2 KORINTNA 5
5
1Aygi wi anaba zira aygi ka kagi huruɗ wanda, ni di ana mbalatay ta hu ndaŋgara wanda, ɓalak ki lay ni Lona miniygi zina ha kolo ni zi ma nam minim u tambana kak din din ka daɓ kiɗi. 2Cecemi aygi ka wi hawra, saa maygira kay juɓuygi ziiygi ma kolo huulona kaygina. 3Hu li ma aygi cukum taygi wa ɗaŋi taygi hin ka li sili oloɗi. 4Ni aygi day day ka kaki hu mbutluɓ ma kaŋga duk ndaŋgara namma, aygi ka wi hawra ko nekka kaygi na. Ka ana ami min ɓorow ki u mbalatamira kay ndaŋgara wanda naɗi, ami min a cuk mbalata mayra kolora egemiya, ma miɗna mba loɗ ki u ma iirina. 5Lona u tamba ŋga ki ana aygi mba wi mbuɗ mayra ndaɗta ni namu, nam ɦaygi Musuk mamba ko vama nam ŋgaygin ki fok jew maygina na.
6Ami tew tew ka u ɦiŋga hurumiya. Ami wi ana hu li ma ami kaki hu mbalatami ndaɗta tuna, ni ami ki day eg li kakka vi Bu Suuna tuwa. 7Ami ka tuɗ fokomi u vira bay wi u irimi tuwa. 8Ami ka u ɦiŋga hurumiya, min a hin mbalatamira ndaɗta kiyo, tuɗ kak eg Bu Suuna. 9Lini ami ka hu mbalatamira wanda lay, lini ami hiniɗ ki lay, ni ami li ki irim jivi jew tuwa. 10Aygi halaŋ hin mba ŋgaygi taygira hu ɓakŋa fok Kristu, kay gegelay mba fi va ma nam lamma, hu li ma nam ay hu mbalatam tuna, lini jiviya lini coo.
Taɓaygi dukuygi u Lona ni Kristu
11Aygi waygi dla mayra di ana li ndaa Bu Suunara, ni ay hal a vi suuna. Lona waygi ki ɗal ɗal an saa ana u hurugi lay, agi tagira wanni na lay. 12Ami ka hoŋ a gijaŋŋa a ŋga tami fokogi na ɗowɗi, ami min ɦagi voɗta kay agi ŋga tagi kamiya, ni agi ndak a hoŋ dira maŋ suu kaki buru ɦawana, ka kay va ka hurusinaɗi. 13Lini yal ka irimiɗi ni kay Lona, lini yal mamina kaa ni kagi agi may. 14Minda vi Kristu ɦeɓemiya, ami suu wi ki gasi ana sana dew miɗ kay suuna halaŋ, gegelay mba fi miɗ mamma u namma. 15Nam miɗ kay suuna halaŋ kay suu ka iirina mba kak iiri kay tasi oloɗi, kakŋi kay sa ma miɗna, hin paɗ ki kolo iiri kasina.
16Ni ami ka golomi suuna ko suu warna na oloɗi. Lini ami gol Kristu ay jew ko sa warna na lay, cemi ami ka golom na oloɗi. 17Lini sana ka hu Kristu ni nam mbuɗ ni sa ma wilina, tlesuu basina daɓ ki wa, suu wilina ka ni asiya. 18Dla ndaɗta halaŋ mbay ni ko Lona, nam Kristu taɓaygi duk ɦoŋoygi u namu, ɦay sunda a mbaa suuna a taɓ duk ɦoŋga u nam may. 19Lona min taɓ duk ɦoŋ suuna halaŋ u namu u Kristu, kay ndaɗta nam ka ndumusi dlaasira coraɗi. Nnam cukumi a di boy dla sunda taɓ duk ɦoŋga.
20Ami varak balam Kristu a di boyna ko Lona u tamba yagi funumira na. Ami cenegi u sem Kristu hinigi taɓ duk hoŋogi u Lona. 21Kristu coomba kaɗi Lona mbuɗum ki sa ma li dlara cora kay cooygira kay aygi mbuɗ ki suu ɗegeena fokom nam Lona.
Chwazi Kounye ya:
2 KORINTNA 5: BMS
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bible Moussey © Bible Society of Chad, 2002.