Kwan 5
5
Ji makoc
1Rwoth oluwo gi Musa, ka waco ni: 2Wodhi or ri Joisiraili wodho woko ma kambi kisi dhano ma jadhowo, kosa ma cwero kwoŋe, kodi kisi dhano makoc m'ogeyo delkwoŋ ŋat'otho. 3Ibino wodho woko jacwo gi dhako, iriem jo woko ma kambi; jokiripi koco kambi pajo, kam'abed'iye i dier jo. 4Joisiraili jotimo ameno, joriemo jo woko ma kambi; paka Rwoth oyido otieko luwo gi Musa, ameno apaka Joisiraili jotimo.
Cul ri gimarac m'otim
5 #
Jolevi 6:1-7
Rwoth oluwo gi Musa, ka waco ni: 6Luw gi Joisiraili, ka jal moro kosa dhako moro otimo ri nyawote marac, turo yeyo gi Rwoth, ŋato bedo jabanja 7aka go ripo tuco reco ma go otimo. Ŋato bino timo cul m'opoŋ ri gimarac, ka medo acel wiy abic kwoŋe, to miyo ŋata go otimo rigo marac. 8Ka ŋat'otim rigo marac k'obedo wat m'inyalo timo rigo cul ri gimarac, cul ri gimarac no bino kidho ri Rwoth ri jacway ri Were i wi migam, medo kwoŋ wod rombo m'itimo gine kwer ma cwako reco ri ŋat'otim rigo marac. 9Kwoŋ kisi mic moro je maleŋ mapa Joisiraili, kisi mic ma jokelo ri jacway ri Were i wi migam bino bedo apere. 10Mic maleŋ moro je labedo apajo, kisi gimoro ma nyatoro omiy jacway ri Were i wi migam labedo apere.
Banjin pa mon m'iparo ni joweco
11Rwoth oluwo gi Musa, ka waco ni: 12Luw gi Joisiraili aka iwaci rijo ni: Ka cipa jal moro otangatanga to bedo ma k'ogeno go; 13ka jal moro onindi gine to cwore bedo ma k'oŋeyo, t'ibedo ma k'oŋey kada go otieko loko kwo pere makoc, aka ongoye jakony kwoŋe rupiri k'omaki go ka timo. 14Kosa cuny ma nyeko obino kwoŋe, to nyeko mako go gi cege m'otieko lokere makoc. Kosa ka cuny ma nyeko obin kwoŋe, aka nyeko omako go gi cege kada go k'olokere makoc. 15Kenyo jalo bino kelo cege bongi jacway ri Were i wi migam. Go bino kelo mic ma mitere rigo, acel wiy apar ma kilo moko ŋano. Go kiripi konjo i wiye mo moro kosa ketho i wiye buban moro, rupiri obedo mic ma kodhi ma nyeko, mic ma thango reco kamaler.
16Kenyo jacway ri Were i wi migam bino kelo go cegin, to miyo go cungo ruwaŋ Rwoth. 17Jacway ri Were i wi migam bino kwanyo pi maleŋ iy'atawo, to kwanyo fukefuke moro manitie i dhiot ma tabenakulo to ketho i pi. 18Jacway ri Were i migam bino miyo dhako no cungo ruwaŋ Rwoth to gonyo wiy dheno, to ketho i cingi dheno. I cinge won jacway ri Were i wi migam lamako pi ma gigipiny makec ma kelo kwoŋ. 19Kenyo jacway ri Were i wi migam bino miyo go kwoŋirok ka waco ni, “Ka jal moro otieko nindo kodin, kafodi ikiwire gi thenge ri koco munyo initie iy'adhum pa cworin, pi ma gigipiny makec me ma kelo kwoŋ wokiri wotim kwoŋin gimoro. 20To k'itieko tado waŋin munyo fodi initie iy'adhum pa cworin, k'itieko kocere aka jal moro ma k'obedo cworin otieko nindo kodin.” 21Jacway ri Were i migam lamiyo dhako no tero kwoŋirok ma lam to waco ri dheno ni, “Rwoth wolokin lam i dier ji perin, nyaseye perin wopodhi, iyin wopodhi woko. 22Onyo weyi pi me ma kelo kwoŋ wodonji i nyagir iyin to miyo iyin podho woko, nyaseye perin wopodhi!” To dhako no dwoko ni, “Ameno, Ameno.”
23Kenyo jacway ri Were i wi migam bino ketho kwoŋ me i ndiko, to lwoko jo woko i pi ma gigipiny makec. 24Jacway ri Were i wi migam bino miyo dhako no madho pi ma gigipiny makec ma kelo kwoŋ aka pi ma kelo kwoŋ bino donjo kwoŋ dheno to kelo litho ma kiwacere. 25Jacway ri Were i wi migam bino kwanyo mic ma kodhi ma nyeko wok i cingi dheno, to tiŋo malo mic ma kodhi no ruwaŋ Rwoth to kelo i migam. 26Jacway ri Were i wi migam bino kwanyo masi acel ma mic ma kodhi, paka adec ma rapoy, to loko yiro i wi migam, aka rumacen to miyo dhako no madho pi. 27K'otieko miyo dhako no madho pi, kenyo nyaka ka otieko loko kwoŋe makoc to bedo jakidakana, pi ma kelo kwoŋ bino donjo kwoŋe to kelo litho ma kiwacere, to iye kwot, kwoŋ pere lapodho, aka dhako no lalokere kwoŋ i dier ji pere. 28To ka dhako no fodi k'okoco kwoŋe to go olony, kenyo ongoye gima latimo go, to go lanyalo gamo iye to nywolo nyithindho.
29Me a cik ka dhawirok obedi, ka dhako opor gicen kafodi nitie iy'adhum pa cwore to kocere, 30kosa ka cuny ma nyeko obino kwoŋ jalo to mako nyeko gi cege; kenyo go bino miyo dhako no cungo ruwaŋ Rwoth, to jacway ri Were i wi migam bino oro cik me je rigo. 31Ibino gonyo jalo kwoŋ reco, to dhako bino tiŋo reco pere.
נבחרו כעת:
Kwan 5: DHOPE
הדגשה
העתק
השווה
שתפו
רוצים לשמור את ההדגשות שלכם בכל המכשירים שלכם? הירשמו או היכנסו
Dhopadhola DC Bible © Bible Society of Uganda, 2018.