2 Timoti 2
2
1M nidoabiliga, ku ka Wen ŋmanteka nyiŋ ate tama ale Yeezu Kirisita a chim bunyi. Dila nyiŋla, be ta pagrim. 2Sinsak ŋaai ate mi a pai sak fu nuru boari suŋsuŋ la ba wom kama. Fi mɛ pai sinsak ŋala dek a sak nuru baai ale ka wensie nyam ate ba mɛ baga a pai ŋa a sak ba vaanchaab ate ku tagli a cheŋ. 3Tuesi fi ninammu ase tugurik tɔŋdɔ waai ale a tom wa tuimaŋa nalimnyiini la, dii nyiŋla, fi ka Yeezu Kirisita tugurik tɔŋdɔ. 4Tugurik tɔŋdɔba a dan boro a tom ba tugurik tɔŋdɔba tuimaŋa, wa kan tom tuim ŋaai ate nuru waai ale kan daa tugurik tɔŋdɔ a tom la. Wa nyiem a yaali kama ayen wa tuimaŋa a te wa tugurik tɔŋdɔba kpagni suipeentik. 5Chalidɔ a dan kan va chalaŋa vuuk tii ate ba dueni la, wa kan nya wa naam zutɔkka. 6Yaase kpaarɔ waai ale a tom nalimnyiini wa talim po la, wala ale soa bie ŋaai ale liŋ a abe la alege ate cheka a yaa paari.#2:6 Teerika 20:6 7A poli m le a weeni fu nna la. M seba chak kama ayen ti Naawenni le wa a maari fu ate fi miŋ m wieŋa a chak.
8A teeri Yeezu Kirisita waai ale jam ka Deevid ŋaaŋbiik la wie ayen wa yiti kum po kama. Wamaŋsaŋa de ate mi kasim a weeni a sak nuruba diipo meena ate mi a sak nuruba la. 9Wen wamaŋsaŋa nyiŋ ate ba yik mi a pai chɔrima a bobi mu ayen m nam ase tuim kaasima nyɔnɔ la. Alege ba an baga a bobi wa wanni. 10Dila ale soa ate m ta suinum pagrik ale m ninammu, ayen nuru baai ate Wen a lueri la a nya varibasika. Varibasika de a basi kama ate bala ale tama meena ale Yeezu Kirisita a chim bunyi ate ti yaa a nya zula ŋaai ale kan ta kpeglimka la. 11Ba weeni ka wensie ayen, <<Ku dan ka wensie ayen tama kpi kama ale wa, ku be sum ka wensie mɛ, ti be ale yiti kum po ale wa kama mɛ a yaa vua ale wa. 12Ti dan siak a te ti ninammu ale ti suiniima meena, dai yeŋ tama ale wa le chim nalima. Ti be dan pagsi ayen ti zɛ wa, wa mɛ le pagsi ayen wa zɛ ti. 13Tama dan kan daa wensie nyama, wa kasim ka wensie nyɔnɔ diipo meena. Wa kan maari a chim nɔi buye nyɔnɔ.>>
14Teeri fi nuruma wieŋa de meena abe fi kaam ba ale nin muna Wen niŋ ayen ba kan a nak nanpaga kayaata ale wamaŋ a kan nyini nanpaga kayaataŋa de chaab po a nyini, ŋa goanti a kaasi ka nuru baai ale a wom la popola. 15Pii nyiŋ a tom Wen tuimaŋa nalimnyiini, ate wa pak fu ate fi kan chim tomteerɔ waai le wa nya chivie la, alege waai ale a sak wensie wamaŋsaŋa ate ku a magsi la. 16Ase mi ale poom weeni fu diila, kan pai fidek a gum chaab ale baai ale a biisi betta biisa ale chaab la, dii nyiŋla baai ale a biisi dila la, a yiak ka nuruba ate ba kan va Wen ya. 17Ba ale kasim a biisi diila, ku a nye ase ka naworuk ale bo nuru nyiŋ a dɛ wa la. Yimeniyus ale Filitus a maa ka ba po. 18Nuruba bayewa de a basi Wen wensie suiku kama ate nuruba gela mɛ ale ta siaka ale Kirisita va ka la a basi wa va ka, dii nyiŋla ba a sak kama ayen diipo ate nuruba le yiti kum po la, taam kama. 19Alege nyubi dii ate Wen a nyubi la, di pagra ka nna yegayega, a kan choa. Wa ŋmarisi dueni di nyiŋ ayen, <<Naawen seba baai ate wa soa la kama,>> (Chiinika 16:5) ale <<Baai meena ale a weeni ayen Naawen a soa ba la, ku a fɛ kama ayen ba basi ba tuimbaata abe ba va wa.>>
20Taasa ale ŋanta tɔgatɔga yegayega ale bo yeri po la, ba pai ka ŋan baai ale a nyaksi a nye, ŋa gela ba pai ligmɔniŋ a nye, gela ba pai daata a nye, gela ba pai yak a mɛ. Ba gela ba pai zaani magsi ka nicham ŋanta nye teka, ba gela badek daa meena pai tomka. 21Waai a dan kan ta daŋta ale tuimbaataŋa de meena ate m liŋ weeni la, ase taasaŋa nyɔnɔwa ale pai taasi maŋsaŋa a nye nicham ŋanta la, Wen mɛ abe le pai nuru wala choa mɛ a tom ka tuimaŋsa meena. 22Dila nyiŋla, kan va fidek ale a yaali ŋan baai ase bimbaansa ale a yaali ŋan baai la, alege ta ku fi suinum po ate fi a tom tuimaŋsa yegayega a te wa, abe fi ta siaka ale yaalika, abe fi boro ale suiyɔgni ale baai ale a wi Naawen ale suinum weleŋsa a yaali maarika la. 23Ka a tu chaab ale nuru betta baai ale kasim a nak nanpaga ale ŋan baai ate ba kan miŋ a chak la. Fi seba ayen ba nampaŋŋa nakka a ta ba cheena ka kpaliŋ jigi. 24Ku a fɛ ayen ti Naawenni tomteerɔ kan a nye kpaliŋŋa. Ku a fɛ ate wa a te nuruba zula, abe wa chim sagrɔ maŋ waai ale ta suduŋni la. 25Nuruba a dan a zɛri wa sinsaŋŋa alege wa a yaali ayen wa sak ba, ku a fɛ ayen wa yik wadek. Da dii dai, Wen le te ba suik ate ba tulim a va wa abe ba seba wa wensieŋa. 26Ba dan nye dila, ba le baga a pilim a jam nya yam ate ba baga chali bɛ jabioku jigi waai ale jam bari yik ba a ta la ate ba yaa va Wen nɔi.
Chwazi Kounye ya:
2 Timoti 2: BWU
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
© 2023, Ghana Institute of Linguistics, Literacy and Bible Translation