Vikolwa 22
22
1Avamitu navadada, mu huliridze litivula lyange lya mmu tivulira kalunu.
2Lwa va hulira a vola mu lulimi lwa Vahebraina, va kiring'ana ligali: na a vola.
3Inze mbeye Muyuda, ndivulwa mu Tariso lya Kilikia, navutswa nda virukira mu lidala yili, ni nzegidzwa ha virenge vya Gamalieli, mu miima gyeligali gyavaguga vetu, nda li nobugulu muno ku Nyasaye, kuli mwinye vosi lero. 4Na inze nda dambidza avandu re Nzira yiyi va duke ku likudza, ni mba boha, ni mba vika mu inyumba yavahambe, avasatsa navakali. 5Kuli musalisi munene kandi a ndolekidza ndiyo, na kyina kyosi kyavakulundu: ava nda vugula kuvo tsibaruwa tsyokuhilira avamitu, ni ntsia Damasko kuleta yavo ava veye yo va duke Yerusalemi va boheywi va hebwe amageli. 6Kunangwa lwa nda li ni nzidzanga himbi Damasko, yenya kuduka mbasu hagati, nonoho bwangu ubulavu bunene bwa twula mu ligulu ni bu ng'ereng'ana ku tsimbega tsyange tsyosi. 7Kandi nda gwa hasi ni mbulira mwoyo ni gu mbolera, Saulo, Saulo, kigira ki u ndambidza? 8Kandi nda tivula, U veye ibwaha, Mwami? Kandi ya mbolera, Inze ni Yesu wa Nazareti wa ive u dambidza. 9Navo ava li halala ninze va lola bulavu yibwo navutswa si va hulira mwoyo gwa uyu a volerana ninze. 10Na inze nda vola, Nkola ki, Mwami? Kandi Mwami ya mbolera, Vuka, u tsie Damasko; u la volerwa yo amakuva gevindu vyosi aga lagwa u kole. 11Lwa nda vula kulola kigira tsingulu tsyobulavu yibwo, ava li halala ninze va nzimirira va ngumira mukono, ni nzingira Damasko. 12Kandi mulala u la ngwa Anania, wa tia Nyasaye kuli lilaga, wa Vayuda vosi va menya yo, va lolekidza kuva mulahi, 13yadza ku inze na a singira himbi ninze na a mbolera, Saulo Amitu, lola. Na inze nda mu henza netsimoni tsyange isaa zana yeyo. 14Kandi ya vola, Nyasaye wavaguga vetu u mali kukutovola u duke kumanya ubulaliri bwibwe, nokulola Mulungi, nokuhulira mwoyo gu twula mmunwa gwigwe. 15Kigira u la va mulolekidzi wewe ku vandu vosi wevindu yivyo vya wa lola na vya wa hulira. 16Kalunu u linda ki? Singira u batidzwe, wisinge ubwoni bubwo, wanire lieta lilye. 17Lwa nda li ni mmali kwirana Yerusalemi, kandi lwa nda li ni nsaala mu litempeli, nda girunkana mu mwoyo, 18kandi nda mu lola na a mbolera, Bwangu, u twule mu Yerusalemi tsimbiru kigira si va li vugula lilolekidza lilyo ku inze. 19Na inze nda vola, Mwami, avene va manya inze nda boha ava suuvira ive, mu inyumba yavahambe kandi nda va kuya mu masomero gosi: 20kandi amasahi ga Stefano mulolekidzi wowo, lwa ga sundulwa, inze nda singira navo, ni mbugirira, ni ninda tsingubo tsya yavo ava mwiita. 21Navutswa ya mbolera, Tsia: kigira nda ku tuma u tsie hale kuduka ku Tsihiri.
22Kandi va huliridza kuduka ku likuva yilyo; ma va ginga myoyo gyavo ni va vola, Twulidza uyu mu lirova: si bu li bulahi a ve mwoyo. 23Lwa va hanzuka ni va ta tsingubo tsyavo ni va duminya lugukyi, 24munyampara munene ya haana munwa a letwe mu lugaga lwavasikari, na a va ha munwa kumuteva nelikuya, a duke kumanya kya va mu kolera liyoga ndi. 25Navutswa lwa va mali kumuboha netsinkova, Paulo ya teva munyampara wavasikari wa singira himbi, Nu mwima gwenyu kukuya mundu Muromi na a kikiri kukalagirwa ubwoni? 26Munyampara lwa ya hulira yaga, ya tsia hu munyampara munene na a mu volera, U lenya kukola ki? Kigira mundu uyu a veye Muromi. 27Munyampara munene yadza na a mu volera, U mbolere, hene u veye Muromi? Naye ya vola, Yee. 28Munyampara munene ya tivula, Inze nda nyola Luromi yilu ni vindu vinyingi. Kandi Paulo ya yola, Navutswa inze ndivulwa Muromi. 29Hene yaho yavo avenya kumuteva va mweleha ni va mu leka nonoho: kandi munyampara munene, lwa ya manya a veye Muromi, ya tia, kigira ya mu boha.
30Navutswa mugamba, yenya kumanya ligali kya Vayuda venya kumuyalira, ya mu boholola, na a laga avasalisi vanene nekyina kyosi, kuvugana, ya leta Paulo na a mu vika imbiri wavo.
वर्तमान में चयनित:
Vikolwa 22: MBE
हाइलाइट
शेयर
तुलना
कॉपी
Want to have your highlights saved across all your devices? Sign up or sign in
©Bible Society of Kenya, 1967
