Baɗitari 27
27
Yakub Ku Dlutsə Barka Na Ar Ishaku
1Apani antə vir laga sakatə Ishaku ku hali, tə ncari aɗi akwa wulɓəla su twar wa, antə tsa kəga Isuwa ɓzərni na olari, ka pəla alari, “Ɓzərna.” Antə Isuwa pəla, “Naam, nggədza ra.”
2Antə Ishaku pəla alari, “Kulini I ku hali, antə I aɗi səndə virər mtərna wa. 3Antə fatə kariyir shir nga, kwajar nga ka laliyir nga, kara mwari akwa mtaku, ka gə tsi ali kum. 4Ka gə ɗəmha ali susəma na msəra, jili natə I hirhir ni, ka gə səntə ali kəi səma, kamnyar kəi vədza ala gə barka akəmata I amta.”
5Azha sakatə Ishaku akwa gari aka ɓzərni Isuwa ni, Rubeka akwa ngga ɗa. Apani sakatə Isuwa ku təra ka ləkwa mtaku kamnyar shi kum ka sənta, 6antə Rubeka pəla aka ɓzərni Yakub, “I nggatə baba' nga akwa gari aka ɓzərma' nga Isuwa abbər 7ka tsa mwari ra səntə alari kum mtaku, ka tsa ɗəmha alari susəma na msəra, ka baba' nga səma, kamnyar ka tsa vədzə alari barka akəma MTHLAKU akəmata tsa amta. 8Antə ɓzərna, psi thləma ga, kara nu kəlara su tə I ku pəla ala ga. 9Mwari akwa ciɓər kwi kara səntə ali maɗa' kwi na ɓɗakɓɗaku suɗa, kəi namtə susəma na msərari aka baba' nga, jili susəma tə tsa hirhir ni. 10Antə ga ata mwanta aka baba' nga ka tsa səma, kamnyar ka tsa vədzə ala gə barka, akəmata tsa amta.”
11Amma Yakub pəla aka mama'ni Rubeka abbər, “Ai gə ka səndari abbər ɓzərma'na Isuwa mdər shishi, antə arna tsuwa dzi lələɓu kula shishi. 12Nuhum baba'na asə tsəkwar dzi ka nggaɓəla abbər I akwa pwaktə ni, ka sə ndəkərəngkər ali shushukur ata vəya barka.”
13Antə mama'ni pəla alari, “Ka shushukur ndaga si ata kəri ɓzərna. Ar nga kələngkər ali bu, kara mwari, ka gə səntə ɗa ali.” 14Antə tsa ku mwari ka səntə ɗa aka mama'ni. Antə mama'ni ku namtə susəma na msəra, jili natə baba'ni hirhir ni. 15Antə Rubeka ku fatə ləptu na ɓɗakta shang ar Isuwa na ɓzər olərni, na ambwarngkiɗa, ka hadza aka Yakub ɓzərni na ntsahari. 16Antə tsa fatə kəsəm kwiyayeri ni ka pərta ata tsiya Yakub, ka ata vəi na kula shishi ata wulyari. 17Antə Rubeka ku na susəma ngəni tə tsa namtə msəra ka buradi adza ni aka ɓzərni Yakub.
18Antə Yakub ku ləmbwa adzə baba'ni ka pəla, “Babana!”
Antə Ishaku ndəra ka pəla, “Aai, gə wa ri ɓzərna?”
19Antə Yakub pəla, “I an Isuwa, ɓzər na yarakəmar nga. I ku hara apatə ga ku pəla ali. Antə thlata, kara ɓɗə kum mtaku ni, ka gə vədza ali barka.”
20Amma Ishaku pəla alari, “Laku madi tə gə mzhi wutə kum ni taktar apani ri, ɓzərna?”
Antə Yakub pəla alari, “Ai MTHLAKU na Hyelər nga an dlar ra, tə I wutə taktar ni.”
21Antə Ishaku pəla aka Yakub, “Shahədzi azi ɓzərna, kəi tsəkwar nga, wala ga an ɓzərna Isuwa jiri, wala aɗi tsa wa.” 22Antə Yakub ku shahədzi adzə baba'ni, tə tsa ku tsəkwar ni, ka pəla, “Kuraka ga an kuraka Yakub, amma tsiya ga an tsiya Isuwa.” 23Tsa aɗi nggaɓəla abbər Yakub wa, kamnyar tsiyari ka shishi tsu apa Isuwa. Antə sakatə tsa ata vədza alari barka ni, 24tsa jaktə yu ni abbər, “Jiri ga an Isuwa ni ya?”
Antə Yakub pəla, “Jiri, I an tsa.”
25Antə Ishaku pəla, “To səntə ali kum tə gə ɓwatə ni ja, ɓzərna, kəi ɓɗa, kəi vədza ala gə barka.” Antə Yakub ku səntə alari kum ni, antə tsa ku ɓɗa. Antə tsa səntə alari yimər anap, antə tsa sangkər. 26Antə baba'ni Ishaku pəla, alari, “Shahədzi ɓzərna, ka gə vədzə mnya ga ali.” 27Antə Yakub shahədzi ka vədzə mnyari aka baba'ni. Sakatə Ishaku ku shiwurər ləptər Yakub, antə tsa vədzə alari barka, ka pəla,
“Mhm, nggatə msərakur shiwurər ɓzərna,
msəra apa shiwur kuta mtaku
natə MTHLAKU ku vədzə alari barka!
28Ka Hyel na gə kəlangkər vəi na amtazi,
ka barkar susəma tə mda ana wuta akwa di,
ata kəma duku ka mthli kəga yimər anap.
29Ka mjir duniya hara kəthlər buɗakur ala ga,
ka tsəɗiyayeri zuzuri akəma ga.
Ka gə ndzi ola ata kəra maɗama' nga,
ka maɗama' nga zuzuri ala ga.
Kəlara mdə na ku shuwumta nga,
ka tsa ndzi shushuwari.
Kəlara mdə na ku vədza barka ala ga,
ka tsa ndzi mdər barka.”
30Təkəma tə Ishaku kuri vədzə barka aka Yakub, tə Yakub akwa ləɓəla kazhar baba'ni, təng təkəma Isuwa səvi akwa bara ni.
31Antə tsa namtə susəma na msəra tsuwa, ka səntə aka baba'ni. Antə tsa pəla aka baba'ni, “Baba, thlatə ka gə ɓɗə kum mtaku natə I si kəgari ka namtə ni, ka gə vədza ali barka.”
32Antə baba'ni Ishaku pəla alari, “Ga an wa ri?”
Antə tsa pəla, “I an ɓzər nga Isuwa, yarakəmar nga.” 33Antə Ishaku ləkwa kədza ka duna swaiswai, tə tsa pəla, “Ka, wa an tsi kum mtaku ka səntə ali kəmata ga asəmbwa, har tə I ɓɗəmnya ka vədza alari barka nə ri? Tsuwa jiri tsa ta ndzi ka barka!”
34Sakatə Isuwa nggatə gariyir baba'ni, antə tsa pthli tuwa ka kuraku na ola ka ɗəffə ɓzəɓza, ka pəla aka baba'ni, “Vədza ali barka, baba! Vədza ali barka tsuwa!”
35Amma baba'ni pəla, “Ɓzərma' nga ku si ka pwaktə ra, ka dlutsə barka na ar nga.”
36Antə Isuwa pəla, “To, azha an su na hara tə mdə vəta alari thləm Yakub ni. Kamnyar kulini ka suɗa antə tsa dlutsə surna. Tsa dlutsə olkurərna na ar yarakəmakur, nggədza kulini tsuwa tsa ku dlutsə barka na arna!” Antə tsa pəla aka baba'ni, “Ga aɗi mbilar ali barka wala raka wa ya?”
37Antə Ishaku shinau ka pəla aka Isuwa, “I ku kurtə namtə ni mthlakər nga. Tsuwa I ku kurtə hamta shanga maɗama'ni akwa tsiyari, ka da ndzi buɗarni. Tsuwa I ku na alari mthli ka yimər anap, ka na alari shanga sur ndzəndziyir mpikari. Antə ɓzərna, su aɗi na mbila tə I ata mzhi na ala gə wa.”
38Antə Isuwa pəla, “Baba, təng barka duku an akəla gə ya? Vədza ali barka baba! Vədza ali barka tsuwa! Antə tsa haptə kurakari ka tuwa ka duna.”
39Antə baba'ni Ishaku shinau alari ka pəla,
“Kəyir nga ata ndzi ciju
ta barkar susəma tə mda ana wuta akwa di,
ta barkar kəlangkəu ar vəi na amtazi.
40Tar atar mpa antə ga ata ndzi ka mpika,
ga ata hara buɗakur aka ɓzərma' nga ar saka laga.
Amma ma sakatə ga ku msər ka ntsuɓəla kəra ga,
ga ata ɓəgələmta udzəmər ni na ata wulya ga ni.”
Yakub Ku Hwi Mwari Adzə Laban
41Isuwa ku kəsi Yakub akwa ɗəffari kamnyar barka tə baba'ni hamta aka Yakub ni. Antə Isuwa kwamta akwa ɗəffari abbər, “Ai ma baba' yeru ku mti, tə mdə ku kuri tuwarni, to, I ata tsi Yakub na ɓzərma'na.”
42Amma sakatə Rubeka nggata ata kəra dzamər Isuwa na yarakəmarni, antə tsa thlentə ka Yakub na ɓzərni na ntsahari ka tsa si. Antə tsa pəla aka Yakub abbər, “Ɓzərma' nga Isuwa wuta abbər su na ata mtathli alari ɗəffari an ka tsa tsi nga, antə tsa akwa ɗəmhədzər tsi nga. 43Antə kulini ɓzərna, kələngkər aka su tə I ata pəla ala ga. Thlata, kara hwi mwari adzə ɓzərma'na Laban ahar Haran. 44Ka gə ɗarndzi anda katagu, tar ma bwarbwarkur ɗəffa ɓzərma' nga ku mtathli. 45Antə ma sakatə ɗəffari ni ku mtathli, tə tsa ku fwari ata kəra su tə ga ku hara ni, I ata thlenta ala gə labar abbər kara ngka. Kamnyar mi tə kəi hara asarər giri japu vir duku ri?”
Ishaku Ku Thlentə Yakub Aka Laban
46Antə Rubeka pəla aka Ishaku, “Arna I ku ghər ka mwankir Hitti ni. Ma Yakub ata sə kəl mwala akwa nca maɗankwi Hitti nayeri ni, to, kuji ka mpikəi aɗi wa.”
Chwazi Kounye ya:
Baɗitari 27: KNB
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.