DIHA 5
5
Na kalaratu na manggàna-ya na tau iraku
1I MIRI napanii-nya i Muha, 2“Wuanya yiana na pareta na tau Ihirailu: Mbuu ndàbana na tau na panggàna panyaki manula ma-pahanggàmaru, jàka ndia panyaki manda hàmu, jàka ndia na ma-jonggaru mameti, lupangu paluhu-maya bàdi welingu la ngia pa-pamaüngu-na na tau Ihirailu. 3Lupangu-ma paràha-nja pa-yilangu ka àmbu da pa-iraku-ya na ngia pa-pamaüngu, na ngia pa-ndàdiku dànggunya na banjaru-nggu,” wànanya. 4Ka pahàra-danyaka nuna na pareta paraï da tau Ihirailu, mbuu ndàbada da tau tungu nu da-paluhu-ha welingu la ngia pa-pamaüngu-da.
Na huri himbalu runggi
5I MIRI nawua-nyaha i Muha 6da kalaratu yiada nduma tau Ihirailu: Jàka ningu haàtu manda tuturu lai MIRI hi nawunda manjala la tau hawiangu, 7napeka-maka bàdi njalana nuna na tau dàngu ka na-mbayaru ndàba-nyaha da himbalu-na la tau pa-parunggi-na pa-bonjangu dua kambulu la hangahu. 8Na nyuna jàka mbàda meti-naka na tau pa-parunggi-na, tàka hi nda ningui kalembi nditaku-na, wuaha lai MIRI-maka bàdi da pa-mbayaru-na, ka nduma ratuha. Nuna na himbalu-na, nda natama-a la diha na mbimbi bumbu na pawunda wànya na lii podahu njala ndumana nuna na tau na manjala. 9Nggàra biaha da pawotu tau Ihirailu lai MIRI, na hunggu maraku pa-panudangu wàna, nduma-mananya duna na ratu na makeiya nuna na hunggu maraku. 10Nggàra biaya na pawotu-na na haàtu tau lai MIRI, nduma wiki-manaha duna na tau nuna. Jia-aha jàka nggàraha da pawua-na la haàtu ratu, jiaha duda da nduma ratu.
Na kalaratu na mini lei na ma-kapihi-nya na papaha-na
11I MIRI na-paràha-nya i Muha 12-14pawua-ha yiada da kalaratu la tau Ihirailu. Talànga wanguna ningu haàtu mini mapàda-nya ba nda na-tuturu-nya papaha-na. Na-kapihi-nya na papaha-na hi nda na-tuturu pàku aka na papaha-na lai nyuna dàngu hi mbàda pa-iraku bia-naka wikina ba na angungu mini hawiangu. Na nyuna ndedi pàku napii hàmunya nuna paraïna na leina, nadu ba nawunda kangunduhu-ya nuna paraïna papaha-na; nda ningua hakahii, tàka nda patoma pa-haràda-mbunya. Jàka ndia na haàtu mini lei talànga wanguna na-kapihi-nya na papaha-na bundu nda hiliru-na duna na papaha-na. 15La madua ngiada nu da matungu nu lupangu-ma na tau nuna nalua ngàndiya la ratu na papaha-na. Lupangu nangàndi-mbu hunggu maraku pawàngu, nu, hau kilu kanguta uhu nggàndumu. Nuna na kanguta àmbu buri dunya mina haitungu jàka ndia àmbu tuu-dunya dupa, nadu ba maraku welingu la haàtu mini lei ma-kapihi-ya, dàngu ka jiaya na tanda ba kapihi-nanya na papaha-na paraïna nu na mini lei.
16Lupangu-ma na ratu na-paràha-nya nuna na kawini la hangga ngia pawotu maraku ka na-ndolaku hangganya i MIRI. 17Tunaka nu napiti hau maku tana nuna na ratu, hi naburi-nya hakudu wai pa-pahinggilu. Hàlaka nu lupangu-ma napiti tana hakudu welingu daa la Maüna i MIRI, hi natuya daa la wai. 18Tunaka nu lupangu-ma ka wàlahu-ya na lunggina na kawini, tàka hi tuya la limana na kanguta hunggu maraku ruku kapihi, tàka na ratu nakita wikinya na wai paita na maparuu-nya na ràtungu. 19Hàlaka nu lupangu-ma natiki hau harangu na ratu hi na karaiya na kawini ka napajia-ya nu na harangu. Lupangu napanii na ratu, “Jàka ndau njuraku nda nanggàna-akau harangu na paparuu-na yiana na wai. 20Tàka na nyuna jàka mbàda njuraku-muka, 21màla àruki i MIRI ka natuya pa-ràtungu wàngu na tamumu la honga banjaru-mu. Màla àruki i MIRI ka na-pakawinja-ya na pa-kawini wàmu dàngu ka na-hapunju na kambumu. 22Yia na wai na maparuu-nya na ràtungu napa natama la kambumu ka na-pahapunju-ya dàngu ka na-pakawinja-ya na pa-kawini wàmu,” wànanya.
Lupangu nahema na kawini, “Jiaya; màla àruki ka tunangga nu i MIRI,” ka wàna.
23Tunaka nu lupangu na-tulihu-ya nu na ràtungu paraïna ratu, ka namangu pa-podahu wànya na wai paita. 24Na ratu na-paràha-nya na kawini paunu-nya na wai paita na maparuu-nya na ràtungu. Jàka ununya, na-pawitingu pa-katiu nuna na wai, 25lupangu-ma napiti-ya nu na kanguta hunggu maraku paraïna na ratu, hi na-pajola-nya la hangga-na i MIRI, hàla hi nangàndi-ya la ngia pawotu maraku. 26Hàlaka nu lupangu napiti haupu kanguta ka jiaya na tanda ba pawotu ndàba-yaka nuna na kanguta, hi natunu-ya la pinu ngia pawotu maraku. La hupu njàpuna na-paunu-nya na wai na kawini. 27Ngera hama tuna jàka mbàda njuraku-naka nuna na kawini, nuna na wai na-pawiti-nya pa-katiu dira matiki; na-hapunju na kambuna dàngu na-kawinja na pa-kawini wàna. Na tamuna jiaya na pa-ràtungu wàngu la honga banjaru-na. 28Na nyuna ngera hama tuna jàka nda nanjala, nda jia nggàna-ananya ràtungu dàngu peku-manapa pa-habolangu anana.
29-30Tuna nu na kalaratu jàka nawuhu na haàtu mini lei dàngu na-kapihi-nya na papaha-na, làbu na-hiliru biaka dàngu hi na-pakajari wikina jàka wàna. Nuna na mini lupangu-ma na-paràha-nya na papaha-na pa-ndolaku la hanggana i MIRI tàka na ratu lupangu-ma nanunju-ya na kalaratu nuna la kawini. 31Nuna na mini lei namara welingu la njala, na nyuna na papaha-na, jàka bundu njalana padua, lupangu-ma naita-ya na injana.
Trenutno odabrano:
DIHA 5: KAM
Istaknuto
Kopiraj
Usporedi
Podijeli
Želiš li svoje istaknute stihove spremiti na sve svoje uređaje? Prijavi se ili registriraj
@LAI 1995 Indonesian Bible Society (Lembaga Alkitab Indonesia)