1 Corintios 14
14
Jeme cotspay en jatu'c ajw
1Siguiá̱tca is̈wangawa'n inhermanujat, mit che'nga ayé favojrat is̈moygapay Espíritu Santu, mit más oy pi ajque's̈ca lo que Dios inʉmway. 2Ni'c jeme cotspay en jatu'c ajw igamucotsp jayajwat, po imucotsp Dios ni'c nepʉn iga-entendia̱tp ti inʉmpay, ni'c Espíritu Santu igui-actunʉmp lo que Dios ijtʉpay cuyu'tsic. 3Po jeme i-ajque's̈pay lo que Dios inʉmpay, imucotsp jayajwat pa ma cupʉjca más, i-anima̱tcʉs̈p mit iconsola̱tcʉs̈p. 4Po jeme cotspay en jatu'c ajw, ayé je'yu iwamp iguipʉcwa'n maj. Po jeme i-ajque's̈pay lo que Dios inʉmway, ayé imoygʉs̈p maj cupʉcpajyat.
5Ʉ̱ tʉnwampate nu'pʉjʉn pi cotsca en jatu'c ajwat po más oy pi ajque's̈ca lo que Dios inʉmway, ni'c más oy jeme i-ajque's̈pay lo que Dios inʉmway que jeme cotspay en jatu'c ajw. Mit oy te cotsp en jatu'c ajw, po ma ajque's̈ ti inʉmo'jcʉpay pa iguimoygʉs̈wa'n maj cupʉcpajyat. 6Hermanujat, te tʉnʉs̈p mam mijchat mit te tʉncotsp jatu'c ajw, ¿nat tʉmajyigʉs̈wa'n? Po ʉ̱ tʉnʉmgʉs̈áj lo que Dios tʉs̈actujawipay, tʉ-actu-is̈capcʉs̈áj lo que iyacs̈ta'cway, tʉ-ajque's̈cʉs̈áj lo que Dios inʉmway mit tʉnʉmgʉs̈áj tu'c ama̱s̈an, mit yename tʉmajyigʉs̈wa'n.
7Tu'c guitarra o tu'c flautín ca-ijtʉp vida, po ya̱s̈cap. Po te naga-acya̱s̈p claru, nagajawiyáj ti pieza natuwo'tsp. 8Te tu'c corneta naga-acya̱s̈p claru, ¿nat ini-oyajcʉwa'n tu'c soldaj pa ilucha̱twa'n tsuguini'c? 9We'ney mijchat, te migacotscap claru, ¿nat nas̈jawiwa'n ti inyʉmgapay? Ni'c s̈e'm iguimunʉs̈p lo que inyʉmgapay. 10Mayo'c ajwat i-it en ayʉ̱́j mundu, mit cada ajw inʉmo'jcʉp tu'c cosa. 11Po te tʉnga-entendiá̱tp tu'c pe'ta̱may jayau tʉs̈mucotspay en jatu'c ajw, igajawiyámpey ti tʉnyʉjmapay. 12We'ney mijchat, te inwangap jeme Espíritu Santu is̈moygapay, che'nga ayé favojrat más ojyatway pa is̈moygawa'n maj cupʉcpajyat.
13Jemni'c jeme cotspay en jatu'c ajw ma yo'jta Dios pa i-oyawa'n iguinʉm ti inʉmo'jcʉpay. 14Ni'c te tʉ-ora̱tp en tu'c ajw tʉnga-is̈capay, ʉ̱jyu tʉ-ora̱tp po tʉnga-entendia̱tp ti tʉnyʉmpay. 15¿Ti tʉnwatáj? Mejor tʉ-ora̱táj tʉnjo̱jtugum mit tʉn-entendia̱támpey ti tʉnyo'tpay. Tʉ-ʉwáj mit nu'pʉjʉn tʉnjo̱jt, mit tʉn-entendia̱támpey ti tʉn-ʉ̱pay. 16Te in-oyninʉmgap Dios mijchatu, mit te jem tu'c jayau iga-entendia̱tpay oy, ¿nat iguinʉmwa'n oyo'gu in-ora̱tca? ni'c igajawip ti inyʉmgapay. 17Mijchat oyo'gu-ate is̈nʉ́mgajaj Dios ni'ctiyu̱s̈, po jatu'cway ingamajyigawu pa iguicupʉcwa'n Dios. 18Tʉnyʉjmap Dios ni'ctiyu̱s̈ ni'c tʉncotsp jatu'c ajwat más que nu'pʉjʉn mijchat. 19Po tʉtsʉ̱nawa'n mam cupʉcpajyat, más oy tʉs̈nʉmwa'n cinco palabra tʉn-entendia̱tpay, pa we'n tʉnajque's̈cʉs̈áj japu̱t jayajwat. Más tʉngawamp tʉs̈nʉmwa'n diez mil palabra en jatu'c ajw naga-is̈capay.
20Hermanujat, campensa̱tca as̈am ya̱wájat, solo niwátcʉjʉ as̈am ya̱wájat iganiwatcapay mal, po pensá̱tca as̈am jayajwat itcʉjʉpay edad. 21Ja'yic itsʉ̱na Dios ilibruni'c: “Tʉnajyu'tcʉs̈áj jayajwat, mit imucotscáj en jatu'c ajwat. Po inʉm el Señor: Majawe'naj tʉs̈camaraugáj.” 22Jemni'c nagacotsp en jatu'c ajwat pa ma marauga cupʉcpajyat, po nacotsp en jatu'c ajwat pa jeme cacupʉjcapay ma is̈capcaja Dios ipoder. Mit lo que Dios inʉmway más oy na-ajque's̈cʉ́s̈a cupʉcpajyat, mit caje' pa jeme cacupʉjcapay. 23Jemni'c te nu'pʉjʉn cupʉcpajyat ni-apʉcmujcʉjʉp, mit te nu'pʉjʉn cotscap en jatu'c ajwat, mit te tʉgʉygap jeme ca-entendia̱tcapay mit jeme cacupʉjcapay, inʉmgáj ni'c milocojat. 24Po te nu'pʉjʉn i-ajque's̈cap lo que Dios inʉmway, mit te tʉgʉyp tu'c jayau cacupʉcpay o ca-entendia̱tpay, nimojyʉ̱́j cuenta ni'c je' iwatp mal mit ijawiyámpey ni'c catsʉ̱nap oy ijo̱tni'c, ni'c imarau lo que mijchat inyʉmgapay. 25Mit cuque's̈áj lo que ijtʉpay cuyu'tsic ijo̱tni'c, mit cʉs̈wa'n nicos̈atenda̱jcʉ̱́j mit i-adora̱táj Dios, mit inʉmáj ni'c iyacs̈ta'cway Dios tsʉ̱nap mit mijchat.
26Hermanujat, ayʉ̱́j tʉnʉmgʉs̈ap: Inyi-apʉcmujcʉjʉwa'n, tu'c jayau ma cots salmu, tu'c ma ajque's̈ ama̱s̈an, tu'c jeme ijawipay ma is̈ajque's̈cajac, tu'c ma cots en jatu'c ajw mit jatu'c ma nʉm ti inʉmo'jcʉpay ayé ajw. Po watca nu'pʉjʉn pa is̈moygawa'n maj cupʉcpajyat. 27Te jayajwat cotscap en jatu'c ajw, ma cotsca mechc o hasta tu̱gup jayajwat, mit cʉjtu'c ma cotsca, mit tu'c jayau ma nʉm ti inʉmo'jcʉpay ayé ajw. 28Mit te ca-itp pʉn inʉmámpay ti inʉmo'jcʉpay ayé ajw, nepʉn magacots mam cupʉcpajyat. Mejor cada jayau ma nimucojtsʉ je'yu, mit ma mucots Dios. 29Wename-ey jeme i-ajque's̈capay lo que Dios inʉmway, ma cotsca mechc o tu̱gup, mit japu̱t ajque's̈pajyat ma pensa̱tca te oy lo que ayé jayajwat i-ajque's̈capay. 30Mit te Dios i-actujawip tu'c jayau jeme tsʉ̱napay jem, jeme cojtsʉ'cway ma mo' laj ma cots jatu'c. 31Nu'pʉjʉn mijchat oyap is̈ajque's̈caja lo que Dios inʉmway, po cʉjtu'c ajque's̈ca pa nu'pʉjʉn ma pʉctanga mit pa ma ni-animá̱tcʉjʉ. 32Mit jeme i-ajque's̈capay lo que Dios inʉmway, nidomina̱tcʉjʉp mit imoygap laj jatu'c ma cots. 33Ni'c Dios igawamp ma watca tigapa'tu, je' iwamp ma it orden.
Mit wename ma watca templuni'jcat mam itsʉ̱nga Dios ijayajwat. 34Into's̈ajyat magacotsca mam inyi-apʉcmújcʉjʉ, ni'c ca-oy icotscawa'n, po ma jayaumayga as̈am iguinʉm Dios iley. 35Mit te iwangap iguipʉctangawa'n tanti, ma ucyo'tca ina'jwat itʉcmat, ni'c ma̱lo'c te tu'c to's̈ay cotsp mam inyi-apʉcmújcʉjʉ.
36¡Ti! ¿Is̈jawiga ni'c Dios ipalabra chu̱chiu mam mijchat? ¿Is̈jawiga pa mijchatu icojy? Ayé caje' pa mijchatu. 37Te tambʉn ipensa̱tp ni'c oyap igui-ajque's̈a lo que Dios inʉmway, o te ipensa̱tp ni'c ijtʉp Espíritu Santu, ma jawi ni'c el Señor imanda̱t lo que tʉja'ygʉs̈apay. 38Po jeme igawatpay cuenta ayʉ̱́j, nepʉney magawat cuenta je'.
39Jemni'c hermanujat, che'nga pa is̈ajque's̈cawa'n lo que Dios inʉmway, mit camatújca nepʉn jeme cotspay en jatu'c ajw. 40Po watca nu'pʉjʉn decente mit orden.
હાલમાં પસંદ કરેલ:
1 Corintios 14: PSNT
Highlight
નકલ કરો
Compare
શેર કરો
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].