2 കൊരിന്ത്യക്കാറാര് 4
4
മണ്ണ് സട്ടിക്ക് സേത്തിന സൊത്തു
1സാമിക്ക് ഗവ പ്‌ഡിത്ത് എമാക്ക് ഈ ബേലെന തന്തിര്‌ക്കാദ്‌ണാലെ എമ്മ സോറ്റു പോഗാദെ ഇര്‌ക്കേര്. 2സൂഗാന സെയ്‌ര ഒരു ണാണഗെ്ട്ട കാര്യഗണാമ് എമ്മ സെയ്‌രാദില്ലെ. ആള്‌ഗണ ഏമാത്ത്‌റ കാര്യഗാളൊ, സാമി സൊല്ലുസുലാക്കഗണ തപ്പായി പഡ്‌സ്‌റാദൊ ഒന്റുമ് എമ്മ സെയ്‌രാദില്ലെ. അദ്‌ക്ക് ബദ്‌ള സത്ത്യഗണ മാട്ട്‌ത്തെ എമ്മ ആള്‌ഗാക്ക് പഡിസി കൊഡുക്കാദ്. സാമി മുന്തുക്ക് എമ്മ എച്ച്‌ള ദിന്‌സ് ആള്‌ഗ എന്ത് എല്ല ആള്‌ഗാക്ക്‌മ് കാട്ടി കൊഡുക്കേര്. 3ആന എമ്മ സൊല്ലുറ ണല്ല സേദി ആരാറ്റ്‌ക്ക് മറേന്തിര്‌ന്താക്കി അദ് കെ്ട്ട് പോരവാര്‌ക്ക്‌ത്തെ മറേന്തിര്‌ക്ക്‌ദ്. 4ഏസുണ ണമ്പാത്തവാര് മനേസ്സ്‌ണ ഈ ഉലഗാത്തില്യ സാമി ആന സെയിത്ത്യാ് കുറുഡു ബീ്ത്തിര്‌ക്കാ്. അദ്‌ണാലെ സാമിദ് ഉരുവ ആയിര്‌ക്ക ക്‌റ്‌സ്‌ത്ത്‌ണ പറ്റി സൊല്ലുറ ണല്ല സേദിദ് മദ്‌പ്പ്‌ണ അവാര്‌ക്ക് കാണ്യ മുഡിരാദില്ലെ. 5എമ്മ എമാണ പറ്റി അല്ല സൊല്ലുറാദ്, ഏസു ക്‌റ്‌സ്‌ത്ത്‌ത്തെ ആണ്ടവാ് എന്ത്‌മ് എമ്മ അയാള് ആസെപഡി ണിമാക്ക് ബേ്ണ്ടി ബേലെ സെയ്‌രവാര് എന്ത്‌മ്‌ത്തെ എമ്മ സൊല്ലുറാദ്. 6<<ഇ്റ്‌ട്ടിലിര്‌ന്ത് ബെ്ള്‌സ ബരുഡൊ>>#ഉറുപത്തി 1:3 എന്ത് സൊന്ന സാമിത്തെ ഈ ബെ്ള്‌സണ എമ്മ് ണെഞ്ച്‌ക്കെ തന്താദ്. അദ്‌ണാലെത്തെ ഏസു ക്‌റ്‌സ്‌ത്ത്‌ദ് മൂഞ്ചിലിര്‌ക്ക സാമി മദ്‌പ്പ്‌ദ് അറുവു എമാക്ക് കെ്ഡേത്താദ്.
7എന്താല്‌മ് ഈ റമ്പ സക്‌ദി എമ്മ്‌ദ് സൊന്തല്ല സാമിദ്‌ത്തെ എന്ത് കാട്ടി കൊഡുക്ക്യ ബേ്ണ്ടി ഈ സൊത്തുണ ബില ഇല്ലാത്ത മണ്ണ് സട്ടി ആന എമ്മ്‌ദ് ണെഞ്ച്‌ക്ക്‌ത്തെ തന്തിര്‌ക്കാദ്. 8എമ്മ എല്ല ദിന്‌സ് കജട്ടഗാമ് പഡ്‌റേര്, ആനാല്‌മ് എമ്മ ഒഗേസാത്തവാര്‌ണ പാസെ ഇര്‌ക്കേര്, അര്‌ക്കപഡ്‌റവാര് ആനാല്‌മ് എമ്മ സോറ്റു പോരവാര് ആരാദില്ലെ, 9എമ്മ കൊഡിമെപഡ്‌റവാര് ആയിര്‌ന്താല്‌മ് എമാണ സാമി കയ്യി ബ്‌ഡ്‌റാദില്ലെ, എമാണ അഡിത്ത് ണുറ്‌ക്കിനാര്, ആന എമ്മ അളിന്ത് പോരാദില്ലെ. 10ഏസുദ് ഉജുറു എമ്മ്‌ദ് സരിഗലാത്തിലി ഇര്‌ക്ക്‌ദ് എന്ത് കാട്ട്യ ബേ്ണ്ടി ഏസു സാഗാട്ടി പട്ട കജട്ടണ പാസെ എമ്മ കജട്ടപഡ്‌റേര്. 11ഏസുദ് ഉജുറു അളിന്ത് പോര ണമ്മ് സരിഗലാത്തിലി ഇര്‌ക്ക്‌ദ് എന്ത് കാട്ട്യ ബേ്ണ്ടി ഉജുറോഡെ ഇര്‌ക്കവാരാന എമ്മ ഉജുറുക്ക് ബര അവങ്കേ്ഡ്‌ഗണ എപ്പ്‌മ് ഏസുക്ക് ബേ്ണ്ടി താങ്കികൊണ്ട് ഇര്‌ക്കേര്. 12അച്ചെ ണിമാക്ക് ബേ്ണ്ടി സെയ്‌ര ബേലേലി ണിമാക്ക് എപ്പേക്ക്‌മ് ഇര്‌ക്ക പെ്ളേപ്പ്‌മ് കെ്ഡേക്ക്‌ദ്, ആന എമാക്ക് ഉജുറുക്ക് ബര അവങ്കേ്ഡ്‌ഗാമ് ബര്‌ദ്.
13<<ണാന് ണമ്പിനെ, അദ്‌ണാലെ ണാന് ണായ പേസിനെ>>#സാമി പാട്ട് ബുക്ക് 116:10 എന്ത് സാമി സൊല്ലുസുലാക്കാത്തിലി എ്ള്‌ദിര്‌ക്ക്‌ദല്ല. അച്ചെ സൊല്ലിര്‌ക്കവാന്‌ദ് ണിഗാല് എമ്മോഡെ ഇര്‌ക്കാദ്‌ണാലെ എമ്മ ണമ്പിനേര് അയ്യി ണമ്പിക്കേലി എമ്മ ണായ പേസ്‌റേര്. 14ആണ്ടവാ് ഏസുണ ഉജുറേ്ത്തിന സാമി ഏസുദൊപ്പ എമാണാമ് ഉജുറേ്ത്തുവാ് എന്ത്‌മ് ണിമ്മ്‌ദൊപ്പ എമാണ തന്ന് മുന്തുക്ക് എ്ഡ്‌ത്ത് ബരുവാ് എന്ത്‌മ് എമാക്ക് തെരിദ്. 15ഇദ്‌ഗെല്ലാമ് ണിമാക്ക് ണല്ലാദ് ബര്യ ബേ്ണ്ടിമ് ആണ്ടവാന്‌ദ് പ്‌ണ്ണ്യ ആള്‌ഗാക്ക് മേല്‌ക്ക്‌മേല് കെ്ഡേക്ക്യ ബേ്ണ്ടിമ് ഉദാവ്യാദ്. അച്ചെ അവാര് മുച്ചുഡ സേത്തി സേത്തി സാമിക്ക് ണണ്ണി സൊല്ലുവാര്.
16അദ്‌ണാലെ എമ്മ ദയ്യിര ഉള്ളവാര്‌ത്തെ. ഈ ഉലഗാത്തില്യ എമ്മ് സരിഗല ണരഗി പോനാല്‌മ് എമ്മ് ണിഗാല്‌കുട്ടി ണാള്‌ക്ക്‌മ് ബിലപട്ട്‌കൊണ്ടെ ഇര്‌ക്ക്‌ദ്. 17എന്ത്‌ക്കെന്റ എമ്മ പഡ്‌റ ഈ കജട്ടഗ സിന്ന സിന്നാദ്‌മ് ഒരു ലേസ ണേര ഉള്ളാദ്‌മ്‌ത്തെ. ആന ഈ കജട്ടഗളെല്ല ഒരേപെ്ട്ട് മ്‌ഗ്‌ന്താദ്‌മ് എപ്പേക്ക്‌മ് ഇര്‌ക്കാദ്‌മാന മദ്‌പ്പ്‌ക്ക് എമാണ പങ്ക്‌ക്കാറാര് ആക്ക്‌ദ്. അയ്യി മദ്‌പ്പ്‌ണ ഇപ്പേത്ത കജട്ടഗാക്ക് എ്ണേത്ത് ബെത്ത് ണോഡ്യ പോന ഇപ്പേത്ത കജട്ടഗ ഒന്റുമല്ല. 18അദ്‌ണാലെ എമ്മ ഇപ്പ് കാണ്‌റാദ്‌ഗണെല്ല കാണ്യ മുഡ്യാത്താദ്‌ഗാക്ക്‌ത്തെ കാത്ത്‌കൊണ്ടിര്‌ക്കാദ്. എന്ത്‌ക്കെന്റ ഈ കാണ്‌റാദെല്ല ഒരു ലേസ ണേര ഇര്‌ക്കാദ്‌ഗാത്തെ. കാണ്യ മുഡ്യാത്താദ് എപ്പേക്ക്‌മിര്‌ക്കു.
נבחרו כעת:
2 കൊരിന്ത്യക്കാറാര് 4: സാമിദ് സേദി
הדגשה
שתפו
העתק
רוצים לשמור את ההדגשות שלכם בכל המכשירים שלכם? הירשמו או היכנסו
New Life Literature