, 21har kəi jaktə ngka akwa kəyir baba'na akwa lapiyakur, to, MTHLAKU ata ndzi Hyelərna. 22Tsuwa pela ngəni tə I nci apa shanggam ni ata ndzi vəi vəngkər səli aka Hyel, tsuwa akwa kuta shanga suayeri tə Hyel ni, I ata hamta alari zaka.”
Chwazi Kounye ya:
Baɗitari 28: KNB
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.