EXODO 21
21
Ang Pagkabig sang mga Ulipon
(Deut. 15:12-18)
1“Karon amo ini ang mga pagsolondan nga ibutang mo sa atubangan nila. 2Kon magbakal ka sing ulipon nga Hebreo, magaalagad sia sing anum ka tuig, kag sa ikapito magahalin sia nga hilway, sa wala sing ano. 3Kon magsulud sia nga isa lamang, magahalin sia nga isa lamang; kon minyo sia, niyan magahalin ang iya asawa upud sa iya. 4Kon ang iya agalon maghatag sa iya sing asawa kag sia mag-anak sa iya sing mga anak nga lalaki ukon mga anak nga babayi, ang asawa kag ang iya mga anak mangin-iya sang iya agalon kag sia magahalin nga isa lamang. 5Apang kon ang ulipon magsiling sing maathag, ‘Ginahigugma ko ang akon agalon, ang akon asawa kag ang akon mga anak; indi ako maghalin nga hilway,’ 6niyan ang iya agalon magadala sa iya sa Dios, kag magadala sa iya gawang ukon sa bakalan; kag ang iya agalon magaboho sa iya dulunggan sang dulat; kag sia magaalagad sa iya sing dayon.#Lev. 25:39-46.
7“Kon ang isa ka tawo magbaligya sang iya anak nga babayi nga mangin-ulipon, sia dili maghalin subong sang paghalin sang mga ulipon nga lalaki. 8Kon sia indi mahamut-an sang iya agalon, nga nagtiayon sa iya sa iya kaugalingon, niyan tugutan niya nga gawaron sia; wala sia sing gahum sa pagbaligya sa iya sa katawohan nga dumuloong, sanglit nga nalimbongan niya sia. 9Kon ipatiayon niya sia sa iya anak nga lalaki, kabigon niya sia subong nga anak nga babayi. 10Kon magpangasawa sia sing isa pa, dili niya pagbuhinan ang iya pagkaon, ang iya panapton, kag ang iya katungdanan sa pagkatiayon. 11Kag kon indi sia maghimo sining tatlo ka butang sa iya, maghalin sia sa wala sing bisan ano, sa wala sing cuarta.
Mga Kasogoan nahanungud sa Pagsamad
12“Sia nga nagasakit sa isa ka tawo sa bagay nga mapatay sia, patyon.#Lev. 24:17. 13Apang kon ang tawo wala magpuut, kondi nga ang Dios nagtugyan sa iya sa iya kamut, niyan magatangdo ako sing duug sa diin magadangup sia.#Num. 35:10-34; Deut. 19:1-13; Jos. 20:1-9. 14Apang kon ang isa ka tawo maglubha sa iya isigkatawo sa pagpatay sa iya sa daya, kuhaon mo sia sa akon halaran, agud nga patyon sia.
15“Ang nagasakit sa iya amay ukon sa iya iloy, patyon.
16“Ang nagakawat sing tawo, kag nagabaligya sa iya ukon masapwan sia sa iya kamut, patyon sia.#Deut. 24:7.
17“Ang nagapasipala sa iya amay ukon sa iya iloy, patyon.#Lev. 20:9; Mat. 15:4; Mar. 7:10.
18“Kon mag-away ang mga tawo kag ang isa magpilas sa isa sa bato ukon sa iya inumol kag wala sia mapatay apang napahigda sia, 19niyan kon makabangon na sia kag makalakatlakat sa gowa sa iya sungkud, manginhilway sia nga nagpilas sa iya; lamang magbayad sia sang tion niya nga nausik, kag ipabolong niya sia nga mag-ayo gid.
20“Kon ang tawo magbunal sang iya ulipon, lalaki ukon babayi, sa bilogon kag mapatay ang ulipon sa iya kamut, silotan sia. 21Apang kon buhi pa ang ulipon sa isa ukon duha ka adlaw, dili sia pagsilotan; kay ang ulipon iya cuarta.
22“Kon ang mga tawo mag-inaway, kag magsamad sang babayi nga nagadala, sa bagay nga mahologan sia, apang wala sing malain nga masonod, pabayaron ang nagsakit sa iya, sono sa ipabayad sa iya sang bana sang babayi; kag magabayad sia sono sa mapat-ud sang mga hukom. 23Kon may malain nga masonod, niyan magabayad ka sing kabuhi sa kabuhi, 24mata sa mata, ngipon sa ngipon,#Lev. 24:19-20; Deut. 19:21; Mat. 5:38. kamut sa kamut, tiil sa tiil, 25sonog sa sonog, pilas sa pilas, labud sa labud.
Mga Kasogoan nahanungud sa Katungdanan sang mga Tag-iya
26“Kon ang tawo magpilas sang mata sang iya ulipon, lalaki ukon babayi, kag malusuk ini, buhian niya sia nga hilway tungud sang iya mata. 27Kon mabingaw niya ang ngipon sang iya ulipon, lalaki ukon babayi, buhian niya sia nga hilway tungud sang iya ngipon.
28“Kon ang baka magsungay sing lalaki ukon babayi sa bagay nga mapatay sia, ang baka batohon, kag dili pagkaonon ang iya unud; apang ang tag-iya sang baka hilwayon. 29Apang kon ang baka palasungay kutub sadto, kag napaandaman sini ang iya tag-iya apang wala niya pagbantayi, kag makapatay sia sing lalaki ukon babayi, ang baka batohon, kag patyon man ang tag-iya. 30Kon may ibutang nga gawad sa iya, niyan magahatag sia sing gawad tungud sa iya kabuhi bisan ano nga ipabayad sa iya. 31Kon makasungay ini sing anak nga lalaki ukon babayi, himoon sa iya sono sa sining paghukom. 32Kon ang baka magsungay sing ulipon, lalaki ukon babayi, magabayad ang tag-iya sing katloan ka siclo nga pilak sa ila agalon, kag ang baka batohon.
33“Kon ang tawo magbukas sing bobon, ukon ang tawo magkutkut sing bobon kag wala niya ini pagtaboni, kag maholog didto ang baka ukon asno, 34Ang tag-iya sang bobon magabayad; magahatag sia sing cuarta sa tag-iya, kag ang sapat nga patay mangin-iya.
35Kon ang baka sang isa ka tawo makasamad sa baka sang isa, sa bagay nga mapatay ini, niyan ibaligya nila ang baka nga buhi kag tung-on nila ang iya bili; kag tung-on man nila ang baka nga patay. 36Ukon kon nahibaloan nga ang baka palasungay kutub sadto, kag ang tag-iya wala magbantay sa iya, magabayad sia sing baka tungud sa baka, kag ang baka nga patay mangin-iya.
Chwazi Kounye ya:
EXODO 21: ABHIL82
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Ang Biblia ©1982 Philippine Bible Society