2 Petero 3
3
Endagane yʼerĩhĩka lyʼomukama
1Balĩkyetu banze, eyĩ ni barua yʼakabiri ngabasakira. Omwʼĩbĩrĩ syosĩ ngalenga erĩbũkya oko bũlengekanĩa bubuya. 2Mwangibuka ebĩnywa abamĩnyererĩ babũyĩrĩre babũga kera, nʼekihano, kyʼomukama nʼomũlamya, ekyo abakwenda benyũ babaha. 3Nĩkwa mũtsũke eriminya omwatsi ono, oko biro byʼenyũma abasĩnĩngũlĩ basyahuluka, abakakwama esyongumbu syabo. Basyabasĩnĩngũlĩra bati, 4Mwatalaga ati akandisyasa kwehĩ? Abotata wetu babirihola, nĩkwa emyatsi yosĩ ine ngoko yitula okwʼihangikwa lyʼekihugo. 5Kusangwa omugulu bakabũga batya, bakagana eryĩbũkya omwatsi oyũ, ngoko kera Nyamuhanga mwabũga ekĩnywa, neryo olubula nʼekihugo mobyahangikwa. Nʼekihugo mokyahangikwa erĩlũa omo magetsi, 6kandi busana nʼamagetsi. Kandi ekihugo kyʼomugulu oyo mokyaherĩbwa omwʼigunga lyʼamagetsi. 7Nĩkwa olubula lwa sesene, nʼekihugo kya sesene, omo kĩnywa kya Nyamuhanga, bĩbĩkĩre busana nʼerĩhĩsĩbwa omo muliro. Bĩbĩkĩre busana nʼekiro ekyo abandu abatakenga Nyamuhanga basyatswerwa nʼerĩherĩbwa.
8Nĩkwa abanze, simwibirirawe omwatsi muguma oyũ, ngoko Mukama akalangira ekiro kiguma ngʼemyaka elfu nguma (1,000), nʼemyaka elfu nguma (1,000) ngʼekiro kiguma. 9Nĩkwa Omukama sialiamala busana nʼerilaga liwe ngʼabandi ko bakaganĩraya. Nĩkwa akayitsingirira busana nenyũ, ĩsĩanzĩre omundu nʼomuguma akahera, nĩkwa anzĩre abandu bosĩ ibabindula emitima yabo nʼerireka ebibi. 10Nĩkwa Ekiro kyʼomukama kyasyahĩka ngʼomũrahĩ. Oko kiro ekyo, olubula lwasyalũaho omo lukanda lunene, nʼebyosĩ ebyahangikawa omo lubula byasyaka omo muliro, nʼerĩherĩbwa. Nʼekihugo nʼemĩbĩrĩ yakyo byasyahĩsĩbwa. 11Neryo kusangwa emyatsi yosĩ eyĩ yasyaherĩbwa itya, ĩnywe mwangabya bandu bʼomũsĩndo wahi kwehĩ? Mwangabya bandu bʼemigendere ĩbũyĩrĩre nʼerikenga Nyamuhanga. 12Mubye mukalindirira nʼerĩhatanĩa erĩhĩka lyʼekiro kya Nyamuhanga. Oko kiro ekyo, olubula lwasyahĩsĩbwa nʼerihera, nʼebyahangikawa omo lubula byasyanũna omo muliro akalĩre. 13Nĩkwa Nyamuhanga abiritulaga olubula nʼekihugo bihya-bihya, aho ekitunganene kikasiba.
14Neryo abanze, kusangwa mukalindirira emyatsi eyĩ, muyitsinge eribanika embere sya Nyamuhanga ngʼabandu babuya butsira ebĩtĩngũ, Ĩmwĩkere naye buholo. 15Kandi muganze eriyitsingirira lyʼomukama wetu nga ni mugulu wʼerilama. Mũlĩkyetu mwanze Paũlo, mwabasakira atya, omo menge ago Nyamuhanga amuha. 16Kandi Paũlo akasaka atya omo syobarua siwe syosĩ nʼeriahula emyatsi eyĩ. Omo syobarua siwe, hali emyatsi eyĩkalĩre eriminya ndeke. Nĩkwa abandi bandu abatasĩ nʼabatasĩkĩre bakahengemaya emyatsi eyo, ngoko bakahengemaya awandi Masako. Aba bakayiretera erihera.
17Neryo ĩnywe banze, mwabiriminya emyatsi eyĩ, mũyĩtegaye, mukasyahekwa omo luhabo lwʼabandu bʼomwaga, nʼeritoga erĩlũa aho mwabya mũsĩkĩre. 18Nĩkwa mubye mukakula omo lukogo nʼeriminya lyʼomukama nʼomũlamya wetu Yesu Kristo. Ukwʼiye habye olukengerwa, lino, nʼerĩhĩka na kera. Amina.
נבחרו כעת:
2 Petero 3: KB80
הדגשה
העתק
השווה
שתפו
רוצים לשמור את ההדגשות שלכם בכל המכשירים שלכם? הירשמו או היכנסו
Bible in Kinandi © Bible Society of the Democratic Republic of Congo, and Bible Society of Uganda, 1980.