Vèsè popilè nan Bib la ki soti nan A̱filibiyawa 4

Pataje

Nyi ni̱ ngyok sorop di̱ kyang bah. Da̱ a̱kwonu a̱kya, nyi ni̱ naai A̱gwaza tazwa kuzang kyang. Nyi ni̱ hyia̱ ma̱ng A̱gwaza kyang nang nyi chat a̱ni. A̱wot nyi gwai ma̱ng nggu mat a̱mgba̱m nkyang nang gu nyia̱ nyin ndyo a̱ni.

A̱jawa nyi na ndyen swat nyinyang ku neet da̱ a̱vwuo A̱gwaza a̱ni, si̱ hu swak a̱mgba̱m kyang nang zi̱ na fi̱k a̱ni. Swat nyinyang nang A̱gwaza nwuat nzi̱t a̱ni, ku na chok nfwuo nyin na ma̱ng a̱di̱dam nyin wu mami Kristi Yesu.

Nyin á̱niet khwi Yesu ba nang n chat a̱ni, a̱wot ma̱ninika: Nyi tyia̱ a̱di̱dam nyin wu di̱ kyang ku yet a̱chuchuk a̱ni; kyang ku maai á̱ nwuak hu shi a̱ni; kyang ku yet a̱tsotswat a̱ni; kyang ku yet a̱za̱za̱rak a̱ni; kyang ku yet a̱sham nang á̱ chyin a̱ni; kyang hu ku myim a̱ni; kyang ku yet a̱tan a̱ swak a̱ni; ma̱ng kyang ku myim á̱ dyep a̱ni. Nyi ni̱ nyia̱ a̱di̱dam di̱ nkyang nani nia.

Ki̱ n doot n swan nswat huni mi̱ kuzang tangka̱i njen nang n shya̱ a̱pyia̱ nung a̱ni, mat chet hu nang Kristi nang nung a̱ni.

Nyi gwai di̱ mun á̱pyia̱ nyin hu ma̱ng A̱tyoli Yesu kuzang jen. N bu nyia̱, nyi ni̱ ngwai!

A̱wot A̱gwaza nung wu na nang nyin a̱mgba̱m kuzang kyang nang nyi chat a̱ni, mami a̱gba̱mgbam zwá nggu wu, mat mun á̱pyia̱ nzi̱t hu ma̱ng Kristi Yesu.

Nyi ya a̱son mi̱ nyia̱ nta̱m ma̱ng a̱mgba̱m tyiet nung hu nang nyi fa̱k, nyi si̱ san, nyi si̱ bu li nang n nyia̱ a̱ni. A̱wot A̱gwaza a̱ nwuat swat nyinyang a̱ni, na shya̱ dundung ma̱ng a̱nyin.

Nyi yok konyan a̱ li yet a̱shonshyon nyin hu da̱ a̱mgba̱m nkyang nang nyi nyia̱ a̱ni. Nyi yok bwung bah; bwuok A̱tyoli Yesu hu bwat kpa̱mkpaan.

N dyen si̱sak ji nang n na nswan nang a̱tyu kunak a̱ni, ma̱ng si̱sak ji nang n na nswan nang a̱tyu nzwá a̱ni. N wa ka̱n meang ma̱ng a̱swa mi̱ kuzang tangka̱i njen nang n shya̱ a̱pyia̱ nung a̱ni; ku ma̱ng kyayak ku ma̱ng a̱fa a̱khwot, ku n shya̱ gba̱mgbam, ku n shya̱ ma̱ a̱da̱dei.

N shei nyin a̱lyiat nani, da̱nian n ka nchat beang hwa bah. Mat n wa ka̱n meang ma̱ng a̱swa di̱ kuzang kyang ku shya̱ nung a̱ni.