2 കൊരിന്ത്യക്കാറാര് 6
6
1ണിമാക്ക് സാമി പ്‌ണ്ണ്യ സെയ്‌ദ് ണിമ്മ് പാവഗണ പൊറുത്ത് തന്താദ്‌ണ ബെലെ ഇല്ലാത്താദ് ആക്കാദി എന്ത് സാമ്യോഡെ എ്ണേന്ത് ബേലെ സെയ്‌രവാരാന എമ്മ ണിമാക്ക് ബുദ്ദി സൊല്ലുറേര്. 2എന്ത്‌ക്കെന്റ:
<<ണിനാണ പിര്യപഡ്‌റ ഗള്യെ ബര്‌ഗാട്ടി ണാന് ണിന്ന് പരേസണ കേ്ട്ടെ.
ണിനാണ കാപാറ്റ്‌റ ണാള് ണാന് ണിനാക്ക് ഉദാവി സെയ്‌ദെ>>#എസയ്യാ് 49:8
എന്ത് സാമി സൊല്ലിര്‌ക്കാ്. ഇദാ, ഇപ്പ്‌ത്തെ സാമി പിര്യപഡ്‌റ ഗള്യെ, ഇദാ, ഇദ്‌ത്തെ ണിമ്മ ദെങ്കി കഡാക്കാദ്‌ക്കുള്ള ണാള് എന്ത് ണാന് ണിമാക്കെ സൊല്ലുറെ.
പവുലോസ്‌ദ് കജട്ടപാഡ്‌ഗ
3എമ്മ സെയ്‌ര ബേലെഗണ പറ്റി ആര്‌മ് കുറ്റ സൊല്ലാദെ ഇര്‌ക്ക്യ ബേ്ണ്ടി ക്‌റ്‌സ്‌ത്ത്‌ണ ണമ്പ്‌റ ആര്‌മ് എമാണ കണ്ട് ക്‌റ്‌സ്‌ത്ത്‌ണ ബ്‌ട്ട് പോഗാദെ ഇര്‌ക്ക്യ ബേ്ണ്ടി എമ്മ ഓരാഡ്‌റേര്. 4എമ്മ സെയ്‌ര കാര്യാത്തിലിമ് എമ്മ സൊല്ലുറ ണായാത്തിലിമ് എമ്മ സാമിദ് ണല്ല ബേലെക്കാറാര് എന്ത് കാട്ടി കൊഡുക്കേര്. എമാക്ക് ബന്ത കൊഡിമെഗണാമ് ബുദ്ദിമുട്ടുഗണാമ്, തഡെഗണാമ് പൊറിമോഡെ താങ്കിനേര്. 5അദ് എച്ചെ എന്ത് സൊന്ന എമ്മ അഡി തിന്തേര്, എമാണ ജെയില്‌ക്ക് ഇക്കിനാര്, എമ്മ കലമ്പാല്‌ക്ക് സിക്കിനേര്, മുക്കിമുക്കി പാഡ്‌പട്ടേര്, ഉറാക്ക്‌കെ്ട്ടേര്, പജി സത്തേര്. 6എമ്മ കള്ളകവാഡ് ഇല്ലാത്തവാര് ആയിമ് അറുവുള്ളവാര് ആയിമ്, പൊറിമുള്ളവാര് ആയിമ്, ഗവപഡ്‌റവാര് ആയിമ്, സീവാ് ഉള്ളവാര് ആയിമ്, സാമിണിഗാല് ഇര്‌ക്കവാര് ആയിമ് പെ്ളേത്ത്‌കൊണ്ട് എമ്മ സാമിദ് ണല്ല ബേലെക്കാറാര് എന്ത് കാട്ടി കൊഡുക്കേര്. എല്ല ആള്‌ഗോഡേമ് എമ്മ കള്ളകവാഡില്ലാത്ത സീവാനോഡെ പ്‌ളാങ്കിനേര്. 7എമ്മ സത്ത്യണാത്തെ പഡ്‌സ്‌റേര്, സാമി സക്‌ദിലി എമ്മ എല്ല കാര്യഗണാമ് സെയ്‌രേര്, പഡെഗാദ് ഒരു കയ്യിലി ബാള്‌മ് പിന്നെ ഒരു കയ്യിലി തഡ്‌ക്കാദ്‌മ് ഇര്‌ക്ക പാസെ എമ്മ് ഇ്ഡ കയ്യിലിമ് ബല കയ്യിലിമ് ണേര്‌മെ എങ്ക ബാള്‌മ് തഡ്‌ക്കാദ്‌മ് പ്‌ഡിത്ത്‌കൊണ്ട് പെ്ളേക്കേര്. 8ലേസ ആള്‌ഗ എമാണ മദ്‌സ്‌റാര്. ആന ബേ്റെ ലേസ ആള്‌ഗ എമാണ ണാണഗെ്ഡ്‌സ്‌റാര് ലേസ ആള്‌ഗ ണല്ലവാര് എന്ത് സൊല്ലുറാര്, ബേ്റെ ലേസ ആള്‌ഗ കുറ്റ സൊല്ലുറാര്, ലേസ ആള്‌ഗ എമാണ ഉറുട്ടു സൊല്ലി ഏമാത്ത്‌റേര് എന്ത് സൊല്ലുറാര്. ആന എമ്മ ണേര്‌ണ സൊല്ലുറവാര്‌ത്തെ. 9എമ്മ ണേര്‌മോഡെ സാമിക്ക് ബേലെ സെയ്‌രവാര്‌ത്തെ എന്ത് ആള്‌ഗാക്ക് തെര്യു. ആനാല്‌മ് അവാര് ണമ്പ്‌റാദില്ലെ, എമ്മ ഉജുറുക്ക് അവങ്കേ്ഡ് ബന്തവാര് ആനാല്‌മ് എമ്മ പെ്ളേക്കേര്. എമ്മ അഡി തിങ്കവാര് ആനാല്‌മ് എമ്മ സാരാദില്ലെ. 10എമ്മ ദുക്കപഡ്‌റവാര് ആനാല്‌മ് ഒപ്പ പിര്യപിര്യാത്ത് ഇര്‌ക്കേര്. എമ്മ ഏ്ളെഗ ആനാല്‌മ് എത്തിന്യൊ ആള്‌ഗണ എമ്മ സാമ്യോഡെ ഉള്ള ഉറാവിലി മ്‌ഗ്‌ന്തവാര് ആക്ക്‌റേര്. എമ്മ ഒന്റുമില്ലാത്തവാര് ആനാല്‌മ് എമാക്ക് എല്ലാദ്‌മ് ഇര്‌ക്ക്‌ദ്.
11കൊരിന്ത്യ പട്ടണാത്തില്യ എന്ന് എ്ണേവുക്കാറാരെ, എമ്മ ണിമാണ റമ്പ സീവാ് ബ്‌ഡ്‌റാദ്‌ണാലെ എമ്മ എല്ല കാര്യഗണാമ് ഒളുസാദെ ണിമാക്ക് തുറാന്ത് സൊല്ലിര്‌ക്കേര്. 12എമ്മ ണിമ്മോഡെ അരെ മനേസ്സോഡെ സീവാ് ബ്‌ട്ട് ണഡാക്കാലെ ണിമ്മാത്തെ എമ്മോഡെ അരെ മനേസ്സോഡെ സീവാ് ബ്‌ട്ട് ണഡാന്താദ്. 13ണിമ്മ എന്ന് പ്‌ള്ളെഗ എങ്ക ദിന്‌സിലി ണാന് ണിമാക്ക് ഇപ്പ് സൊല്ലുറെ, എമ്മ മനേസ്സാറ ണിമാണ സീവാ് ബ്‌ഡ്‌റ പാസെ ണിമ്മാമ് എമാണ മനേസ്സാറ സീവാ് ബ്‌ഡിരി.
ണല്ലാദ്‌മ് കെ്ട്ടാദ്‌മ്
14ണിമ്മ ഏസുണ ണമ്പാത്തവാരോഡെ ഒരു കാര്യാത്തിലിമ് പങ്ക്‌ക്കാറാര് ആഗാദി, എന്ത്‌ക്കെന്റ ണല്ലാദ്‌മ് കെ്ട്ടാദ്‌മ് ഒന്റാഗമാട്ട. ഇ്റ്‌ട്ട്‌മ് ബെ്ള്‌സാമ് ഒന്റായി എ്ണേഗമാട്ട. 15ക്‌റ്‌സ്‌ത്ത്‌ക്ക്‌മ് സെയിത്ത്യാന്‌ക്ക്‌മ്#6:15 സെയിത്ത്യാന്‌ക്ക്‌മ് മുദ ണോഡി എ്ള്‌ദിന ബേ്റെ കായിദാത്തിലിഗ സെയിത്ത്യാന്‌ദ് ബേ്റെ പേര് ആന ബെലിയാല് എന്ത് എ്ള്‌ദിര്‌ക്ക്‌ദ്. ആങ്കീങ്ക് ഒത്തു പോയ മുഡ്യമാട്ട. ഏസുണ ണമ്പിര്‌ക്കവാന്‌ക്ക്‌മ് ഏസുണ ണമ്പാത്തവാന്‌ക്ക്‌മ് ആങ്കീങ്ക് ഒത്തു പോയ മുഡ്യമാട്ട. 16സാമികൂരേക്ക്‌മ് സെലേക്ക്‌മ് ആങ്കീങ്ക് എ്ണേഗമാട്ട. ണമ്മ ഉജുറുള്ള സാമി ഇര്‌ക്ക കൂരെ ആനാദ്‌ണാലെ ണമ്മ സെലേന കുമ്മുഡ്‌റവാര്‌ക്ക് എ്ണേഗ ബേ്ഡ <<എന്ന് ആള്‌ഗോഡെ ണാന് ഒന്റായി തങ്കുവെ, അവാര്‌ദൊപ്പ ണാന് ണഡാക്കുവെ, ണാന് അവാര്‌ദ് സാമി ആയിര്‌ക്കുവെ, അവാര് എന്ന് ആള്‌ഗാമ് ആയിര്‌ക്കുവാര്>>#ലേവ്യാര് 26:12; ഇരെമ്യാ് 32:38; എഗെസ്‌ക്കേല് 37:27 എന്ത് സാമി സൊല്ലിര്‌ക്കാനല്ല.
17<<അദ്‌ണാലെ ണിമ്മ അവാര്‌ണ ബ്‌ട്ട് പ്‌റ്‌ന്ത് ദൂര ഇര്‌ക്കുഡൊ,
എന്ത് ആണ്ടവാ് സൊല്ലുറാ്.
അയിത്ത്യ ആയിര്‌ക്കാദ് ഒന്റുണാമ് അണ്ണാദി,
അച്ചെ ഇര്‌ന്ത ണാന് ണിമാണ സേത്തി ബെക്കുവെ>>#എസയ്യാ് 52:11; എഗെസ്‌ക്കേല് 20:34,41
എന്ത് സാമി സൊല്ലുസുലാക്കാത്തിലി എ്ള്‌ദിര്‌ക്ക്‌ദ്.
18<<ണാന് ണിമ്മ്‌ദ് അപ്പാന്‌മ്
ണിമ്മ എന്ന്‌ദ് മഗനാര്‌മ് മഗളാര്‌മ് ആയിര്‌ക്കുവേര്
എന്ത് എല്ല ബിലാമ് ഇര്‌ക്ക ആണ്ടവാ് സൊല്ലുറാ്.>>#2 സാമൂവേല് 7:14; 7:8
נבחרו כעת:
2 കൊരിന്ത്യക്കാറാര് 6: സാമിദ് സേദി
הדגשה
שתפו
העתק
רוצים לשמור את ההדגשות שלכם בכל המכשירים שלכם? הירשמו או היכנסו
New Life Literature