2 Timoti 3
3
1A teeri fidek ayen tɛŋka a dan moata kpeglimka, ku le tua kama nuruba jigi. 2Nuruba le jam chim butuem nyam, ligi yaalisa, a yaali yuei nna yegayega, kanjanta nyam, abe ba a lɛ nuruba, abe ba a zɛri ba koba ale ba maba noa, nuru a dan nye wari a te ba ba sue kan peenti, ba kan yaali Wen wie womka, 3ba zɛ badek nuru mɛ, ba kan ta jiirimmoa ba le chim ka nuru baai ale a kaasi nuruba yue la, ba an baga badek a yik ale magadek mɛ la wie po, ba ale chim ka gbeŋma wie yegayega po, ba kisi wamaŋsa tuima kama, 4ba ale pai ba vaanchaab a da wie po, ba ale kasim a nye wie a basi du alege kan poli buye, ba a poli kama mɛ ayen ba ka nuru kpienta, ba ale yaali badek masim wie a gaam Wen wie. 5Ba ale puusi Wen ale ka ba noa nyiini alege a zɛri wa wensie pagrimu. Yeeri fidek nuru bala chaab po. 6Ba gela a suk kama a jo yie po a paasi nipooba, baai ale ta suinum baasinsa ate badek tuimbaata a daani ba la, ate badek ŋan yaalik mɛ a dari ba a ta a cheŋ jigi meena la. 7Nipooma de chaab a nyiem kasim a yaali sinsaga womka alege ba an baga wensieŋa a miŋ a chagi. 8Dila powa Janes ale Jamberes#3:8 Nyinika 7:8-13 a jam zɛri ti kokpieŋka Moosis ale jam nye diila kama. Sagrɔma de baai ale ka venta nyam ate mi a biisi ba wari la, a nye ase ka nuruma de bayewa la. Sagrɔma de abe a zɛri wensieŋa kama dii nyiŋla, ba popolaŋa chim ka popola baata. Ba siaka mɛ a daa wensie. 9Waai meena a nya Janes ale Jamberes ale ka betta diila kama. Ase waai meena ale nya ba bettaŋa diila ku kan beni alege ate dila dekdega a nye nidoa baai ate m poom liŋ a biisi ba wie la jigi ya.
10Yɔgyɔgla de va m sinsaŋŋa ale m nyeelaŋa ale m popolaŋa ale m siaka ale m suiduŋni ale m yaalika, ale m chichiibaŋa ale 11m namsika ale m ninammu, ŋade ale nye mu Antiok ale Ikoonium ale Lisitira, namsi kaai meena ate m chiibi, ate ku meena po Naawen a vari mu a basi. 12Nuru baai ale a yaali ayen ba pai badek a te Yeezu Kirisita a yaa va Wen la, nuruba basi ate ba nya ka ninam. 13Alege pimpaasirɔba baai ale a tom tuimbaata la, le jam tom tuimbaata a gumdu. Ba a paasi ka badek ale nuruba. 14Alege fi Timoti a va Wen wensie suiku kama. Fi seba baai ale jam ka fi sagrɔba la kama kasim ta siaka yegayega. 15Fi mɛ seba weleŋsa wieŋa Gbaŋsaŋa kama a ta nyini fi bi fiik po, sii ale a sak ayen nuru waai a dan ta siaka ale Yeezu Kirisita ku la nyɔnɔwa le nya varibasika kama la. 16Wen wieŋa meena ka Wen dek ale pai te a magsi sakka ale toariŋka, ale nye niaka ale zamsika wayɔrisima po, 17ate Wen nuruwa a gomsi paari a baga tuimaŋsa meena a tom.
Chwazi Kounye ya:
2 Timoti 3: BWU
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
© 2023, Ghana Institute of Linguistics, Literacy and Bible Translation