PARATU 20
20
Na hukungu-na na tau manda manundu
1I MIRI na-paràha-nya i Muha 2papeka-ya yiana la banjaru Ihirailu, “Nimbihu-na na tau la hongami nyimi jàka ndiakai na tau nàmu ma-ngiangu la hongami nyimi na mahunggu maraku wànya na anana la Moluku, lupangu-ma nàhaku-nya watu lundu nameti paraï nggubulu-na na madangu. 3Na tau na mahunggu maraku wàngu anana la Moluku, pa-iraku-nanya na Maünggu dàngu pawawa-nanya na tamunggu na ma-matua. Napa kuhuku-nya dàngu nda kureki-ayapa ba anggota banjaru-nggunya. 4Jàka namàta bianya paraïna madangu na pawunda-na na tau nuna dàngu ba nda dahuku pameti-ya nyuna, 5napa Nyungga wiki-maka duku mahuku-nya nyuna, nggubulu-na naihi kuru umana, dàngu mbuu ndàbana na tau na makiku-nya la pa-dunjaku-ngga Nyungga tàka hi da-marubuku la Moluku. Nyuda nda kureki-ahapa ba anggota banjaru-nggunja.
6Na tau na malua pa-paàrangu pawàngu la tau na ma-panua dànja da ndewa tau meti, napa kuhuku-nya dàngu nda kureki-ayapa ba anggota banjaru-nggunya. 7Manggangu ka peku pa-daingu-mi la pa-matua, nadu ba Nyungga yia MIRI Alami. 8Nunju-maha da ukunggu, nadu Nyungga yia MIRI, ma-pahinggilu-kai nyimi ndumanggu Nyungga,” wàna.
9I MIRI na-wuangu-ha da kalaratu yiada, “Na tau na ma-ràtungu amana jàka ndia inana lupangu-ma huku pameti-ya. Ruku panjala wiki-mana duna hi nameti.
10Jàka ningu tau Ihirailu ma-njuraku dàngu papaha angu banjaru-na, nyuna dàngu nuna na kawini, lupangu-ma huku pameti-ha. 11Na haàtu na tau mini na ma-katuda angunya na haàtu na papaha-na na amana, rumbaku-nanya na hàku amana. Na mini dàngu nuna na kawini lupangu-ma huku pameti-ha. Ruku panjala wiki-mada duda hi dameti. 12Jàka ningu haàtu mini ma-katuda angunya na rii anana, nyuda nuda da tau madua lupangu-ma huku pameti-ha. Nyuda ba njuraku-danya, dàngu ruku njala wiki-mada hi dameti. 13Jàka ningu haàtu mini ma-katuda angunya na anguna pamini haàtu, nyuda pakadua-da wunda-danya pawunda pa-makinahungu dàngu maànga, lupangu-ma huku pameti-ha. Ruku njala wiki-mada hi dameti. 14Jàka ningu haàtu tau mini ma-kanoma-ya na haàtu tau kawini dàngu na ina-mbuna nyuda pa-kadua haàtu-da lupangu-ma tunuha lundu dameti, nadu ba dawunda-ya na manda pa-ràkangu. Na matuna nu àmbu ningudu la hongami nyimi. 15Jàka ningu haàtu tau mini ma-papohungu dàngu banda, na tau dàngu nuna na banda lupangu-ma pameti-ha. 16Jàka ningu haàtu tau kawini ma-papohungu dàngu banda na kawini dàngu nuna na banda, lupangu-ma pameti-ha. Ruku njala wiki-mada duda hi dameti.
17Jàka ningu haàtu tau mini ma-katuda angunya na anawini-na jàka ndia na anawini angu amana hau ina jàka ndia angu inana hau ama, nda pareki-ahapa ba anggota banjaru-nggunja. Mbàda wunda-daka pawunda manda pa-ràkangu dàngu lupangu-ma daita-ya na injana. 18Jàka ningu haàtu tau mini ma-katuda angunya na haàtu tau kawini na ma-talànga tàka-nanya ariyaa-na, nyuda pa-kadua-da nda pareki-ahapa ba anggota banjaru-nggunja.
19Jàka ningu haàtu tau mini ma-katuda angunya na anguna kawini na inana jàka ndia na anawini amana, nyuda ba dadua lupangu daita-maya na injana rukuna nuna na papanggada. 20Jàka ningu haàtu tau mini ma-katuda angunya na papaha anguna paluhu ama, pawawa-nanya nu na anguna paluhu ama. Nuna na tau dàngu na kawini lupangu-ma da-hambeta-ya na hukungu. Lupa metida nda da-ngalangu-a anada. 21Jàka ningu haàtu tau mini mawàhi-ya na papaha anguna paluhu, pawawa-nanya na anguna paluhu dàngu wunda-nanya pawunda manda pa-ràkangu. Lupa metida nda da-ngalangu-a anada,” wàna.
22I MIRI napanii, “Nunju-maha mbuu ndàbada da uku dàngu da pareta-nggu, ka àmbu wànggakai welingu la tana Kanaàngu na ngia palaku ngàndi-nggunggai. 23Àmbi kiku-dunya na huri lawiti-na na banjaru na ma-ngiangu lai nu. Da-palabu-ya na etinggu wàngu mbuu ndàba pawunda akatu. Nuya na pakiri-na hi kuwàngga-ha, ka peku tamami nyimi la tana nuna. 24Mbàda ràndinggunggainyaka nuna na tana wulu na makamboka, jia-duya hi kuwua-nggainya kai mangunya.
Nyunggaka MIRI Alami ma-kahika-kai nyimi welingu la ba - banjaru hawiangu. 25Jiaya ba tuna lupangu-maka bàdi kai paheka padeni-nja da banda da manda hida dàngu da mahida. Àmbi ngangudu banda manda hida. Nuna na banda manda hidaya wànggu. Jia ba tuna jàkai nganya iraku-dimi-nyaka. 26Nyimi ku-kahika-kai welingu la banjaru hawiangu, ka kumangu-nggai. Lupangu-ma bàdi kai matua, nadu Nyungga yia MIRI-ka, dàngu ku-matua.
27Nimbihu-na na tau mini jàka ndia ka kawini-yakai, na ma-panua dànja da ndewa tau meti lupangu-ma nàhaku-nja watu lupa dameti. Ruku njala wiki-mada duda da tau nuda hi dameti,” wàna.
Trenutno odabrano:
PARATU 20: KAM
Istaknuto
Kopiraj
Usporedi
Podijeli
Želiš li svoje istaknute stihove spremiti na sve svoje uređaje? Prijavi se ili registriraj
@LAI 1995 Indonesian Bible Society (Lembaga Alkitab Indonesia)