मत्ति 4
4
उदादाङका थामेता इसुको जाच
(मरकुस १:१२-१३; लुका ४:१-१३)
1इङकोन्हुअ्सो पुनित हाङसा मासानको राजा साइतानसो#४:१ साइतान जाइहेङ दियाबलस बुङ दोअ्खे। इसुहेङ जाच पालिको भाअ्सिङ उदादाङका थामेता चुमपुहि।#हिब्रु २:१८; ४:१५ 2वा न्हेकुरि दिना रो न्हेकुरि दिलिमाथिकापा म्हितुपाङ हिकान्हुअ्सो म्हितुहि। 3कालाउ साइतान वाकोता लोतेङ दोअ्हि, “ना परमेस्वरको चान हिन्हा पानु इदोइ उन्ठुइगेलाइहेङ तोले जेनाको दोअ्तेङ हुकुम पि।” 4कालाउबुङ इसु दोअ्हि, “धरमकिताबता एसापा लेखिका हि, द्याङ तोलेहोइ खिनिङ माको, कालाउबुङ परमेस्वरको नुइसो ओल्हिका एलोङ एलोङ बचनहोइ सिन्हुखे।”#न्याम ८:३
5कालाउ साइतान वासेहेङ पुनित पुरता चुमपुतेङ थानको तुपाता जाअ्पाहि 6रो वासेहेङ दोअ्हि, “ना परमेस्वरको चान हिना पानु, इतासो लेता धासे हाइदोनु धरमकिताबता इस्का लेखिका हि:
‘वा ताइको स्वरगदुतगेलाइको जिम्माता नासेहेङ प्यावा
रो नाङको खोकोइ माबोखेन्हाको दोअ्तेङ एम्बालाइ नासेहेङ खुर खुरताङ खोअ्तावा।’”#ले ९१:११-१२
7इसु इङकोहेङ दोअ्हि, “लेखिका हि, ‘ना परमप्रभु ताइको परमेस्वरको जाच मापालि।’”#न्याम ६:१६
8आरोङ साइतान इसुहेङ एलोङ हेन्जाङ झाउका आरदाङता चुमपुतेङ दुनियाको गोताङ सारभि रो इङकोको पारताप वासेहेङ तिम्पाहि 9रो वासेहेङ दोअ्हि, “ना तिर्हो थोतेङ कासेहेङ बाखिनन्हा पानु, इदोइ तिङका गोताङ काथागेलाइ का नासेहेङ प्याङका।” 10कालाउ इसु इङकोहेङ दोअ्हि, “साइतान, ना दुरे हाने! हाइदोनु धरमकिताबता लेखिका हि, ‘ना परमप्रभु ताइको परमेस्वरहेङ खिनिङ बाखिन रो वाको खिनिङ सेवा पा।’”#न्याम ६:१३
11कालाउ साइतान इसुहेङ लाअ्तेङ हानिहि रो स्वरगदुतगेलाइ लोतेङ वाको सेवा सुसार पाहि।
इसु गालिलता पारचार पालि तेङका
(मरकुस १:१४-१५; लुका ४:१४-१५)
12युहन्ना थुनाता परिका हि दोअ्का हिङतेङ इसु गालिलभारि हानिहि#मत्ति १४:३; मरकुस ६:१७; लुका ३:१९-२० 13रो वा नासरत लाअ्तेङ कफरनहुम पुरता हानितेङ इन्ता हिलि तेङहि। इदोइ पुर जबुलुन रो नप्तालिको माउजाता गालिल चावान्दिको काम्बेता हिघाहि।#युहन्ना २:१२ 14एसापा परमेस्वर पाहासो धुइका यासाइयाको दोअ्का इदोइ बचन एसापा पोङघाहि:
15“हिङसु, यरदन झोरा ओदोइपार, गालिल चावान्दिको भेरपा जबुलुनको मुलुक रो नप्तालिको मुलुकको द्याङगेलाइ, गालिल माउजाता हिका बोजात्यागेलाइ,
16कितिकितिकाता हिका द्याङगेलाइ एलोङ बारका जोल्का तिङका हि।
सिलिगोइका काथाता थितेङ हिकालाइर्हुता एलोङ जोल्का चिल्काका हि।”#यासाइया ९:१-२
17इङकोङ पहरसो पारचार पातेङ इसु दोअ्लि तेङहि, “पास्ताइसु, हाइदोनु स्वरगको सारभि भेरपाङ लोका हि।”#मत्ति ३:२
इसुको लाङ चात्यागेलाइ
(मरकुस १:१६-२०; लुका ५:१-११)
18एअ्नि गालिल चावान्दिको काम्बेता हिगिल्लाउ इसु पत्रुस दोअ्का सिमोन रो वाको ओने आन्द्रियासेहेङ तिङहि। न्हेमिङ ओनेहेङ चावान्दिता जाले थालतेङहिका तिङहि, हाइदोनु एम्बालाइ गोन्धि हिघाखे। 19इसु एम्बालाइहेङ दोअ्हि, “कासेहेङ पिताइसु, का नेलाइहेङ हाया माको, द्याङगेलाइहेङ काङकोता चुमाका बान्हायाङका।” 20कालाउ ओदोङघरि जाले लाअ्तेङ एम्बालाइ वासेहेङ पिताइहि।
21इन्तासो हानिकाहानिकाताङ वा भेनेङ न्हेमि ओने, याकुब रो युहन्नाहेङ दुसुहि। एम्बालाइ ताइको आबा जब्दियादोफा नाउता योमतेङ ताइको जाले जोदोङघाखे। इसु एम्बालाइहेङ बुङ काइहि। 22कालाउ एम्बालाइ उदोङघरि आबाहेङ नाउताङ लाअ्तेङ वासेहेङ पिताइहि।
इसुहेङ हेन्जाङ द्याङगेलाइ पिताइका
(लुका ६:१७-१९)
23कालाउ इसु एम्बालाइको कचहरिसाअ्गेलाइता धिरपातेङ, स्वरगको सारभिको रेम्काबानाल हिङपातेङ रो द्याङगेलाइता हिका गोताङ खाल्को रोगगेलाइ एल्पातेङ गालिलको गोताङ थामेगेलाइता घुराइगिल्हि।#मत्ति ९:३५; मरकुस १:३९ 24एन्साजेङलाउ वाको मिङ गालिल भेरपा हिका सिरिया मुलुकको गोताङ थामेगेलाइता चारचाराइहि। कालाउ द्याङगेलाइ गोताङ खालको रोगाइका रो बेथासो सान्ताइका मासाअ्धेकालाइहेङ इसुकोता चुमाहि। एम्बालाइता मासान खोअ्का, झाकालोङका रो गाहिलि जेङका हिघाखे। वा एम्बालाइ झाराङहेङ एल्पाहि। 25कालाउ गालिल माउजा, ते पुर दोअ्का डेकापोलिस, यरुसलेम पुर, यहुदिया माउजा रो यरदन झोराको ओदोइपारसो लोका हेन्जाङ द्याङगेलाइ वासेहेङ पिताइहि।
Trenutno odabrano:
मत्ति 4: DHIM
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2025 by Nepal Bible Society and Wycliffe Bible Translators, Inc.
