ROMA 16
16
Sa tukuni ira eso na tamata lotu dina ko Paula, 1-16. Sa tukuna yani na nona loloma, 17-24. Sa tinia na nonai vola, 25-27.
1Ia ka'u sa tataunaki Fipi yani vei kemudou, o koya na wekada, o koya sa dauqarava nai soqosoqo lewe ni lotu mai Kenikiria: 2mo dou vakacegui koya e na vuku ni Turaga, me vaka sa kilikili kei ira era sa lotu, ka mo dou vukei koya e na cakacaka kecega dou na yaga kina vua: ni sa dau vukei ira na lewe vuqa ko koya, kei au talega.
3Me tukuni yani na noqu loloma vei rau ko Pirisila kei Akuila, koi rau sa cakacaka vata kei au e na veika i Karisito Jisu: 4ka rau sa bolea na mate me'u bula kina: keitou sa vakavinavinaka kina vei rau, keitou kei ira kece na veisoqosoqo lewe ni lotu vei ira na veimatanitu tani: 5Au loloma talega vei ira nai soqosoqo lewe ni lotu e na nodrau vale. Au sa loloma vei Epinito, na tamata ka'u sa daulomana, o koya nai sevu vei Karisito mai Esia. 6Au sa loloma vei Meri, o koya sa daucakacaka vakalevu e na vukumudou. 7Au sa loloma vei Adroniko kei Junia, na wekaqu, keitou a vesu vata kei rau, a rau sa rogo vei iratou nai apositolo, erau sa nei Karisito eliu, au sa muri koi au. 8Au sa loloma vei Abilia, o koya ka'u sa daulomana e na vuku ni Turaga. 9Au sa loloma vei Uripenu, o koya sa dauvukei keitou e na cakacaka i Karisito, kei Siteki, o koya ka'u sa daulomana. 10Au sa loloma vei Apeli sa dauvinakati e na veika i Karisito. Au sa loloma vei ira na lewe ni vale i Arisitopulo. 11Au sa loloma vei Irotioni na wekaqu. Au sa loloma vei ira na lewe ni vale i Narikiso, era sa nona ga na Turaga. 12Au sa loloma vei Taraifina kei Taraifosa, erau daucakacaka e na veika ni Turaga. Au sa loloma vei Perisi sa daulomani, o koya sa daucakacaka vakalevu e na veika ni Turaga. 13Au sa loloma vei Rufu o koya sa digitaki me nona na Turaga, kei na tinana o koya sa tinaqu talega. 14Au sa loloma vei Asinikirito, kei Filekoni, kei Erima, kei Patiropa, kei Erimi, kei ira na veiwekani sa tiko vata kei iratou. 15Au sa loloma vei Filoloko, kei Julia, kei Niriu, kei na ganena, kei Olimipa, kei ira kecega era sa lotu, era sa tiko vata kei iratou. 16Dou ia na loloma vakai kemudou e na veireguci e na yalosavasava. Sa loloma yani vei kemudou na veisoqosoqo lewe ni lotu kecega nei Karisito.
17Ia ka'u sa vakamasuti kemudou, na veiwekani, mo dou kilai ira era sa vakatekivuna na veisei kei na veika e dauveivakatarabetaki, sa sega ni vaka nai vakavuvuli dou sa vakatavulici kina; ia kakua ni veiriti kei ira. 18O ira era sa vakaoqo, era sa sega ni qarava na noda Turaga na Karisito, na ketedra ga; ia e na vosa vinaka ka kamikamica, era sa lawakitaka na lomadra era sa wele. 19Ni sa kuruvaki ki na tamata kecega na nomudou talairawarawa. O koya oqo ka'u sa rekitaki kemudou kina: ia sa yaloqu ga mo dou vuku e na ka vinaka, mo dou kakua talega ni cala e na ka ca. 20Ia na Kalou ni veivakacegui ena butuki Setani vakusarawa e ruku ni yavamudou. Me tiko vei kemudou na loloma ni noda Turaga ko Jisu Karisito. Emeni.
21Sa loloma yani vei kemudou ko Timoci na noqu i tokani, kei Lusiu, kei Jesoni, kei Sosipeta, ko iratou na wekaqu. 22Oi au ko Teritiu, ka vola nai vola oqo, au sa loloma yani vei kemudou e na Turaga. 23Sa loloma yani vei kemudou ko Keio, o koya ka'u sa dautiko e nona vale, kei ira kecega nai soqosoqo lewe ni lotu. O Erasito na dau-ni-yau ni koro oqo sa loloma yani vei kemudou, kei Kuaritu na wekada.
24Me tiko vei kemudou kecega na loloma ni noda Turaga ko Jisu Karisito. Emeni.
25Ia vei koya sa kaukauwa me vakataudeitaki kemudou me vaka na noqu i tukutuku-vinaka, kei na kena vunautaki Jisu Karisito, me vaka ni sa qai vakatakilai mai na ka vuni, sa vuni tu mai na gauna makawa sara, 26ia ka sa qai vakaraitaki mai, ka sa vakatakilai e na nodra i vola na parofita, me vaka na vosa ni Kalou tawa mudu, ki na veivanua kecega me ra vakabauta ka talairawarawa kina: 27io, vua na Kalou sa vuku duaduaga, me ia na vakarokoroko e na vuku i Jisu Karisito, ka sega ni mudu. Emeni.
Trenutno odabrano:
ROMA 16: FOV
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Vakavakadewa Makawa (Fijian Old Version) © Bible Society of the South Pacific