2 കൊരിന്ത്യക്കാറാര് 5
5
അള്യാത്ത കൂരെ
1ഈ ഉലഗാത്തില്യ കൂരേന പാസെ ഉള്ള എമ്മ് സരിഗല അളിന്ത് പോനാല്‌മ് സാമി കയ്യിലി ഉണ്ടാക്കിനാദ്‌മ് എപ്പേക്ക്‌മ് അളിന്ത് പോഗാത്താദ്‌മാന ഒരു കൂരെ എമാക്ക് മേലോഗാത്തിലി ഇര്‌ക്ക്‌ദ് എന്ത് എമാക്ക് തെര്യു. 2ഇപ്പ് ഇര്‌ക്ക ഈ സരിഗലാത്തിലി എമ്മ മുക്കിമൊരേന്ത് കൊണ്ട് ഇര്‌ന്താല്‌മ് മേലോഗാത്തില്യ സരിഗല കെ്ഡേസ്യ ബേ്ണ്ടി എമ്മ റമ്പ ആസെപഡ്‌റേര്. 3അയ്യി സരിഗല എമാക്ക് കെ്ഡേക്കാട്ടി എമ്മ ബെ്റ് ണിഗാല് താനേമല്ല മേലോഗാത്തില്യ സരിഗല ഉള്ളവാരായി താനെ ഇര്‌ക്കുവേര്. 4ഈ ഉലഗാത്തില്യ സരിഗലാത്തിലി എമ്മ ഇര്‌ക്കാട്ടി അര്‌ക്കപട്ട് മുക്കിമൊരേന്ത് കൊണ്ടെ ഇര്‌ക്കേര്. ആന എമ്മ ഇര്‌ക്ക ഈ സരിഗലണ ഇല്ലാദെ ആക്ക്യ അല്ല, അദ്‌ക്ക് ബദ്‌ള് സാമി തര സരിഗലണ ഒരു ഉഡുപ്പിക്ക്‌റ പാസെ ഇക്ക്യാത്തെ എമ്മ ആസെപഡ്‌റാദ്. അച്ചെ അളിവില്ലാത്ത ഉജുറുണ ഇക്ക്യാത്തെ എമ്മ ആസെപഡ്‌റാദ്. 5സാമിത്തെ ഇദ്‌ക്ക് ബേ്ണ്ടി എമാണ ഒരിക്കി എ്ഡ്‌ത്താദ്. അയ്യി സാമി അദ്‌ണ എമാക്ക് ബേ്ണ്ടി സെയ്‌ദ് തരുവാ് എങ്ക ഒറേപ്പ്‌ക്ക് തന്ന് ണിഗാല്‌ണ എമാക്ക് തന്തിര്‌ക്കാ്.
6അദ്‌ണാലെ എമ്മ എപ്പ്‌മ് ഒറേപ്പുള്ളവാര് ആയിര്‌ക്കേര്. ഈ സരിഗലാത്തിലി ഇര്‌ക്ക കാല മുച്ചുഡാമ് എമ്മ ആണ്ടവാനോഡെ ഇര്‌ന്ത് ദൂര ഇര്‌ക്കേര് എന്ത് എമാക്ക് തെര്യു. 7ആണ്ടവാ് എമാക്ക് പുദ്യ ഒരു സരിഗല തരുവാ് എങ്ക ണമ്പിക്കോഡെത്തെ എമ്മ പെ്ളേക്കാദ് അല്ലാദെ കണ്ണിലി കാണ്‌റ കാര്യഗണ ണോഡികൊണ്ടല്ല. 8ഇച്ചെ ദയ്യിരപട്ട് ഈ സരിഗലണ ബ്‌ട്ട് ആണ്ടവാന്‌ദൊപ്പ ഇര്‌ക്ക്യ എമ്മ റമ്പ ആസെപഡ്‌റേര്. 9അദ്‌ണാലെ എമ്മ ഈ സരിഗലാത്തിലി ഇര്‌ന്താല്‌മ് സെരി ആണ്ടവാനോഡെ ഇര്‌ന്താല്‌മ് സെരി എമ്മ സെയ്‌ര എല്ല കാര്യാത്തിലിമ് ആണ്ടവാന പിര്യപഡ്‌റാദ്‌ത്തെ എമാക്ക് മുക്ക്യമാന കാര്യ. 10എന്ത്‌ക്കെന്റ ണമ്മ ഒരൊരു ആള്‌ഗാമ് സരിഗലാത്തിലി ഇര്‌ക്കാട്ടി സെയ്‌ദാദ് കെ്ട്ടാദ് ആനാല്‌മ് സെരി ണല്ലാദ് ആനാല്‌മ് സെരി അദ്‌ക്ക് തഗ്‌ന്ത കൂലി കെ്ഡേക്കു. അദ്‌ക്ക് ബേ്ണ്ടി ണമ്മ എല്ലാര്‌മ് ക്‌റ്‌സ്‌ത്ത് ണായ ബിദിക്ക പട്ട്‌ക്ക് പോയി ണിന്റെ പറ്റു.
ക്‌റ്‌സ്‌ത്ത്‌ദ് സീവാ്
11അദ്‌ണാലെ എമ്മ ആണ്ടവാന അഞ്ചി ബക്‌ദ്യുള്ളവരായി ഇര്‌ക്കേര് എന്ത് എമാക്ക് തെരിരാദ്‌ണാലെ അഡ്‌ത്തവാര്‌ണാമ് ബക്‌ദ്യുള്ളവാര് ആക്ക്യ എമ്മ ഓരാഡ്‌റേര്. എമ്മ എച്ച്‌ള ആള്‌ഗ എന്ത് സാമിക്ക് ണലമായി തെര്യു. അദേപാസെത്തെ ണിമാക്ക്‌മ് എമാണ പറ്റി ണലമായി തെര്യു എന്ത് എമ്മ ണെനേക്കേര്. 12എമ്മ പിന്നേമ് എമാണ താനെ ണിമ്മ് മുന്തുക്ക് പെര്‌മെപഡ്യ ണോഡുറാദില്ലെ. അദ്‌ക്ക് ബദ്‌ള മനേസ്സ്‌ണ ണോഡാദെ ആള്‌ണ ണോഡികൊണ്ട് പെര്‌മെപഡ്‌റവാര്‌ക്ക് എമാണ പറ്റി ബദ്‌ള് സൊല്ലുറ കാര്യഗ ണിമാക്ക് സെയ്‌ദ് തര്യാത്തെ എമ്മ ണോഡുറാദ്. 13എമ്മ ബുദ്ദിബോദ ഇല്ലാത്തവാര്‌ണ പാസെ സെയ്‌രദാനാക്കി അദ് സാമിക്ക് ബേ്ണ്ടിത്തെ. എമ്മ ബുദ്ദിബോദ ഉള്ളവാര്‌ണ പാസെ സെയ്‌രദാനാക്കി അദ് ണിമാക്ക് ബേ്ണ്ടിത്തെ. 14ക്‌റ്‌സ്‌ത്ത്‌ക്ക് ആള്‌ഗോഡെ ഇര്‌ക്ക സീവാ് പല കാര്യഗാമ് സെയ്യ ബേ്ണ്ടി എമാണ ണത്ത്‌ദ്. എല്ല ആള്‌ഗാക്ക് ബേ്ണ്ടിത്തെ ഒരുത്താ് സത്താദ് എന്ത്‌മ്, അദ്‌ണാലെ എല്ല ആള്‌ഗാമ് അയാള് സാവുക്ക് പങ്ക്‌ക്കാറാര് ആരാര് എന്ത്‌മ് എമാക്ക് തെരിന്തിര്‌ക്ക്‌ദ്. 15അയാള് എല്ല ആള്‌ഗാക്ക്‌മ് ബേ്ണ്ടി സത്താ്. അദ്‌ണാലെ പെ്ളേത്തിര്‌ക്കവാര് തമാക്ക് ബേ്ണ്ട്യല്ല, തമാക്ക് ബേ്ണ്ടി സത്ത പ്‌റ സാമി ഉജുറേ്ത്തിന ആണ്ടവാന്‌ക്ക് ബേ്ണ്ടിത്തെ പെ്ളേക്കുഡൊ.
16അദ്‌ണാലെ ഇനി മേല് മന്‌സാര് ണെനേക്ക പാസെ എമ്മ ആര്‌ണാമ് പറ്റി ണെനേക്കാദില്ലെ. എമ്മ ക്‌റ്‌സ്‌ത്ത്‌ണ പറ്റി തെര്യാത്ത ഗള്യേലി ക്‌റ്‌സ്‌ത്ത്‌ണ ണമ്പാത്ത ആള്‌ഗ ണെനേത്തിര്‌ന്ത പാസെത്തെ ണെനേത്തിര്‌ന്താദ്. ആന ഇപ്പ് അച്ചെ അല്ല. 17ഒരുത്താ് ക്‌റ്‌സ്‌ത്ത്‌ക്കെ എ്ണേന്ത അയാള് പുദ്യാദായി ദ്‌ട്ടിസിനവാ് ആയിര്‌ക്കാ്. പള്യദൊട്ടുക്ക് ഒയിന്ത് പോയി പുദ്യ പെ്ളേപ്പ് തുഡാങ്കിര്‌ക്ക്‌ദ്. 18ഇദ് എല്ലാമെ സെയ്‌രാദ് സാമിത്തെ. അയ്യി സാമി തനാക്ക് പോട്ടിക്കാറാര് ആയിര്‌ന്ത ണമാണ ക്‌റ്‌സ്‌ത്ത്‌ണ ബെത്ത് തന്നോഡെ റാജി കൂഡിസിനാ്. ബേ്റെ ആള്‌ഗണ തന്നോഡെ റാജി കൂഡുസ്‌റ ബേലെന സെയ്യാമ് ണമാക്ക് തന്തിര്‌ക്കാ്. 19ഉലഗാത്തില്യ എല്ല ആള്‌ഗണാമ് ക്‌റ്‌സ്‌ത്ത്‌ണ ബെത്ത് തനാക്ക് റാജി കൂഡുസ്‌റാദ്‌ത്തെ എമ്മ സൊല്ലുറ സേദി. അയ്യി സേദ്യാലെ ക്‌റ്‌സ്‌ത്ത്‌ണ ണമ്പ്‌റവാര്‌ദ് പാവഗണ സാമി കണാക്ക് ബെക്കാദില്ലെ. ഈ സേദി സൊല്ലുറ ബേലെത്തെ എമ്മ സെയ്‌രാദ്. 20അച്ചെ ക്‌റ്‌സ്‌ത്ത്‌ക്ക് ബേ്ണ്ടി ണായ സൊല്ല്യ ക്‌റ്‌സ്‌ത്ത് തനാക്ക് ബദ്‌ളായി എമാണ എ്ഡ്‌ത്ത് ബെത്തിര്‌ക്കാ്. അദ്‌ണാലെ സാമ്യോഡെ റാജി കൂഡിരി എന്ത് എമ്മ ക്‌റ്‌സ്‌ത്ത്‌ക്ക് ബേ്ണ്ടി ണിമാണ ബേ്ണ്ടികൊള്ളുറേര്. 21ക്‌റ്‌സ്‌ത്ത് പാവ ഇല്ലാത്തവാനായിര്‌ന്താ്. ണമ്മ സെയ്‌ദ പാവഗണെല്ല സാമി അവാന്‌ദ് തലേക്ക് ഏ്റ്‌സിനാ്. അച്ചെ അവാനോഡെ റാജി കൂഡിര്‌ക്ക പേരിലി സാമി ണമാണ ണേര്‌മെക്കാറാരായി ഏറ്റ്‌കൊള്ളുറാ്.
נבחרו כעת:
2 കൊരിന്ത്യക്കാറാര് 5: സാമിദ് സേദി
הדגשה
שתפו
העתק
רוצים לשמור את ההדגשות שלכם בכל המכשירים שלכם? הירשמו או היכנסו
New Life Literature