Kwan 7
7
Mic pa jotel
1I ndelo ma Musa oyido otieko timo tabenakulo, aka oyido otieko wiro gi mo to loko maleŋ gi gigipiny mere je, kareno otieko wiro gi mo gi loko maleŋ migam gi gigipiny mere je. 2Kenyo Jotel ma Isiraili, jotel ma udi pa kwarere pajo, jotel ma nonin, ma jocungo ri jom'okwan, jowodho mic. 3Jokelo mic pajo ruwaŋ Rwoth, magal aucel m'oboy gi megikwe apar g'ario, magal acel ri kisi jotel ario, kodi merikwa acel ri kisi acel, jokelo jo ruwaŋ tabenakulo. 4Kenyo to Rwoth waco ri Musa ni: 5“Jol gigipiny kwoŋ jo wonyali oro ma timo tic ma Wema ma romo, aka kethi i cingi Jolevi, ri kisi acel cungo kwoŋ tic pere.” 6Ameno Musa okwanyo magalere kodi megikwe to miyo Jolevi. 7Magalere ario kodi merikwa aŋwen go omiyo nyikway Gerisom, cungo kwoŋ tic pajo. 8Magalere aŋwen kodi megikwe aboro go omiyo nyikway Merari, cungo kwoŋ tic pajo, japok tic oyido obedo Ithamar wod pa Aron jacway ri Were i wi migam. 9To go k'omiyo nyikway Kohath gimoro, rupiri oyido omiyo jo tic ma kikwonga gigipiny maleŋ m'oyido jotiŋo i goki jo.
10Jotel bende i ndelo m'owir'iye migam gi mo, jokelo mic ri leŋo mere; jotel joketho mic pajo ruwaŋ migam. 11Rwoth owaco ri Musa ni: “Jobino kelo mic pajo, jatel acel ri ndelo acel, ma loko migam maleŋ.”
12Ŋat'okelo mic pere i ndelo marapena obedo Nason wod pa Aminadab, janono pa Yuda. 13Mic pere obedo sen ma feza ma peko mere oyido timo siringi miya acel gi piero adek. Kalaya acel ma feza ma peko mere obedo siringi piero abirio, cungo kwoŋ pesa ma Kabedo Maleŋ, joje jopoŋ gi moko m'onuŋere m'oruw gi mo ri mic ma kodhi. 14Sen acel ma zahabu ma peko mere obedo siringi apar, m'opoŋ gi buban. 15Rwath acel, wod rombo acel, nyathi rombo acel ma jaoro acel, ma mic awaŋa. 16Wod diel acel ri mic ma cwako reco; 17kodi ri cowirok ma siem, megikwe ario, wot rombo abic, wot diegi abic, kodi wot rombo abic ma jo oro acel. Me obedo mic pa Nason wod pa Aminadab.
18I ndelo mar'ario Nethanel wod pa Zuar, jatel pa Isakar, okelo mic. 19Go okelo mic pere ma sen ma feza acel ma peko mere obedo siringi miya acel gi piero adek, kalaya acel ma feza ma peko mere obedo siringi piero abirio, cungo kwoŋ siringi ma Kabedo Maleŋ. Joje oyido jopoŋ gi moko m'onuŋere m'oruw gi mo ri mic ma kodhi. 20Sen acel ma zahabu ma peko mere obedo siringi apar, m'opoŋ gi buban; 21thwon acel, wod rombo acel, wod rombo acel ma jaoro acel, paka mic awaŋa. 22Wod diel acel paka mic ma cwako reco, 23kodi ri cowirok ma siem, merikwa ario, wot rombo abic, wot diegi abic, gi wot rombo abic ma jo oro acel. Me obedo mic pa Nethanel wod pa Zuar.
24I ndelo mar'adek Eliab wod pa Helon, jatel pa nyikway Zebulun. 25Mic pere obedo sen acel ma feza ma peko mere obedo siringi miya acel gi piero adek. Kalaya acel ma peko mere obedo siringi piero abirio, cungo kwoŋ siringi ma Kabedo Maleŋ. Joje jopoŋ gi moko m'onuŋere m'oruw gi mo ri mic ma kodhi. 26Sen acel ma zahabu ma peko mere obedo siringi apar, m'opoŋ gi buban; 27rwath acel, wod rombo acel, wod rombo acel ma jaoro acel ma mic awaŋa. 28Wod diel acel ri mic ma cwako reco 29kodi ri cowirok ma siem, merikwa ario, wot rombo abic, wot diegi abic, kodi wot rombo abic ma jo oro acel. Me obedo mic pa Eliab wod pa Helon.
30I ndelo mar'aŋwen Elizur wod pa Sedur, jatel pa nyikway Ruben: 31Mic pere oyido obedo sen ma feza ma peko mere obedo siringi miya acel gi piero adek, kalaya acel ma feza ma peko mere obedo siringi piero abirio, cungo kwoŋ siringi ma Kabedo Maleŋ, joje jopoŋ gi moko m'onuŋere m'oruw gi mo ri mic ma kodhi. 32Sen acel ma zahabu ma peko mere obedo siringi apar, m'opoŋ gi buban; 33thwon acel, wod rombo acel, wod rombo acel ma jaoro acel, ri mic awaŋa. 34Wod diel acel ri mic ma cwako reco, 35kodi ri cowirok ma siem, merikwa ario, wot rombo abic, wot diegi abic, kodi wot rombo abic ma jo oro acel. Me obedo mic pa Elizur wod pa Sedur.
36I ndelo mar'abic Selumiel wod pa Zurisaday, jatel pa nyikway Simeo: 37Mic pere obedo sen acel ma feza ma peko mere obedo siringi miya acel gi piero adek cungo kwoŋ siringi ma Kabedo Maleŋ. Joje jopoŋ gi moko m'onuŋere m'oruw gi mo ri mic ma kodhi. 38Sen acel ma zahabu ma peko mere obedo siringi apar, m'opoŋ'iye buban. 39Rwath acel, wod rombo acel, wod rombo ma jaoro acel, ri mic awaŋa. 40Wod diel acel ri mic ma cwako reco, 41kodi ri cowirok ma siem, megikwe ario, wot rombo abic, wot diegi abic, kodi wot rombo abic ma jo oro acel. Me obedo mic pa Selumiel wod pa Zurisaday.
42I ndelo mar'aucel Eliasaf wod pa Duwel, jatel pa nyikway Gad: 43Mic pere obedo sen acel ma feza ma peko mere obedo siringi miya acel gi piero adek. Kalaya acel ma feza ma peko mere obedo siringi piero abirio, cungo kwoŋ siringi ma Kabedo Maleŋ. Joje jopoŋ gi moko m'onuŋere m'oruw gi mo ri mic ma kodhi. 44Sen acel ma zahabu ma peko mere obedo siringi apar, m'opoŋ gi buban. 45Rwath acel, wod rombo acel, wod rombo acel ma jaoro acel ri mic awaŋa. 46Wod diel acel ma mic ma cwako reco, 47kodi ma cowirok ma siem, megikwe ario, wot rombo abic, wot diegi abic, kodi wot rombo abic ma jo oro acel. Me obedo mic pa Eliasaf wod pa Duwel.
48I ndelo mar'abirio Elisama wod pa Amihud, jatel pa nyikway Efrayim: 49Mic pere obedo sen acel ma feza ma peko mere obedo siringi miya acel gi piero adek, kalaya acel ma peko mere obedo siringi piero abirio, cungo kwoŋ siringi ma Kabedo Maleŋ. Joje jopoŋ gi moko m'onuŋere m'oruw gi mo ri mic ma kodhi. 50Sen acel ma zahabu ma peko mere obedo siringi apar, m'opoŋ gi buban; 51rwath acel, wod rombo acel, wod rombo acel ma jaoro acel, ri mic awaŋa. 52Wod diel acel ri mic ma cwako reco, 53kodi ri cowirok ma siem, megikwe ario, wot rombo abic, wot diegi abic, kodi wot rombo abic ma jo oro acel. Me obedo mic pa Elisama wod pa Amihud.
54I ndelo mar'aboro Gamaliel wod pa Pedazur, jatel pa nyikway Manase: 55Mic pere obedo sen acel ma feza ma peko mere obedo siringi miya acel gi piero adek, kalaya acel ma zahabu ma peko mere obedo siringi piero abirio, cungo kwoŋ siringi ma Kabedo Maleŋ. Joje jopoŋ gi moko m'onuŋere m'oruw gi mo ri mic ma kodhi. 56Sen acel ma zahabu ma peko mere obedo siringi apar, m'opoŋ gi buban, 57rwath acel, wod rombo acel, wod rombo acel ma jaoro acel ri mic awaŋa. 58Wod diel acel ri mic ma cwako reco; 59kodi ri cowirok ma siem, megikwe ario, wot rombo abic, wot diegi abic, kodi wot rombo abic ma jo oro acel. Me obedo mic pa Gamaliel wod pa Pedazur.
60I ndelo mar'aŋwen Abidan wod pa Gideon, jatel pa nyikway Benyamin: 61Mic pere obedo sen acel ma feza ma peko mere obedo siringi miya acel gi piero adek, kalaya acel ma feza ma peko mere obedo siringi piero abirio, cungo kwoŋ siringi ma Kabedo Maleŋ. Joje jopoŋ gi moko m'onuŋere m'oruw gi mo ri mic ma kodhi. 62Sen acel ma zahabu ma peko mere obedo siringi apar, m'opoŋ gi buban, 63rwath acel, wod rombo acel, wod rombo acel ma jaoro acel ri mic awaŋa. 64Wod diel acel ri mic ma cwako reco, 65kodi ri cowirok ma siem, megikwe ario, wot rombo abic, wot diegi abic, kodi wot rombo abic ma jo oro acel. Me obedo mic pa Abidan wod pa Gideon.
66I ndelo mar'apar Ahiyeza wod pa Amisaday jatel pa nyikway Dan: 67Mic pere obedo sen ma feza acel ma peko mere obedo siringi miya acel gi piero adek, kalaya acel ma feza ma peko mere obedo siringi piero abirio, cungo kwoŋ siringi ma Kabedo Maleŋ. Joje jopoŋ gi moko m'onuŋere m'oruw gi mo ri mic ma kodhi. 68Sen acel ma zahabu ma peko mere obedo siringi apar, m'opoŋ'iye buban, 69rwath acel, wod rombo acel, wod rombo acel ma jaoro acel, ri mic awaŋa. 70Wod diel acel ri mic ma cwako reco, 71kodi ri cowirok ma siem, megikwe ario, wot rombo abic, wot diegi abic, kodi wot rombo abic ma jo oro acel. Me obedo mic pa Ahiyeza wod pa Amisaday.
72I ndelo mar'apar g'acel Pagiel wod pa Ociran, jatel pa nyikway Aser: 73Mic pere obedo sen acel ma feza ma peko mere obedo siringi miya acel gi piero adek. Kalaya acel ma feza ma peko mere obedo siringi piero abirio, cungo kwoŋ siringi ma Kabedo Maleŋ. Joje jopoŋ gi moko m'onuŋere m'oruw gi mo ri mic ma kodhi. 74Sen acel ma zahabu ma peko mere obedo siringi apar, m'opoŋ'iye buban. 75Rwath acel, wod rombo acel, wod rombo acel ma jaoro acel, ri mic awaŋa. 76Wod diel acel ri mic ma cwako reco, 77kodi ri cowirok ma siem, megikwe ario, wot rombo abic, wot diegi abic, kodi wot rombo abic ma jo oro acel. Me obedo mic pa Pagiel wod pa Ociran.
78I ndelo mar'apar g'ario Ahira wod pa Enan, jatel pa nyikway Nafital: 79Mic pere obedo sen acel ma feza ma peko mere obedo siringi miya acel gi piero adek. Kalaya acel ma feza ma peko mere obedo siringi piero abirio, cungo kwoŋ siringi ma kamaleŋ. Joje jopoŋ gi moko m'onuŋere m'oruw gi mo ri mic ma kodhi. 80Sen acel ma zahabu ma peko mere obedo siringi apar, m'opoŋ'iye buban. 81Rwath acel, wod rombo acel, wod rombo acel ma jaoro acel, ri mic awaŋa. 82Wod diel acel ma mic ma cwako reco, 83kodi ri cowirok ma siem, megikwe ario, wot rombo abic, wot diegi abic, kodi wot rombo abic ma jo oro acel. Me obedo mic pa Ahira wod pa Enan.
84Me obedo mic ma miyirok ri migam, i hongo m'owir'iye gi mo, wok bongi jotel ma Isiraili: Sendere ma feza apar g'ario, kalayere apar g'ario ma feza, sendere apar g'ario ma zahabu, 85kisi sen acel ma feza peko mere oyido obedo siringi miya acel gi piero adek aka kisi kalaya peko mere siringi piero abirio, atewe je ma feza jobedo siringi gana ario gi miya aŋwen cungo kwoŋ siringi ma Kabedo Maleŋ. 86Sendere apar g'ario ma zahabu, m'opoŋ'iye buban, ma peko mere obedo siringi apar kisi acel cungo kwoŋ siringi ma Kabedo Maleŋ, zahabu je ma sendere obedo siringi miya acel gi piero ario. 87Dhok je ri mic awaŋa jobedo rwathe apar g'ario, wot rombo apar g'ario, wot rombo apar g'ario ma jo oro acel, gi mic pajo ma kodhi; kodi wot diegi apar g'ario ri mic ma cwako reco. 88Dhok je ri cowirok ma siem ma jobedo rwathe piero ario g'aŋwen, wot rombo piero aucel, wot diegi piero aucel, wot rombo ma jo oro acel piero aucel. Me obedo mic ma miyirok ri migam, munyo otiek wiro gi mo.
89Munyo Musa odonjo i Wema ma romo luwo gi Rwoth, oyido maro winjo dwondi ma luwo gine wok malo ma giumo ka ŋuto m'oyido nitie i wi Kakan ma Cikirok wok i dier cwec ma jobwombi gin; to luwo gine.
נבחרו כעת:
Kwan 7: DHOPE
הדגשה
העתק
השווה
שתפו
רוצים לשמור את ההדגשות שלכם בכל המכשירים שלכם? הירשמו או היכנסו
Dhopadhola DC Bible © Bible Society of Uganda, 2018.