ROMA 12
12
Sa vakatavulici ko ira na tamata lotu me ra soli ira vua na Kalou, 1,2. Me ra yalomalumalumu ka gumatua me ra kitaka na nodra i tavi, 3-8. Me ra veilomani sara vakai ira, me ra lomani ira talega na tamata kecega, 9-21.
1O koya oqo, au sa vakamamasu vei kemudou, na veiwekani, e na vuku ni loloma vakavuqa ni Kalou, mo dou solia na yagomudou mei madrali bula, me savasava, me vinaka vua na Kalou, me nomudou i soro vakayalo. 2Ia dou kakua ni vakatauvatani kemudou kei ira era sa vakavuravura: ia dou mataliataki ga ni sa vakavoui na yalomudou, mo dou kila rawa kina na loma ni Kalou, sa yaga, ka vinaka, ka dodonu sara.
3Ia e na loloma sa soli mai vei au, au sa kaya vei ira na tamata yadua vei kemudou, me kakua e dua me dokai koya me vaka sa sega ni dodonu me dokai koya; me yalomatua ga na nona nanuma, me vaka nai vakarau ni vakabauta sa vota na Kalou vei ira yadua. 4Me vaka sa dua bauga na yagoda, ka vuqa na tikida, ia ka sa sega ni vakaitavi vata na tikida kecega; 5sa vakakina koi keda, na lewe vuqa, eda sa yago vata ni da tu vata kei Karisito, eda sa veitikina vaka talega vakai keda. 6Ni da sa rawata na veisolisoli sa duidui me vaka na loloma sa soli vei keda: kevaka sa parofisai, me da parofisai me vaka nai vakarau ni noda vakabauta; 7se na dauveivota, me da ia na veivota; se ko koya sa dauvakatavuvuli, me vakavuvuli tiko; 8se ko koya sa dauvunau, me vunau tiko; o koya sa ia na dausolisoli, me dina na lomana; o koya sa daulewa, me gumatua kina; o koya sa dauloloma, me ia e na reki.
9Me kakua ni vakailasu na loloma. Mo dou cata sara na ka ca; mo dou kabita sara na ka vinaka. 10Dou veilomani sara e na veilomani ni veitacini; dou veiuasiviti e na veivakarokorokotaki; 11e na gumatua mo dou kakua ni vucesa mai: me katakata na yalomudou; mo dou qarava na Turaga; 12dou reki e nai nuinui; vosota na ka rarawa; ia tikoga na masu: 13veivotayaka vei ira na dravudravua era sa lotu; dauvakacegui ira na vulagi. 14Dou vosavakalougatataki ira era sa vakacacani kemudou: vosavakalougatataka ga, ka kakua ni rukaka. 15Dou reki vata kei ira era sa reki, ka tagi vata kei ira era sa tagi. 16Dou lomavata tiko vakai kemudou. Kakua ni nanuma na veika vakaturaga, ia mo dou veiriti kei ira na tamata lalai. Dou kakua ni vakasami kemudou ni dou sa vuku.
17Kakua ni veisausaumitaka na nona ca e dua. Nakita eliu na veika sa dodonu e na matadra na tamata kecega. 18Kevaka sa rawa, mo dou vakatovolea me veilomani kei ira na tamata kecega. 19Oi kemudou sa lomani dou kakua ni sauma na ca sa caka vei kemudou, ia mo dou laiva vua na Kalou me sauma; ni sa volai; A noqu i tavi me'u cudruvaka; au na sauma koi au, sa kaya na Turaga. 20O koya mo qai vakania na nomu meca, kevaka sa viakana; kevaka sa viagunu, mo vagunuvi koya: ko na binia kina ki na uluna na qilaiso sa waqa tu ni ko sa kitaka vakaoqo. 21Me kakua ni rawai iko na ca, mo rawa ga na ca e na vinaka.
Trenutno odabrano:
ROMA 12: FOV
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Vakavakadewa Makawa (Fijian Old Version) © Bible Society of the South Pacific