2 കൊരിന്ത്യക്കാറാര് 1
1
1സാമിദ് ആസെപഡി ക്‌റ്‌സ്‌ത്ത് ഏസുദ് അപ്പൊസലാ് ആന പവുലോസ് എങ്ക ണാന്‌മ് ഏസുക്കാറാനാന തിമത്തോസ്‌മ് എജേന്ത് കൊരിന്ത്യ പട്ടണാത്തില്യ സാമിക്കാറാര് കൂട്ടാക്ക്‌മ് അക്കായി ണാഡില്യ സാമിക്ക് പട്ട എല്ലാര്‌ക്ക്‌മ് സേന്ത് എ്ള്‌ദ്‌റ എ്ള്‌ത്ത്.
2ണമ്മ്‌ദ് അപ്പനാന സാമിമ് ആണ്ടവനാന ഏസു ക്‌റ്‌സ്‌ത്ത്‌മ് ണിമാക്ക് പ്‌ണ്ണ്യാമ് സെയ്‌ഡൊ, ണിമാണ ണിമ്മദ്യോഡേമ് ബെക്കുഡൊ.
പവുലോസ് സാമിക്ക് ണണ്ണി സൊല്ലുറാ്
3ണമ്മ്‌ദ് സാമിമ് ണമ്മ് ആണ്ടവാ് ഏസു ക്‌റ്‌സ്‌ത്ത്‌ദ് അപ്പാന്‌മാന സാമിക്ക് ണാന് ണണ്ണി സൊല്ലുറെ, അയ്യി സാമി ഗവ ഇര്‌ക്ക അപ്പാന്‌മ് എല്ല ദിന്‌സിലിമ് പിരാക്കി ബെക്ക സാമിമ്‌ത്തെ. 4എമാക്ക് ബര എല്ല ദിന്‌സ് കജട്ടഗളിലിമ് സാമി എമാണ പിരാക്കി ബെക്കാ്. അച്ചെ സാമി എമാണ പിരാക്കി ബെക്കാദ്‌ണാലെ ഒരൊരു ആള്‌ക്ക് ബര കജട്ടഗളിലിര്‌ന്ത്‌മ് എമാക്ക് അവാര്‌ണ പിരാക്കി ബെക്ക്യ മുഡ്യു. 5ക്‌റ്‌സ്‌ത്ത് പട്ട കൊഡിമെഗ ണമ്മ് പെ്ളേപ്പിലി പെര്‌ഗി ബര പാസെ ക്‌റ്‌സ്‌ത്താലെ സാമി എമാണ പിരാക്ക്‌റാദ്‌മ് പെര്‌ഗി ബര്‌ദ്. 6എമ്മ കജട്ടപഡ്‌ഗാട്ടി എമാക്ക് ണിമാണ പിരാക്കി ബെക്ക്യ മുഡ്യു. അച്ചെ ണിമാക്ക് സാമി ആസെപഡ്‌റ പാസെ പെ്ളേക്കവാര് ആയ മുഡ്യു. എമാക്ക് ബന്ത കജട്ടാത്തിലി എമ്മ പിരാക്കി ബെത്തിര്‌ക്കവാര് ആനാക്കി അദേ കജട്ടഗ ണിമാക്ക് ബര്‌ഗാട്ടി ണിമാക്ക്‌മ് അദ്‌ണ പൊറിമോഡെ താങ്ക്യ മുഡ്യു. 7ഒരേ ദിന്‌സ് കജട്ടഗാക്ക് ണമ്മ എല്ലാര്‌മ് പങ്ക്‌ക്കാറാര് ആയിര്‌ക്കാമ്. അദേപാസെ താനെ എമാണ പിരാക്കി ബെത്തിര്‌ക്ക അദേ പിരാക്കാക്ക് ണിമ്മാമ് പങ്ക്‌ക്കാറാര് ആയിര്‌ക്കേര് എന്ത് തെരിരാദ്‌ണാലെ എമാക്ക് ണിമാണ പറ്റി ണല്ല ണെഞ്ചഡെ ഇര്‌ക്ക്‌ദ്.
8ഏസുക്കാറാരെ, എമാക്ക് ആസ്യ ണാഡിലി ബന്ത കജട്ടഗണ എമ്മ ണിമാക്ക് സൊല്ലുഡൊ എന്ത് എമ്മ ആസെപഡ്‌റേര്. എമ്മ ഉജുറോഡെ ഇര്‌ക്കുവേര് എന്ത് എമ്മ ണെനേക്കാലെ, എമ്മ താങ്ക്‌റദായി ബന്ത കജട്ടഗ അത്തറാക്ക്‌മ് മ്‌ഗ്‌ന്ത ആരവാര ഉള്ളാദ്‌മ് ആയിര്‌ന്ത്‌ദ്. 9കൊല്ല്യ ബേ്ണ്ടി ബിദിത്തിര്‌ക്ക ആള്‌ഗാത്തെ എന്ത് എമ്മ എമാണ പറ്റി ണെനേക്കാക്കുള്ളാദ് ബന്ത്‌ദ്. ആന എമ്മ ഈ കജട്ടഗളെല്ല പട്ട്‌കൊണ്ട് പോരാദ്‌ണാലെ എമ്മ എമാണ ണമ്പിക്കെ ബെക്കാദെ സത്തവാര്‌ണ ഉജുറേ്ത്തിന സാമിക്കെ താനെത്തെ അണ്ടികൊള്ളുഡൊ എങ്കാദാറ്റ്. 10ഉജുറു പോര ഇത്തറ ബെല്ല്യ അവങ്കേ്ഡ്‌ഗാളിലിര്‌ന്ത്‌ത്തെ സാമി എമാണ കാപാറ്റിനാദ്, കാപാറ്റാമ് സെയ്‌വാ്. ഇന്നിമ് എമാണ കാപാറ്റുവാ് എന്ത് എമ്മ സാമിന ണെഞ്ചഡെ ബെത്ത്‌മിര്‌ക്കേര്. 11അദ്‌ക്ക് ബേ്ണ്ടി ണിമ്മ എല്ലാര്‌മ് എമാക്ക് ബേ്ണ്ടി പരേസ്‌റേരല്ല. അച്ചെ എത്തിന്യൊ ആള്‌ഗ എമാക്ക് ബേ്ണ്ടി പരേസ്‌ഗാട്ടി സാമി എമാക്ക് പ്‌ണ്ണ്യ സെയ്‌വാ്. അദ്‌ണ കണ്ട് അയ്യി എത്തിന്യൊ ആള്‌ഗ എമാക്ക് ബേ്ണ്ടി സാമിക്ക് ണണ്ണിമ് സൊല്ലുവാര്.
പവുലോസ് മുഡിവു മാറ്റ്‌റാ്
12ഈ ഉലഗാത്തില്യ ആള്‌ഗ പട്ടിലി, മുക്ക്യമായിമ് ണിമ്മ് പട്ടിലി പെ്ളേക്കാട്ടി സാമി എമാക്ക് തന്ത സുത്താപ്പുള്ള മനേസ്സോഡേമ് കള്ളകവാഡില്ലാത്ത മനേസ്സോഡേമ് പെ്ളേത്തേര്. ഈ ഉലഗാത്തിലിര്‌ന്ത് കെ്ഡേത്ത അറുവാലെ അല്ല സാമി സെയ്‌ദ പ്‌ണ്ണ്യത്താലെത്തെ എമാക്ക് അച്ചെ പെ്ളേക്ക്യ മുഡിന്താദ്. ഇദ് ണേര്‌ത്തെ എന്ത് എമ്മ് മനേസ്സ് ഒറേപ്പായി സൊല്ലുദ്. ഇദ്‌ണാത്തെ എമ്മ പെര്‌മെപഡ്‌റേര്. 13ണിമാക്ക് പഡിത്ത് ണെപ്പ്‌കെ്ഡേസ്യ മുഡിര കാര്യഗണാത്തെ എമ്മ എ്ള്‌ദ്‌റേര്. 14ഇപ്പ് എമ്മ എച്ച്‌ള ആള്‌ഗ എന്ത് എമാണ പറ്റി ണിമാക്ക് ലേസ ലേസ തെരിദ്. ആന പോഗ പോഗ ണിമാക്ക് എമാണ പറ്റി ഒരേപെ്ട്ട് സൊക്കാന ണെപ്പ്‌കെ്ഡേക്കു എന്ത് എമാക്ക് ഒറേപ്പിര്‌ക്ക്‌ദ്. അദ്‌ണാലെ ആണ്ടവനാന ഏസു ക്‌റ്‌സ്‌ത്ത് ബര ണാള് എമ്മ ണിമാണ പറ്റി പെര്‌മെപഡ്‌റ പാസെ ണിമ്മാമ് എമാണ പറ്റി പെര്‌മെപഡുവേര്.
15-16എനാക്ക് ഇദ്‌ണ പറ്റി ണല്ല ഒറേപ്പിര്‌ന്ത്‌ദ്. അദ്‌ണാലെത്തെ ണാന് മക്കദോനി ണാഡ്‌ക്ക് പോഗാട്ടി മുദ ണിമാണ ബന്ത് കാണ്യാമ് മക്കദോനി ണാഡ്‌ക്ക് പോയി തിലിമ്പി ണിമ്മ് പട്ട്‌ക്ക് ബന്ത് ണിമ്മ് ഉദാവ്യാലെ എഗുദ ണാഡ്‌ക്ക് പോയാമ് ണെനേത്തിര്‌ന്താദ്. അച്ചെ റണ്ട് ഗഡി ണിമ്മ് പട്ട്‌ക്ക് ബന്ത് റണ്ട് ഗഡിമ് ണിമാക്ക് ണല്ലാദ് ബരു എന്ത് ണാന് ണെനേത്തെ. 17ഈ കാര്യാത്തിലി ണാന് സൊന്ന, സൊന്ന പാസെ സെയ്യാത്ത ഒരു മന്‌സാ് എന്ത്‌ത്തെ ണിമ്മ എനാണ പറ്റി ണെനേക്കേര? മനേസ്സിലി ഒന്റു ബെത്ത് കൊണ്ട് ബെ്ള്യെ ഒരു ണായ സൊല്ലുറ ഈ ഉലഗാത്തില്യ മന്‌സാര്‌ണ പാസെത്തെ ണാന് ഒരൊരു കാര്യഗ സെയ്യ ഓസണെ എ്ഡ്‌ക്കേന?
18സാമി താന് സൊന്ന ബാക്ക്‌ക്ക് മാറ്റ ബര്‌സാദെ സെയ്‌ര പാസെ എമ്മ സൊന്ന ബാക്ക്‌മ് സെരി എന്ത് സൊന്ന സെരിത്തെ ആയിര്‌ക്കു. 19എന്ത്‌ക്കെന്റ ണിമ്മ് പട്ടിലി സീലാസ്‌മ് തിമത്തോസ്‌മ് ണാന്‌മ് ണിമാക്ക് സൊന്ന സാമിമഗാ് ഏസു ക്‌റ്‌സ്‌ത്ത് ഒരു ബാക്ക് സൊന്ന അദേപാസെ സെയ്‌രവാ്ത്തെ. അവാ് എപ്പ്‌മ് റണ്ട് ണായ സൊല്ലുറവാനല്ല, അവാ് സെരി എന്ത് സൊന്ന സെരിത്തെ. 20സാമി തരെ എന്ത് സൊല്ലിര്‌ക്ക എല്ല ബാക്ക്‌വരഗാമ് ക്‌റ്‌സ്‌ത്താലെത്തെ ണമാക്ക് കെ്ഡേത്തിര്‌ക്കാദ്. സാമി അച്ചെ സെയ്‌ദ് തന്താദ്‌ണാലെത്തെ ണമ്മ ക്‌റ്‌സ്‌ത്താലെ സാമി മദ്‌പ്പ്‌ക്ക് ആമെ എന്ത് സൊല്ലുറാദ്. 21ണമാണ എല്ലാര്‌ണാമ് ക്‌റ്‌സ്‌ത്ത്‌ക്ക് ബേ്ണ്ടി ഒന്നേത്ത് എ്ഡ്‌ത്താദ് സാമിത്തെ. അയ്യി സാമിത്തെ ണമ്മ റണ്ട് കൂട്ടാര്‌ണാമ് ക്‌റ്‌സ്‌ത്ത്‌ക്ക് ബേ്ണ്ടി ഒറേപ്പാക്കി ണില്ല്‌സ്‌റാദ്‌മ്. 22ണമ്മ സാമിദ് സൊന്തക്കാറാര് എന്ത്‌മ് ണമാക്ക് ബേ്ണ്ടി സാമി പേ്ണ്‌സി ബെത്തിര്‌ക്കാദ് ഒട്ടുക്ക് കെ്ഡേക്കു എന്ത്‌മ് ഒറേപ്പാക്ക്യ ബേ്ണ്ടി സാമി തന്ന് ണിഗാല്‌ണ അഡ്യാള ആയി മുദതാനെ ണമ്മ് മനേസ്സ്‌ക്ക് തന്തിര്‌ക്കാ്.
23ണിമാണ സണ്ടെ കൊഡുത്ത് സങ്കഡ പഡ്‌സ ബേ്ഡ എന്ത്‌ത്തെ ണാന് കൊരിന്ത്യ പട്ടണാക്ക് ബരാദിര്‌ന്താദ്. ഇദ് സത്ത്യ എന്ത് സാമിക്ക് തെരിദ്. 24ണിമ്മ് ണമ്പിക്കെ എച്ച്‌ള ദിന്‌സ് ആയിര്‌ക്കുഡൊ എന്ത് അദിഗാര കാട്ട്‌റവാരല്ല എമ്മ. ണിമ്മ പിര്യപിര്യാത്ത് ഇര്‌ക്ക്യ ബേ്ണ്ടി ണിമ്മ്‌ദൊപ്പ ബേലെ സെയ്‌രവാര്‌ത്തെ എമ്മ. ണിമ്മ ണമ്പിക്കേലി ഒറേത്ത് ണിന്റിര്‌ക്കേരല്ല.
נבחרו כעת:
2 കൊരിന്ത്യക്കാറാര് 1: സാമിദ് സേദി
הדגשה
שתפו
העתק
רוצים לשמור את ההדגשות שלכם בכל המכשירים שלכם? הירשמו או היכנסו
New Life Literature