Vikolwa 21
21
1Lwa kwa mala kwavukana navo nokunina mu bwato, kwa duka Koos, ku inzira inungi, na mugamba ku a duka Rodo, kandi kutwula yaho kua duka Patara. 2Lwa kwa nyola bwato bwa tsia Foinike, kwa nina, ni ku tsia. 3Lwa kwa lola Kuporo kwa ki leka ku mukono mmosi, ni ku tsia Siria, ni kwikira Turo; kigira bwato bwenya kutwulidza yo vindu. 4Kandi lwa kwa mala kunyola avegidzwi, kwa menya yo madiku gatanu na gaviri: navo va volera Paulo ku tsingulu tsya Roho a tingira Yerusalemi. 5Kandi lwa kwa mala madiku, kwa twula ni ku tsia ulugendo lwetu; navo vosi halala navakali navana vavo, va ku hereka kali kuduka kyova welidala: ni ku sigama ku luginga ni ku saala ni ku siivulana; 6kwinye kwa nina mu bwato navutswa navo virana wavo.
7Lwa kwa mala ulugendo lwokutwula Turo, kwa duka Petolemai; ni ku chelidza avamitu ni ku gona navo lidiku lilala. 8Kandi mugamba kwa tsia ni ku duka Kaisaria: ni kwingira mu inyumba ya Filipu wa li mwilwadzi, mulala ku vandu vatanu na vaviri, ni ku menya naye. 9Mundu uyu ya li navana avakana vane avagima ava profetanga. 10Lwa kwa menya yo madiku ga duki, muprofeti mulala wa langwa Agabo ya sulunguta kutwula Buyuda. 11Yadza ku kwinye na a vugula musipi gwa Paulo ni yeboha virenge vivye namakono, na a vola, Ni ndiyo Roho Mutakatifu a vola, Ni ndiyo Avayuda ve Yerusalemi va la ka bohe mundu mwene musipi vigu, ni va mu vika mu makono ge rsihiri. 12Lwa kwa hulira vinlu yivi, kwinye, nava ha zana yaho iwa mu goonya a ta tsia Yerusalemi. 13Hene yaho Paulo ya tivula, Mu kola ki kulira nokwononya mwoyo gwange? Kigira inze si nzetegeki kubofwa kweng'ine, navutswa kali kwiitwa mu Yerusalemi kigira lieta lyo Mwami Yesu. 14Lwa ya sula i kugirunkanywa kwa mu leka ni ku vola, Ubulaliri bwo, Mwami bu kolwe.
15Inyima ya madiku yago kwa vugula vigyu vyetu ni kwanegira Yerusalemi. 16Aralala ku vegidzwi va Kaisaria va tsia halala na kwinye, va leta Mnasoni mundu wa Kuporo, mwegidzwi wa kale wa ku li menya naye.
17Lwa kwa duka Yerusalemi avamitu va kwingiridza nobuyanzi. 18Mugamba Paulo ya tsia ku Yakobo halala na kwinye; kandi avakulundu vosi va li ho. 19Lwa ya mala kuvachelidza, ya va volera vindu vyosi sekilala vya Nyasaye ya kola ku Tsihiri nobutumekiri bwibwe. 20Navo lwa va hulira, vidzominya Nyasaye; ni va mu volera, Ive amitu, u lola va veye ho tsielfu netsielfu ku Vayuda kuvo ava mala kusuuvira; navo vosi va veye nobugulu kugumira lilaga 21kandi yava va mala kuvolerwa amakuva gogo, ive wegidza Avayuda vosi ava menya mu Tsihiri va leke Musa, nu u va volera va ta keva vana vavo, kandi va ta londa miima. 22Ku, ni kindu ki? Va la hulira ligali ive udzi. 23Kunangwa u kole yaga aga kwinye ku ku laga: ku veye navandu avasatsa vane ava mali kweyama; 24u hile yava wetakase halala navo u va tungire, va duke kuvega mitwe gyavo: na vosi va la duka kumanya amakuva gosi aga va volerwa ku ive si ga veye geligali, navutswa ive mwene u gendanga bulahi kandi u londa lilaga. 25Navutswa ku vandu ve Tsihiri ava suuvira, kwa laga kandi kwa haana munwa va yere vindu vi salisirangwa misambwa, kandi va yere masahi, kandi kindu ki migangwa, kandi va ta kola ubuheyi. 26Kunangwa Paulo ya hila avasatsa yava, na mugamba yetakasa halala navo ni yingira mu litempeli; na a vuula madiku gokutakasa ga duki, kuduka inyinga tsisadaka tsi leterwa vosi.
27Lwa madiku yaga gatanu na gaviri genya kuduka, Avayuda va Asia, lwa va lola Paulo mu litempeli, va gema kiduma kyosi ni va mu gumira 28ni va hanzuka ni va vola, Avasatsa va Israeli, mu ku konye: Uyu nu mundu u gemehidza avandu vosi mu vivala vyosi ku ihiri yetu noku lilaga noku hano; na kandi u mali kuleta Avagreki mu litempeli, kandi u maii kwononnya hatakatifu hano. 29Kigira va mali kumulola mu lidala halala na Terofimo Muefeso, wa va ganagana Paulo u mu leti mu litempeli. 30Lidala lyosi lya vukidzwa, navandu va vugana bwangu; ni va gumira Paulo ni va mu ng'usa ni va mu twulidza mu litempeli: kandi nonoho viliango vya hanwa. 31Kandi lwa venya kumwiita, amakuva ga dukira munyampara munene womugaanda, lidala lyosi lye Yerusalemi li koli kivihiri. 32Nonoho ya vugula ava sikari navanyampara ni yika bwangu kuvo: navo lwa va lola munyampara munene navasikari, va leka kukuya Paulo. 33Hene yaho munyampara munene yisunda ahimbi na a mu gumira, na a haana munwa a bofwe neminyororo gyiviri; kandi ya teva uyu ni bwaha? Kandi a kola ki? 34Avalala ku kiduma va vola lugano navandi lugano: ku, lwa ya vula kunyala kumanya geligali kigira livoga, ya haana munwa a hilwe mu iugaga lwavasikari. 35Lwa va duka ku vikaa, avasikari va mu ginga kigira tsingulu tsyekiduma; 36kigira kiduma kyavandu kya londa ni ki hanzuka ni ki vola, Mu twulidze uyu.
37Paulo lwa yenya kuvikwa mu lugaga lwavasikari, va volera munyampara munene, Mbeye nomunwa kukuvolera likuva? Naye ya mu teva, Ive u manvi Lugreki? 38Ive si u veye Muegepeti, wa kola tsi mbemba tsyavandu Avalumindi tsielfu tsine imbiri wamadiku yaga, nu u va hila mwigendanyama? 39Navutswa Paulo ya tivula, Inze mbeye mundu wa Tariso lidala lya Kilikia, mundu welidala li ta li lidamanonku goonya, u mpe munwa nzilwadzire avandu yava. 40Lwa ya mala kumuha munwa, Paulo ya manya na a singira ku vikaa na a sima avandu nomukono; likiring'ana linene lwa lya kolwa, ya vilwadzira mu lulimi lwa Vahebraina, na a vola.
वर्तमान में चयनित:
Vikolwa 21: MBE
हाइलाइट
शेयर
तुलना
कॉपी
Want to have your highlights saved across all your devices? Sign up or sign in
©Bible Society of Kenya, 1967
