ROMA 3
3
Sa tukuna ka veiletitaka ko koya na nodra nanuma na Jiu, 1-20. Sa qai vakatakila ni da sa vakadonui e na vuku i Jisu ga, ni da sa vakabauti koya, 21-31.
1A cava na ka sa vinaka cake kina, na Jiu? se cava na betena na veicili? 2E levu e na ka kece; e levu sara, ni sa lesi vei ira me ra maroroya na vosa ni Kalou. 3Ia ka vakaevei, kevaka sa sega ni vakabauta ko ira eso? me vakatawayagataka li na nona dina na Kalou na nodra sega ni vakabauta? 4E segai sara: me dina ga na Kalou, ka me lasu na tamata kecega; me vaka na ka sa volai, Mo vakadonui ni ko sa vosa, Ka gumatua ni ko sa veileti.
5Ia kevaka sa vakadinadinataki nai valavala dodonu ni Kalou e na nodai valavala tawa-dodonu, a cava me da kaya? sa sega beka ni dodonu na Kalou, ni sa sauma? (Au sa vosa me vaka ga na tamata.) 6E segai sara: kevaka sa vakaoqo, ena qai lewai vuravura vakaevei na Kalou? 7Io, kevaka sai koya na noqu lasu sa uasivi cake kina na nona dina na Kalou, me vakarokorokotaki ko koya, e na cava ka'u sa cudruvi tiko kina me vaka na tamata ca? 8ia ena sega li ni vaka (ni keitou sa lasutaki, ka sa kainaki ni keitou sa vosa vaka ne,) Me da kitaka nai valavala ca, me yaco kina na ka vinaka? ia ko ira oqo era na cudruvi vakadodonu.
9Ia ka vakaevei? eda sa uasivi cake li? E segai sara e na dua na ka: ni keitou sa vakadinadinataka eliu ni ra sa cala kecega, ko ira na Jiu, kei ira sa matanitu tani; 10me vaka na ka sa volai, Sa sega e dua sai valavala dodonu, sa sega sara e dua: 11Sa sega e dua sa kila, Sa sega e dua sa vakasaqara na Kalou. 12Era sa lesu tani kecega, era sa yaco vata me sega ni yaga; Sa sega e dua sai valavala vinaka, sa sega sara e dua. 13Ai bulubulu sa dola tu na nodra i tilotilo; Era sa dauveivakaisini e na gusudra; Sa tu e ruku ni bele ni gusudra na weli gaga ni gata: 14Sa sinai na gusudra e na ruru kei na vosa daugaga: 15Sa kusarawa na yavadra me vakadavea na dra: 16Sa tu e na nodra sala na rusa kei na rarawa: 17Ia era sa sega ni kila na sala ni veivakacegui; 18Sa segai vei ira na rerevaka na Kalou.
19Ia eda sa kila na ka kecega sa kaya na vunau, sa kaya vei ira sa tu vei ira na vunau; me vagalui kina na gusudra kecega, ka me beitaki e na mata ni Kalou na kai vuravura kecega:
20Ena sega ni vakadonui vua e dua na tamata e nai valavala ni vunau: ni sai koya na vunau sa kilai kina nai valavala ca.
21Ia ka sa qai vakatakilai mai e na gauna oqo na ka sa veivakadonui kina na Kalou, ka ni sa sega ni yaco e na vuku ni vunau, ia sa vakadinadina kina na vunau kei ira na parofita; 22io, sa ia na veivakadonui na Kalou e na vuku ni vakabauti Jisu Karisito, vei ira kecega era sa vakabauta; ni da sa tautauvata kecega: 23ni sai valavala ca ko ira kecega na tamata, ka ra sega ni yacova na ka e vakarokorokotaki kina na Kalou: 24a ra sa vakadonui walega e na nona loloma ni sa volia na bula ko Jisu Karisito: 25o koya sa lesia na Kalou mei bulubulu vei ira sa vakabauta, e na nona dra, me vakatakila na nonai valavala dodonu ni sa sega ni sauma nai valavala ca sa caka oti, ka ni sa vosota na Kalou; 26io, me vakatakila e na gauna oqo na nona yalododonu: me sa dodonu ko koya, ka vakadonui koya sa vakabauti Jisu.
27Sa qai evei beka na ka ni veidokadokai? Sa takali sara. E na vuku ni vunau cava? na vunau ni cakacaka li? E segai: e na vuku ga ni vunau ni vakabauta. 28O koya keitou sa vaka sa vakadonui na tamata e na vakabauta, ia ka sega ga e na vuku ni cakacaka ni vunau. 29Sa nodra duaduaga na Jiu ko koya na Kalou? sa sega beka ni nodra talega na veimatanitu tani? Io, sa nodra talega na veimatanitu tani: 30kevaka sa dua bau ga na Kalou, ka na vakadonui ira sa cili, e na vuku ni vakabauta, kei ira talega sa sega ni cili, e na nodra vakabauta. 31Keitou sa qai vakatawayagataka na vunau e na vakabauta, se segai? E segai sara: keitou sa vakataudeitaka ga na vunau.
Trenutno odabrano:
ROMA 3: FOV
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Vakavakadewa Makawa (Fijian Old Version) © Bible Society of the South Pacific