2 KORINTNA 4
4
Begena vi Musukka hu doy luɓuna
1Lona u jivi mamba ɦami sunda ni namu, ni kay ndaɗta ami ka mbuɗ maŋiɗi. 2Ami hin ŋgayra zolona kiyo, ami ka lami u hu ma conaɗi, ami ka tlumumi ii Boy Lonanaɗi. Ami takami ni gasira vi Lonara na ɗow, ami gaɗami suuna kay wiisira hurusira halaŋ fok Lona. 3Lini Boy ma Ayra ma ami ka damma ki kiɗiki, ni nam ii suu ba kina ni ndufun lay. 4Asi ka ndak a viɗi kay lo ma co ma hu ndaŋgara tanina kuluɓusi yal masina ki wa. Lo namma doorosi kay a wi kiɗikka vi Boy ma Ayra ma tak ki kay bibiŋilla vi Kristura, ma tli tam u Lonna. 5Ami ka ɓak boyna ni kay tamira gawɗi, ami di boyna ni kay Yesu Kristu Bu Suuna, ami di kay tami ana ami ni suu sun masira kay sem Yesu. 6Lona di ana kiɗikka weleɗ duk ndufunda nammi sa ma hin kiɗik mamba weleɗ huruygina, kay ɦaygi bibiŋilla vi Lonara u kiɗik maɗta weleɗ fok Kristu.
7Ami suu ka u begena vi Musukka komina, ami ni ko doy luɓuna na, kay sana wi ki ana saɓak mami ma mbuɗ mbuɗta namma col ay ni ko Lona ka komi amiɗi. 8Njaf lassa fami zeɗ zeɗ ŋgolo ni cami kaɗi, ami mbuɗ ndaa ŋgol lay ni hoŋ ka ki daganɗi. 9Asi lasami lay ni Lona hinimi ka kiɗi, gami kaŋga gog gog lay ni cami ka kiɗi. 10Ami tlami miɗna vi Yesu kami tew tew, kay iiri mamba tak ki egemi lay. 11Hu iiri mamira ni ami tew tew laki fun miɗna kay sem Yesu kay iirira vi Yesura mba tak ki eg mbalatamira miɗira. 12Ni ndaɗta miɗna li egemi may, iirira li egegi agi may.
13Magaara di ana, «An viya ni an ɓakŋi kay ndaɗta,» ami halaŋ taɓi hu ŋgussa vi vira ndaɗta, ami viya ni ami ɓakŋi kay ndaɗta. 14Ami wi ana Lona paɗ Bu Suuna Yesu ki kolo iiriya, nam hin paɗami ki kolo iiri ko tami u Yesu may, aygi hin taɓi ko taygi dew fokom namu. 15Tlesuu asina halaŋ li na ni magi agiya, ni kay ndaɗta oora vi Lona ndak ki kay suuna bolowo, vay u dlara ki halaŋ hu cenda fok Lona u bibiŋil mamba.
Kak Iiri hu vira
16Ni kay ndaɗta ami ka mbuɗ maŋiɗi. Lini mbalatami ka ɓalak ki hu buuna tew tew lay, mbalatamira ŋgussa ka mbuɗ wili hu buuna tew tew may. 17Wihawra feɗta ka tuɗ kami cecem lay li kami ni bibiŋilla ŋgolla ka daɓ kiɗi, ndaɗ ŋgol saɓak su wihawra ndaɗta. 18Ami tin hurumi ni ka kay va sa wam u irimbi, ni kay va ma sa ka wam u irimbina. Va ma sana wam u irimma ka kak ŋgolɗi, va sa ka wam u irimbina kak din din ni namu.
Chwazi Kounye ya:
2 KORINTNA 4: BMS
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bible Moussey © Bible Society of Chad, 2002.