Zenez 2
2
1Lesiel, later ek tou leres finn fini kre. 2Bondie finn fini tou travay ki li ti ena pou fer, e setiem zour li repoze. 3Bondie beni setiem zour e fer li vinn enn zour spesial parski li finn repoze sa zour la.
4Ala kouma Bondie finn kre lesiel ek later.
Kreasion Zardin Eden
LESEGNER Bondie kre lesiel ek later. 5Me pena okenn plantasion lor later. Okenn lerb pankor pouse dan karo. LESEGNER Bondie pankor fer lapli tonbe, e pena personn pou travay later. 6Me enn lasours dilo sorti depi dan later e aroz sirfas later. 7LESEGNER Bondie pran inpe later e li fasonn enn zom#2:7 An Ebre, zom (adam) sorti dan mem mo ki later (adamah). . Lerla li soufle enn souf lavi dan so narinn, e zom la vinn enn kreatir vivan. 8LESEGNER Bondie plant enn zardin dan Eden ki trouv dan les, e li fer Zom la res laba. 9LESEGNER Bondie fer tou kalite pie fri pouse. Zot zoli pou gete e zot fri bon pou manze. Dan milie zardin la, li plant de pie fri. Enn la donn lavi, e lot la donn konesans#2:9 Literalman, pie lavi ek pie konesans lebien ek lemal..
10Enn larivier ki pran so lasours dan Eden aroz zardin la. Laba, li diviz an kat brans. 11Premie la apel Pisonn, e li antour Pei Avila kot ena lor. 12Dan sa pei la, ena bon kalite lor. Ena osi bann plant parfime ek bann pier-presie#2:12 Ena tradiksion ekrir “Kornalinn,” enn pier presie ki rouz fonse.. 13Deziem larivier la apel Gion e li antour Pei Kous. 14Trwaziem larivier la apel Tig e li koul dan les Asiri. E katriyem larivier la apel Efrat.
15LESEGNER Bondie met zom la dan zardin Eden pou okip li e pou kiltiv li. 16LESEGNER Bondie donn zom la enn lord: “To kapav manz tou fri ki ena dan zardin, 17me zame pa manz fri lor pie ki donn konesans. Zour ki to manz sa fri la, to pou mor.”
18LESEGNER Bondie dir: “Li pa bon ki zom res tousel. Mo pou donn li enn partner pou ed li.” 19Avek lapousier later, LESEGNER Bondie fasonn tou bann zanimo ek tou bann zwazo. Li fer zot tou vinn divan zom la, pou ki li donn sakenn enn nom. Koumsamem, tou bann kreatir vivan finn gagn zot nom. 20Zom la donn enn nom sak zanimo domestik, sak zwazo ek sak zanimo sovaz. Me li pa trouv enn ki kapav ed li kouma enn partner. 21Alor, LESEGNER Bondie fer zom la gagn enn somey lour. Letan li pe dormi, LESEGNER Bondie tir enn kot avek li e referm so laser. 22Avek sa kot la, LESEGNER Bondie form enn fam e li amenn li divan zom la. 23Sann fwa la, zom la dir:
“Asterla wi, ala enn ki ena mo lezo,
ek mo laser.
Mo pou apel li Fam,
parski finn tir li avek Zom#2:23 An Ebre fam dir “ishah” et zom dir “ish”..”
24Ala kifer, enn zom kit lakaz so papa ek so mama pou al viv avek so fam, e toulede vinn kouma enn sel lekor. 25Zom la ek so fam ti touni, me zot pa ti gagn okenn laont.
Trenutno odabrano:
Zenez 2: KMOTPOR
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Kreol Morisien OT Portions © Bible Society of Mauritius, 2020.