1 Corintios 12
12
Lo que Espíritu Santu iyacpay
1Hermanujat, tʉnwamp pi jawiga lo que Espíritu Santu nas̈moygapay pa nas̈watcawa'n.
2Injawigap ni'c cuandu miganicupʉjcap, jʉmgapa'tu incunʉs̈iga pa is̈adora̱tcawa'n ayé tiyu̱s̈at cacotscapay. 3Jemni'c tʉ-actujawigʉs̈ ni'c jeme ijtʉpay Dios i-Espíritu ca-oyap iguitucots Jesús. Mit te tu'c jayau inʉmp ni'c Jesús nas̈manda̱tcap, ayé ni'c Espíritu Santu igui-actunʉmp.
4Mit Espíritu Santu tigatsic nas̈moygap ti nawatcámpay, po ayé nije'yu Espíritu iyacp. 5Mit el Señor tígatsiguey iguimo' cada jayau iyos̈, po nije'yu el Señor iyacp. 6Mit itp mayo'c modoo panayos̈watwa'n, po nije'yu Dios nas̈actuwatcap nu'pʉjʉn. 7Mit Espíritu Santu i-actujawip cada jayau ti yos̈ iwatámpay, pa nu'pʉjʉn jayajwat ma tsʉ̱nga oy. 8Ni'c Espíritu Santu imoyp tu'c jayau pa icotswa'n oy pa nas̈actu-is̈capcáj, jatu'c jayau imoyp pa nas̈actujawigáj, po nije'yu Espíritu iyacp. 9Mit nije'yu Espíritu imoyp tu'c jayau ma cupʉc mʉgʉc. Mit nije'yu Espíritu imoyp jatu'c jayau ma ac-oytan tu'nijatway. 10Mit Espíritu Santu imoyp jatu'c jayau ma wat milagrujat, jatu'c jayau imoyp ma ajque's̈ lo que Dios inʉmpay, jatu'c imoyp ma is̈cap jeme we̱tcapay mit jeme itcʉjʉpay Espíritu Santu iyacs̈ta'cway, jatu'c imoyp ma cots en jatu'c ajwat, mit jatu'c imoyp ma nʉm ti inʉmo'jcʉpay ayé ajwat. 11Po nu'pʉjʉn ayʉ̱́j cosajat iwatp nije'yu Espíritu, mit je' imoyp favor cada jayau as̈am je' iguiwa'n.
12Mit Cristu itumuquips̈p as̈am nacuerpu, ni'c nacuerpu ijtʉp mayo'c partejat, po majamayo'gaj, ayé tsʉ̱nap en tu'gu cuerpu. 13Mit tu'gu Espíritu nas̈acjatcau as̈am tu'jcatu, te judíujat, te griegujat, te mozojat o te yo'ygapay libre. Mit Dios nas̈moygau nanu'pʉjʉjnat nije'yu Espíritu.
14We'ney nacuerpu ijtʉp mayo'c parte, caje' tu'gujyu. 15Te inʉmp nata'n: “Tʉgaje' cuerpuni'cway ni'c tʉgaje' cʉ'”, ¿is̈jawiga caje' tu'c parte nacuerpuni'cway? 16Mit te inʉmp nata̱tsʉc: “Tʉgaje' cuerpuni'cway ni'c tʉgaje' wijn”, ¿is̈jawiga caje' tu'c parte nacuerpuni'cway? 17Te nu'pʉjʉn nacuerpu tu'gu wijn, ¿nat namarawa'n? Te nu'pʉjʉn nacuerpu tu'gu ta̱tsʉc, ¿nat nas̈u'cwa'n te naga-aguep najʉjp? 18Po jinap Dios iyac cada parte nacuerpuni'c as̈am je' iguiwajn. 19Ni'c te nu'pʉjʉn parte nacuerpu tsʉ̱nap s̈is̈cada'guic, ¿nat itsʉ̱nawa'n nacuerpu? 20Jinap na-aguepcap may partejat nacuerpuni'c po en tu'gu cuerpu itsʉ̱na.
21Nawijn ca-oyap iguinʉjma nacʉ': “Tʉganesita̱tp.” We'ney nacopac ca-oyap iguinʉjma nata'jnat: “Tʉganesita̱tcʉs̈p mijchat.” 22Mit ayé partejat nacuerpuni'cway jeme que's̈pay ni'c más débil, ayé más nanesita̱tcap. 23Mit ayé partejat nacuerpuni'cway jeme más menusway más na-adorna̱tcap. Mit ayé parte ca-oyque's̈pay, más nacuida̱tcap, 24mit ayé parte jeme oyque's̈pay, más nagacuida̱tcap. Po Dios iwatp nacuerpu mit más i-oyninʉm ayé parte jeme más ca-oyque's̈pay, 25pa ma tsʉ̱na nu'tsic nacuerpu, pa nu'pʉjʉn partejat ma nicuida̱tcʉjʉ is̈ta'c. 26Jemni'c te tu'c parte itunas̈p, nu'pʉjʉn partejat itunas̈capey. Mit te tu'c parte oyninʉmic, nu'pʉjʉn parte tsʉ̱ngáj oy.
27Mijchat as̈am Cristu icuerpu, mit cada jayau ijtʉp parte mit Cristu. 28Mit Dios imoygʉs̈p iyos̈at cada cupʉcpay. Primeru iyac apóstojlat, cʉs̈ profetajat, cʉs̈ ajque's̈pajyat, cʉs̈ iwatcapay milagrujat, cʉs̈ i-ac-oytangapay tu'nijatway. Iyajcʉs̈ey jeme majyigapay, jeme tsʉ̱ngapay encargá̱tic mit jeme cotscapay en jatu'c ajwat. 29¿Is̈jawiga Dios iyajcʉs̈ nu'pʉjʉn jayajwat pa apóstojlat? ¿Iyac nu'pʉjʉn pa profetajat? ¿Iyac nu'pʉjʉn pa ajque's̈pajyat? ¿Is̈jawiga nu'pʉjʉn iwatcap milagru? 30¿Is̈jawiga iyac nu'pʉjʉn pa ma ac-oytanga tu'nijatway? ¿Is̈jawiga nu'pʉjʉn cotscap en jatu'c ajwat? ¿Is̈jawiga nu'pʉjʉn inʉmgap ti inʉmo'jcʉpay ayé ajwat? 31Más oy pi yo'tcaja Dios jʉmay yos̈ más oy inwatcámpay. Mit tʉ-ajque's̈cʉs̈ámnaj tu'c to̱u más oyway.
હાલમાં પસંદ કરેલ:
1 Corintios 12: PSNT
Highlight
નકલ કરો
Compare
શેર કરો
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].