مَتَّى 17
17
الْفَصْلْ سْبَعْطَاشْ
يَسُوعْ كَيْبَانْ فْالْعَزّْ دْيَالُه
1وْمْنْ بَعْدْ سْتّْ يَّامْ، دَّا يَسُوعْ بُطْرُسْ وْيَعْقُوبْ وْخُوهْ يُوحَنَّا، وْطَلّْعْهُمْ بُوحْدْهُمْ لْوَاحْدْ الجّْبَلْ عَالِي. 2وْتْبَدّْلْ الشّْكَلْ دْيَالُه قُدَّامْهُمْ، وْضْوَّا وْجْهُه كِالشّْمْسْ، وْحْوَايْجُه وْلَّاوْ بُويْضْ كَيْلَمْعُو كِالنُّورْ. 3وْهُوَ يْبَانْ لِيهُمْ مُوسَى وْإِيلِيَّا كَيْتّْكَلّْمُو مْعَ يَسُوعْ. 4وْݣَالْ بُطْرُسْ لْيَسُوعْ: «شْحَالْ مْزْيَانْ نْبْقَاوْ هْنَا آ سِيدِي. إِلَا بْغِيتِي، نْصَايْبْ هْنَا تْلَاتَة دْ النّْوَايْلْ، وَحْدَة لِيكْ وْوَحْدَة لْمُوسَى وْوَحْدَة لْإِيلِيَّا». 5وْفْالْوَقْتْ فَاشْ كَانْ كَيْتّْكَلّْمْ ضَلّْلَاتْ عْلِيهُمْ وَاحْدْ السّْحَابَة مْضَوّْيَة، وْتّْكَلّْمْ صُوتْ مْنْ السّْحَابَة وْݣَالْ: «هَادَا هُوَ وْلْدِي الْعْزِيزْ اللِّي بِيهْ فْرَحْتْ بْزَّافْ، سْمْعُو لِيهْ!».#2بطرس 1:17،18 6وْمْلِّي سْمْعُو التّْلَامْدْ هَادْشِّي، طَاحُو عْلَى وْجُوهْهُمْ وْخَافُو بْزَّافْ. 7وْقَرّْبْ يَسُوعْ لْعَنْدْهُمْ وْمْسّْهُمْ وْݣَالْ لِيهُمْ: «نُوضُو، مَا تْخَافُوشْ!». 8وْهْزُّو عِينِيهُمْ وْشَافُو غِيرْ يَسُوعْ بُوحْدُه. 9وْفْالْوَقْتْ فَاشْ كَانُو نَازْلِينْ مْنْ الجّْبَلْ، وْصَّاهُمْ يَسُوعْ وْݣَالْ: «مَا تْݣُولُو لْحْتَّى شِي حَدّْ هَادْشِّي اللِّي شْفْتُو حْتَّى يْتّْبْعَتْ وَلْدْ الْإِنْسَانْ مْنْ الْمُوتْ».
10وْسْوّْلُوهْ تْلَامْدُه: «إِيوَا عْلَاشْ كَيْݣُولُو الْعُلَمَا دْ الشّْرَعْ بْلِّي فْاللّْوّْلْ خَاصّْ النّْبِي إِيلِيَّا يْجِي؟». 11وْجَاوْبْهُمْ وْݣَالْ: «فْالْحَقِيقَة، إِيلِيَّا غَيْجِي هُوَ اللّْوّْلْ وْغَيْصْلَحْ كُلّْشِي، 12وَلَكِنْ نْݣُولْ لِيكُمْ: رَاهْ جَا إِيلِيَّا وْمَا عَرْفُوهْشْ، وْدَارُو بِيهْ مَا بْغَاوْ، وْهَكَّا وَلْدْ الْإِنْسَانْ حْتَّى هُوَ غَادِي يْتّْعَدّْبْ عْلَى يْدِّيهُمْ».#متى 11:14 13وْدِيكْ السَّاعَة فَهْمُو التّْلَامْدْ بْلِّي كَانْ كَيْتّْكَلّْمْ لِيهُمْ عْلَى يُوحَنَّا الْمَعْمَدَانْ.
يَسُوعْ كَيْشَافِي وَلْدْ مْسْكُونْ
14وْمْلِّي وْصَلْ يَسُوعْ وْالتّْلَامْدْ دْيَالُه لْعَنْدْ الجّْمَاعَة دْ النَّاسْ، جَا لْعَنْدُه وَاحْدْ الرَّاجْلْ وْسْجَدْ لِيهْ، 15وْݣَالْ: «رْحَمْ وْلْدِي آ سِيدِي، عْلَاحْقَّاشْ فِيهْ لْرْيَاحْ وْكَيْتّْعَدّْبْ بْزَّافْ، وْبْزَّافْ دْ الْمَرَّاتْ كَيْطِيحْ فْالْعَافْيَة وْفْالْمَا. 16وْجْبْتُه لْتْلَامْدْكْ وْمَا قَدْرُوشْ يْشَافِيوْهْ». 17وْجَاوْبْ يَسُوعْ وْݣَالْ: «آ هَادْ الْجِيلْ اللِّي مَا عَنْدُه إِيمَانْ! حْتَّى لْإِمْتَى غَنْبْقَى مْعَاكُمْ؟ حْتَّى لْإِمْتَى غَنْتّْحَمّْلْكُمْ؟ جِيبُو لِيَّ الْوَلْدْ لّْهْنَا!». 18وْنْهَضْ يَسُوعْ فْالجّْنّْ، وْهُوَ يْخْرَجْ مْنْ الْوَلْدْ، وْتّْشَافَى دِيكْ السَّاعَة. 19وْقَرّْبُو التّْلَامْدْ لْيَسُوعْ وْسْوّْلُوهْ غِيرْ بِينْهُمْ وْبِينُه وْݣَالُو: «عْلَاشْ مَا قْدَرْنَاشْ حْنَا نْخَرّْجُو الجّْنْ؟». 20وْݣَالْ لِيهُمْ: «بْسْبَابْ قَلّْةْ إِيمَانْكُمْ! وْنْݣُولْ لِيكُمْ الْحَقّْ: إِلَا كَانْ عَنْدْكُمْ إِيمَانْ قْدّْ حَبَّةْ الْخَرْدَلْ، غَادِي تْݣُولُو لْهَادْ الجّْبَلْ: تّْحَوّْلْ مْنْ هْنَا لّْهِيهْ، وْغَادِي يْتْحَوّْلْ. وْحْتَّى شِي حَاجَة مَا غَتْكُونْ مُحَالْ عَنْدْكُمْ. [ 21وْهَادْ النُّوعْ دْ الجّْنُونْ مَا كَيْخْرُجْ غِيرْ بْالصّْلَاة وْالصّْيَامْ».]#17.21 هَادْ الْآيَة مَا كَايْنَاشْ فْبْزَّافْ دْيَالْ الْمْخْطُوطَاتْ الْقْدَامْ#متى 21:21؛ مرقس 11:23؛ 1كورنتوس 13:2
يَسُوعْ كَيْتّْنَبّْأْ مَرَّة خْرَى بْالْمُوتْ وْالْبَعْتْ دْيَالُه
22وْكَانُو التّْلَامْدْ مْجْمُوعِينْ فْبْلَادْ الْجَلِيلْ، وْهُوَ يْݣُولْ لِيهُمْ يَسُوعْ: «وَلْدْ الْإِنْسَانْ غَيْتّْسَلّْمْ لْلْيْدِّينْ دْ النَّاسْ، 23وْغَيْقْتْلُوهْ، وْفْالنّْهَارْ التَّالْتْ غَيْتّْبْعَتْ». وْحَزْنُو التّْلَامْدْ بْزَّافْ.
يَسُوعْ كَيْخَلّْصْ الضَّرِيبَة دْيَالْ بِيتْ اللَّهْ
24وْمْلِّي رْجَعْ يَسُوعْ وْتْلَامْدُه لْكَفْرْنَاحُومْ، جَاوْ مَّالِينْ الضَّرِيبَة دْيَالْ بِيتْ اللَّهْ عَنْدْ بُطْرُسْ وْسْوّْلُوهْ: «وَاشْ مَا كَيْخَلّْصْشْ الْمُعَلِّمْ دْيَالْكُمْ الضَّرِيبَة دْيَالْ بِيتْ اللَّهْ؟». 25وْجَاوْبْهُمْ: «إِيِّهْ، رَاهْ كَيْخَلّْصْهَا». وْمْلِّي دْخَلْ لْلدَّارْ سْبْقُه يَسُوعْ وْݣَالْ لِيهْ: «آشْ بَانْ لِيكْ آ سِمْعَانْ؟ مْنْ عَنْدْ مْنْ كَيَاخْدُو مُلُوكْ الْأَرْضْ الضَّرِيبَة وْلَا الْجِزْيَة؟ وَاشْ مْنْ وْلَادْهُمْ وْلَا مْنْ الْبْرَّانِي؟». 26وْجَاوْبُه بُطْرُسْ: «مْنْ الْبْرَّانِي». وْهُوَ يْݣُولْ يَسُوعْ: «عْلَى هَادْشِّي وْلَادْهُمْ رَاهُمْ مْعْفِيِّينْ مْنْ الضَّرِيبَة. 27وَلَكِنْ بَاشْ مَا نْتّْسَبّْبُوشْ لِيهُمْ فْشِي مُشْكِلْ، سِيرْ لْلْبْحَرْ وْرْمِي الصّْنَّارَة، وْالْحُوتَة اللّْوّْلَى اللِّي غَتْشْدّْهَا، حَلّْ لِيهَا فُمّْهَا، وْغَادِي تْلْقَا فِيهْ رْبْعَة دْيَالْ الدّْرَاهْمْ، خُدْهَا وْسِيرْ خَلّْصْ عْلِيكْ وْعْلِيَّ».
Trenutno odabrano:
مَتَّى 17: MSTD
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved
