DIHA 20
20
Da matumbu la Kandihu
(Lu. 17:1-7)
1La wulangu kawunga-na tàka-nanyaka nggubulu-na na banjaru Ihirailu la maràda telangu Njingu hi da-padaingu la Kandihu. Lai nu nameti i Miriyàmu hi taninya.
2La hau rehi nda ningua wai la ngia pa-pamaüngu, ka mai-danyaka nuda da tau pa-langgungguru-nja i Muha dàngu i Harungu 3ba dàngu hoputu-da dapanii, “Na hàmu-kipa làti jàka mbàda meti karia-manja da angu dedima la hanggana i MIRI! 4Ka nggikina hi ikaria-nggama la maràda telangu yiana? Jia-yaka ihu ka mameti karia-nja da bandama lai yiahu? 5Nggàra-yaka na linguna bai paluhu-kama welingu la Mehiru hi ingandi-kama lai yiahu la pangia mayila na manda peku la patondu-nya ngga - nggàra? Lai yiahu nda ningua uhu nggàndumu, nda ningu pingi kapilitu nda ningu angguru, dàngu nda ningua njalima. Jiapa wai pa-unungu-a nda ningumbu!” wàda. 6Dalaku maraunja nuda da tau nyuda i Muha dàngu i Harungu, hi da-ndolaku la hangga pindu Maüna i MIRI. Da marubuku lai nu tàka na handaraku ba ninya i MIRI nahambilanja nyuda.
7Panii-nanyaka i MIRI lai Muha, 8“Pitiya na tokungu na maninya la hangga Pàti Paràndingu, hàla, lupangu-ma nyumu dàngu i Harungu kai pauhi-nya nggubulu-na na banjaru. Màtawa la hanggada nyuda kau panii dànya na tandula watu lai nu, ka na-patapanjirungu wai. Tuna nu na pawàngu bau paluhu-ya na wai welingu la tandula watu nuna, ka peku unungu-na na rayatu dàngu da bandada nyuda,” wàna. 9Ka lua-nanyaka i Muha papiti-ya nuna na tokungu hama tuna na papanii-na i MIRI la hupu liina.
10Hàla, nyuna i Muha dàngu i Harungu da-pauhi-nya na banjaru la hanggana nu na tandula watu. Hi napanii i Muha, “Pa-tingingu, ha dimi banjaru patula ngganggangu! Welingu la tandula watu yiana-ka bàdi ba ma-paluhu-nggai wai?” wàna. 11Ka wulaku-nanyaka nu na tokungu i Muha hi napalu wànya na tandula watu lupa na pandua wundangu. Ka tapanjiru-nanyaka na wai ba dàngu mbangatu-na, hi peku unungu ndàbana na tau dàngu da banda.
12Na nyuna i MIRI natenda-nja i Muha dàngu i Harungu, “Rukuna ba ndai wai hàmuka la pa-paloha-nya, na kawaha matua-nggu la hangga banjaru Ihirailu, nda jia kapipi-aminja nyuda patama la tana pambàda njanjinggunja,” wàna.
13Nuna mata wai Marimba#Marimba: Yiana na tamu la hilu Imbarani “panii hoputu,” wàna.-ya. Lai nuduka ba da-hoputu-nya i MIRI da tau Ihirailu, dàngu lai numbu, na paloha-nya na kawaha matua-na i MIRI la banjaru nuna.
Na hanganji Endumu nda na-pahia-nya na banjaru Ihirailu palii ningu la tanana
14Tunaka nu welingu la Kandihu na-paràha-nja da papalewa i Muha ka dalua la hanggana na maràmba Endumu. Dapanii nyuda, “Nyuma welima la kabihu - kabihu Ihirailu na ma-pakalembingu-mapa dàngu nyunu Umbu. Upii-manya Umbu na handuka na mambàda nggàna-kama nyuma. 15Da boku la mangilu-ma dalua la Mehiru hi da-ndàdiku lai nu dira dangu ndaungu mandaina. Manda hàmuya ba da-paluangu limada, na banjaru Mehiru hanggangu la boku la mangilu-ma dàngu lai nyuma, 16tàka nyuma hi mawara-nya i MIRI pakarai pa-ndulangu. Natingi-ya na warama hi na-palewa-nggama haàtu papalewa. Nuna na papalewa na-kapipi-kama paluhu welingu la tana Mehiru. Nàhu ningga-maka la Kandihu, nu na hau paraingu la padira ngaba tanamu nyumu Umbu. 17Ma kamahi-nggau Umbu kau pahia-ki-nggama làti ka malii ningu la tana yiana. Nyuma dàngu da bandama nda jia hiliru-ama duma welingu la ànda, dàngu nda jia tama-ama duma la wo - woka, jàka ndia la wo - woka angguru. Nda jia unungu-ama la hu - humuru-mu nyumu Umbu. La tana pahàka mànuma-kama duma napa malii ningu lundu maluhu welingu la tana ngabamu nyumu Umbu,” wàda.
18Na nyuna dahema da tau Endumu, “Nda mabihu-a duma pa-pahia-nggai nyimi palii ningu la tana ngabama nyuma. Jàka patidungu-maminya, napa maluhu pahada-nggai!” wàda.
19Dapanii da tau Ihirailu, “Napa malii ningu la tana pahàka-ma duma, tàka ngera hama tuna nyuma jàka ndia da banda-makai maunu-nja da waimi, ma-mbayaru-ma duma napa. Mbuhangu-manya palii ningua duma,” wàda.
20Dahili panii da tau Endumu, “Màtangu!” wàda. Ka luhu-danyaka nyuda dàngu tanatara ma-kapingatu pahada-nya na banjaru Ihirailu. 21Ka beli-danyaka da tau Ihirailu hi dahimbu ànda hau ba nda da-pahia-nja tau Endumu palii ningu la ngaba tanada nyuda.
Ba nameti i Harungu
22Nggubulu-na na banjaru Ihirailu da-dunjaku-nya na Kandihu hi datàka la Palindi Hòru, 23la padira Endumu. Lai nu napanii i MIRI lai Muha dàngu i Harungu, 24“Nda jia tama-ananya i Harungu na tana pambàda njanji-nggunya na banjaru Ihirailu; napa nameti rukuna bai ndubaku-ya na hupu liinggu la Marimba, nyimi pa-kadua-mi. 25Hei karia-nyawa la Palindi Hòru i Harungu dàngu i Eliahàru na anana. 26Kau kalàba-ha lai nu da pakina i Harungu kau pakàna-nja lai Eliahàru. Napa nameti lai nu i Harungu,” wàna. 27Ka pahàra-nanyaka na paniina i MIRI i Muha la hupu liina. Hei-danyaka la Palindi Hòru i Muha, i Harungu dàngu i Eliahàru ba dàngu ita-danja paraï banjaru Ihirailu nggubulu-na. 28Hàla, kalàba-nahaka da pakina i Harungu paraïna i Muha hi na-pakàna-nja lai Eliahàru. La pinu palindi nuna-duka nameti ningu i Harungu, ka puru beli-danyaka i Muha dàngu i Eliahàru. 29Rongu ndàba-nanyaka na banjaru ba mbàda meti-naka i Harungu, hi da wai mata wai wiranya tailu kambulu lodu mandaina.
Trenutno odabrano:
DIHA 20: KAM
Istaknuto
Kopiraj
Usporedi
Podijeli
Želiš li svoje istaknute stihove spremiti na sve svoje uređaje? Prijavi se ili registriraj
@LAI 1995 Indonesian Bible Society (Lembaga Alkitab Indonesia)