1 Corintios 15
15
Jutucta̱c Cristu
1Mit jinap hermanujat, tʉ-actunijawigʉs̈p ayé oyway noticia jeme tʉnyʉmdacyo'yway mam intsʉ̱nga, mit mijchat impʉctsougawey ayé oyway noticia, mit ayé inmutangap mʉgʉc. 2We'ney minisalva̱tcʉjʉ̱́j te insiguia̱tcajap ayé oyway noticia tʉnyʉmdacyo'yway mam intsʉ̱nga. Minisalva̱tcʉjʉ̱́j te migacupʉjcawu jalmanu.
3Primeru tʉ-ajque's̈cʉs̈au nije'yu jeme Dios tʉs̈moyway, ni'c Cristu o'c pa iguitso'cwa'n nama̱jlat as̈am itsʉ̱na ja'yic Dios ilibruni'c. 4Mit je' ini̱pcau, mit jutucta̱c imutu̱gupay s̈ʉjw as̈am itsʉ̱na ja'yic Dios ilibruni'c. 5Mit ique's̈ta̱jcau Pedro, mit cʉs̈ ique's̈ta̱jcʉs̈au ayé apóstojlat. 6Mit cʉs̈ ique's̈ta̱jcʉs̈au más de quinientos hermanujat jeme tsʉ̱ngaway apʉcmuguic, mit mayo'c je'jat tsʉ̱ngapnaj mit ja-una̱c o'jcaway. 7Mit cʉs̈ ique's̈ta̱jcau Jacobo, mit cʉs̈ ique's̈ta̱jcʉs̈au nu'pʉjʉn apóstojlat.
8Mit más últimu de nu'pʉjʉjnat tʉs̈que's̈ta̱jcau ʉ̱, mit ʉ̱ mayo'c tiempu inas̈ hasta tʉs̈cupʉjc. 9Ni'c ʉ̱ más tʉmenus de nu'pʉjʉn apóstojlat, mit tʉs̈camerecia̱tpate tʉs̈yagáj Dios pa apóstol ni'c tʉmpo'ctangʉs̈ Dios icupʉcpajyat. 10Po Dios tʉs̈moy may favor tʉ̱ját apóstol. Mit Dios tʉs̈camoyu favor jalmanu, po tʉyos̈wat más mʉgʉc que nu'pʉjʉn apóstojlat. Po caje' ʉ̱ tʉyos̈watp, Dios tʉs̈moy favor pa tʉyos̈wat. 11Ni'c te ʉ̱ o te je'jat, nije'yu tʉnajque's̈cau ni'c Cristu jutucta̱c, mit mijchat incupʉjcau ayé.
Jutucta̱jcáj á̱nimajat
12Mit te tʉnyʉmdacyo'ygap ni'c Cristu jutucta̱c mam itsʉ̱nga á̱nimajat, ¿tini'cpaj is̈nʉmga cʉjtu'c mijchat ni'c cajutucta̱jcáj á̱nimajat? 13Ni'c te inyʉmgap ni'c cajutucta̱jcáj á̱nimajat, Cristu cajutucta̱gu-ey, 14mit te Cristu cajutucta̱gu, jalmanu tʉnyʉmdacyo'ygapay, mit we'ney jalmanu incupʉ́jcaj. 15Mit inʉmgáj ni'c tʉnga-ajque's̈cap iyacs̈ta'cway lo que iwatway Dios, ni'c tʉnyʉmgau ni'c Dios i-acjutucta̱c Cristu, po te iyacs̈ta'cway á̱nimajat cajutucta̱jcáj, Dios iga-acjutucta̱gu-ey Cristu. 16Ni'c te á̱nimajat cajutucta̱jcáj, we'ney Cristu cajutucta̱gu. 17Mit te Cristu cajutucta̱gu, jalmanu incupʉ́jcaj, mit miyo'ygapnaj mal. 18Te wename is̈nʉmga, o'guijcatway icupʉjcaway Cristu, togoyijcat itsʉ̱nga. 19Te en ayʉ̱́j vidajyu nas̈atsʉ̱́nga Cristu, ʉjtsat natsʉ̱ngájate más triste que nu'pʉjʉn jayajwat.
20Po jinap Cristu jutucta̱cway mam itsʉ̱nga á̱nimajat, mit como je' jutucta̱jcʉ'c, jinap itpey ti ijutucta̱jcawa'n jeme o'guijcatway. 21Ni'c como na-o'jcap ni'c tu'c jayau inʉ'jy Adán iwat mal, we'ney najutucta̱jcáj ni'c tu'c jayau inʉ'jy Cristu iwat oy. 22Ni'c como nu'pʉjʉn jayajwat o'jcap ni'c je'jat Adán ifamiliajat, we'ney nu'pʉjʉn jeme icupʉjcapay Cristu itcʉjʉ̱́j vida. 23Po cada cosa jatp itiempuni'c. Cristu primeru jutucta̱jcʉ'c, mit imi'nwa'n je', jutucta̱jcámpey jeme icupʉjcaway je'. 24Icojawa'n últimu s̈ʉjw, Cristu icʉs̈pʉ'náj nu'pʉjʉn jeme manda̱tcapay, nu'pʉjʉn autoridajat mit jeme itcʉjʉpay poder en ayʉ̱́j mundu, mit cʉs̈wa'n i-entrega̱jtáj pa ma manda̱t Dios Nate̱jat. 25Ni'c Cristu itp ti imanda̱twa'n hasta iguivencia̱tcʉs̈wa'n nu'pʉjʉn imutsuguijnat. 26Mit cʉs̈wa'n i-actogoynú̱j últimu mutsuguin, ayé inʉmo'jcʉp ayé poder nas̈ago'cpay. 27Ni'c Dios imoy poder Cristu ma manda̱t nu'pʉjʉn cosajat. Dios inʉm ilibruni'c ni'c je' imoy poder Cristu ma manda̱t nu'pʉjʉn cosajat, po Cristu ca-oyap iguimanda̱t Dios jeme iguimoyway poder. 28Mit cʉs̈wa'n Cristu iguimanda̱t nu'pʉjʉn cosajat, wenajpu'n je' niyajcʉnú̱mpey ma iguimanda̱tac ite̱t Dios jeme iguimoyway nu'pʉjʉn poder, pa we'n Dios imanda̱táj nu'pʉjʉn cosajat.
29Itp jayajwat ninʉ'gutemgʉjʉpay pa i-á̱nimajat. Po te inyʉmgap ni'c nunca cajutucta̱jcáj á̱nimajat, ¿tini'c ininʉ'gutémgʉjʉ pa i-á̱nimajat?
30¿Mit tini'c ʉjtsat tʉtsʉ̱́nga en peligru cada hora te nagajutuccta̱jcáj? 31Cada s̈ʉjw tʉtsʉ̱́na en peligru pa tʉ-o'cwa'n po ji'cp tʉnjo̱jt ni'c nacupʉjcap el Señor Jesucristu, mit tʉjura̱tp ni'c iyacs̈ta'cway ayé. 32Por ejemplu, tʉntunas̈ nʉ'jcopac Efeso as̈am tʉlucha̱tway mit aníma̱jtat ma̱jlatway. Po te á̱nimajat cajutucta̱jcáj, ¿pa ti tʉs̈servia̱jtap ayé lucha? Mejor nacáyga, na-ú̱jca, ni'c jobom na-o'jcawa'n.
33Pi is̈cawe̱jta̱jcac nepʉn. Te namunipʉjcʉjʉp maljayajwat, oyap nas̈actogoygap. 34Pensá̱tca pa inyo'ygawa'n yacs̈ic mit camwatca mal, ni'c cʉjtu'c mijchat inga-is̈capcap oy Dios. Tʉnʉmgʉs̈ap ayʉ̱́j pa pi winchú̱gaga.
¿Nat ijutucta̱jcawa'n á̱nimajat?
35Po tambʉn i-ucyo'táj: “¿Nat ijutucta̱jcawa'n á̱nimajat? mit ¿ti cuerpu itcʉjʉ̱́j?” 36Tonto ayé i-ucyo'tpay we'n. Ayé semilla camajta'gáj te capu̱jtsʉ'cp. 37Inyi̱pcawa'n, ingani̱pcap ayé forma pichinámpay, po inyi̱pcap tu'c semilla, te trigu-semilla o jatu'c semilla. 38Po Dios imoyp iforma ayé mata as̈am je' iguiwa'n, mit cada semilla i-acye'cp nat ijatwa'n. 39Nu'pʉjʉn cuerpu caje' nije'yu, mayo'c clase i-it. Itp jayau, itp aníma̱t, itp acs̈, itp jojn, po nu'pʉjʉn tígatsijcat icuerpujat. 40Jeme itpay tsajpni'c mit jeme itpay na̱s̈ni'c is̈ta'c tígatsijcat. Mit oymanac jeme itpay tsajpni'c po jeme itpay na̱s̈ni'c, jatu'c forma i-oymanagui. 41Mit tígatsijcat ita'cs̈ca s̈ʉjw, po' mit ma̱jtsat, mit tu'c ma̱jts ta'cs̈p más oymanac que jatu'c. 42We'ney á̱nimajat ijutucta̱jcawa'n. Ayé cuerpu nani̱pay pu̱tstogoyáj, po ijutucta'cwa'natu, cajatogoyáj nunca. 43Ayé cuerpu nani̱pay caja-ijtʉp valor, po oymanac ijutucta'cwa'n. Ayé cuerpu nani̱pay caja-ijtʉp maj, po jutucta'gájatu mit maj. 44Nani̱p tu'c cuerpu na̱s̈ni'cway po ijutucta'cwa'n, ijtʉ̱́j tu'c cuerpu tsajpni'cway. Itp cuerpu na̱s̈ni'cway mit itp cuerpu tsajpni'cway.
45We'ney itsʉ̱na ja'yic Dios ilibruni'c: “Dios iwajtʉ'c primer jayau Adán mit imoy vida.” Po Cristu ijtʉp poder pa nas̈moygáj vida cacʉs̈ámpay, ni'c Adán nas̈actogoygau po Cristu nas̈salva̱tcau. 46Jinap na-aguep tu'c vida na̱s̈ni'cway, mit cʉs̈wa'n na-aguepáj tu'c vida tsajpni'cway. 47Primer jayau ayé na̱s̈ni'cway, mit watic mit na̱s̈. Mit jatu'c jayau min tsajpni'c, ayé el Señor Jesucristu. 48Jeme tsʉ̱ngapay en ayʉ̱́j na̱s̈, wátijcat as̈am Adán ituwatcaway na̱s̈. Jeme tsajpni'jcatway je'jat as̈am Cristu jeme minway tsajpni'c. 49Jinap naque's̈cap as̈am ayé jayau na̱s̈ni'cway, mit naque's̈cámpey as̈am ayé jayau jeme minway tsajpni'c.
50Po hermanujat ayʉ̱́j tʉnʉmgʉs̈ap, ni'c nacuerpujat na-aguepcapay jinap ca-oyáj itʉgʉy tsajpni'c mam imanda̱t Dios, ni'c nacuerpujat watic s̈is̈ mit nipin. Ni'c jeme togoypay ca-oyáj itsʉ̱na mit jeme catogoypay. 51Márauga, tʉ-actujawigʉs̈áj lo que Dios ijtʉway cuyu'tsic. Iyacs̈ta'cway naga-o'cpʉ'ngáj po tigatsáj naformajat nanu'pʉjʉjnat, 52mit ayʉ̱́j jatáj pe'bet, en tu'c winapi'chta'c. Mit jatáj iya's̈wa'n trompeta últimu s̈ʉjw. Ni'c ya's̈áj tu'c trompeta mit á̱nimajat jutucta̱jcáj mit cajatogoygáj nunca, mit ʉjtsat tigatsáj naformajat. 53Mit nacuerpujat jeme togoyámpay itp ti ijatwa'n jeme catogoyámpay. Mit jeme o'gámpay itp ti ijatwa'n jeme ca-o'gámpay. 54Mit cuandu ayé togoyámpay ijatwa'n jeme catogoyámpay, mit jeme o'gámpay ijatwa'n jeme ca-o'gámpay, wenajpu'n cumplia̱táj jeme tsʉ̱napay ja'yic Dios ilibruni'c: “Cʉs̈way ayé poder nas̈ago'jcapay. 55Jinap togoyway ayé poder nas̈ago'cpay, mit nagajatsʉ̱ngáj pa siempre á̱nimacʉtni'c.” 56Na-o'jcap ni'c nawatcap mal, mit nawatcap mal ni'c nagajayaumygajap Dios iley. 57Po nanʉ́mgaja Dios ni'ctiyu̱s̈ ni'c nagajapʉ̱tcáj na-o'jcawa'n, ni'c el Señor Jesucristu ivencia̱t ayé poder nas̈ago'cpay.
58Tʉnhermanujat tʉwangʉs̈pay, jemni'c siguiá̱tca mʉgʉc mit camcuyaguiga lo que incupʉjcapay. Watí̱jca ayé yos̈ is̈moygaway el Señor. Injawigap ni'c caje' jalmanu ayé yos̈ inwatcapay pa el Señor.
હાલમાં પસંદ કરેલ:
1 Corintios 15: PSNT
Highlight
નકલ કરો
Compare
શેર કરો
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].