1 Corintios 11
11
1Watca as̈am ʉ̱ tʉs̈wat, ni'c ʉ̱ tʉnwatpey as̈am Cristu iguiwajt.
Nat iniporta̱tcʉjʉwa'n to's̈ajyat
2Hermanujat, tʉ-oyninʉmgʉs̈p ni'c siempre is̈nijawigap, mit inwatcapnaj lo que tʉ-ajque's̈cʉs̈away. 3Po tʉnwamp pi jawiga ni'c Cristu ayé imanda̱tpay nu'pʉjʉn jayajwat, mit tu'c jayau más manda̱tp que tu'c to's̈ay, mit Dios imanda̱tp Cristu. 4Cada jayau jeme ora̱tpay mit jeme i-ajque's̈pay lo que inʉmpay Dios, te icutucp icopac, ayé tu'c winchu̱jc pa je'. 5We'ney cada to's̈ay jeme ora̱tpay o i-ajque's̈apay lo que inʉmpay Dios, te igacutucp icopac, ayé tu'c winchu̱jc pa je'. Ni'c ni-as̈amu ique's̈wa'n mal te icupe̱p nu'pʉjʉn icuajy. 6Ni'c te tu'c to's̈ay canigutujcʉp, ma nigupe̱jʉ-ey. Po te tu'c to's̈ay winchu̱gap inigupe̱jʉwa'n o iguipe̱tucwa'n nu'pʉjʉn icuajy, más oy ma nigutujcʉ. 7Po tu'c jayau magacutuc icopac ni'c je' iguiwat Dios, mit je' oyninʉmic ni'c iservia̱jtap Dios, po tu'c to's̈ay oyninʉmic ni'c iservia̱jtap jayau. 8Ni'c Dios iwajtʉ'c jayau, mit cʉs̈ nije'yu jayau ituwat to's̈ay. 9Mit we'ney Dios igawatu jayau pa iguiservia̱jtawa'n to's̈ay, iwat to's̈ay pa iguiservia̱jtawa'n jayau. 10Jemni'c tu'c to's̈ay jeme jayaumaypay ma cutuc icopac. Ma watca we'n as̈am ángejlat ijayaumayga. 11Po jeme icupʉjcapay el Señor ma jawiga ni'c tu'c jayau ca-oyap itsʉ̱na sin to's̈ay, mit tu'c to's̈ay ca-oyap itsʉ̱na sin jayau. 12Ni'c as̈am to's̈ay chu̱chiu por jayau, jinap tu'c jayau itp por to's̈ay, po Dios iwatp nu'pʉjʉn.
13¿Nat is̈jawiga mijchat? ¿Oy tu'c to's̈ay igui-ora̱jtawa'n Dios mit cacutuguic icopac? 14Nu'pʉjʉn ijawigap ni'c tu'c winchu̱jc te tu'c jayau i-acye'cp yagats icuajy. 15Po tu'c to's̈ay oyque's̈p te i-acye'cp icuajy, ni'c ijtʉp icuajy pa iguicutucwa'n icopac. 16Po te jatu'c jayau iwamp iguidiscutia̱twa'n ayʉ̱́j asuntu, tʉnga-aguepcap jatu'c costumbre, ne Dios icupʉcpajyat.
I-abusa̱tcap ayé cena
17Mit jinap tʉja'ygʉs̈ap ni'c ingawatcap oy. Cuandu inyi-apʉcmújcʉjʉ, migajatcap más oy, po mijatcap más pior. 18Primeru tʉnyʉjmʉ'cp ayʉ̱́j: Cuandu inyi-apʉcmújcʉjʉ pa inadora̱tcawa'n, tʉnmarap ni'c inaguepcap división, mit tʉs̈jawi iyacs̈ta'cway ayé. 19Ni'c itp i-itwa'n división mam intsʉ̱nga, pa we'n na-is̈capáj jeme icupʉjcapay iyacs̈ta'cway. 20Cuandu inyi-apʉcmújcʉjʉ, ingawatcap ayé cena as̈am el Señor iguimanda̱t, 21ni'c cada jayau u̱cma̱p itu'gumu, mit jatu'c jayau cayo'jcʉp, mit jatu'c mu̱jcʉp. 22¡Ti! ¿Inga-aguepcap intʉjcat mam incaygawa'n mit in-u̱jcawa'n? Mijchat inyajcajap mal Dios itemplu, mit inacwinchu̱cta̱jcap jeme ca-itcʉjʉpay neti. ¿Ti tʉnʉmgʉs̈áj? ¿Is̈jawiga tʉ-oyninʉmgʉs̈áj? Ʉ̱ ca-oyap tʉ-oyninʉmgʉs̈ en ayʉ̱́j asuntu.
Nat ichu̱chij ayé cena
23Ni'c el Señor tʉs̈moy lo que tʉ-ajque's̈cʉs̈away, ni'c en ayé tsu' cuandu iguito'ctʉ́gʉygaj el Señor Jesús, ipʉc tu'c ma̱s̈anʉ̱n, 24mit iguinʉ́jmaj Dios ni'ctiyu̱s̈, i-emgada̱c mit inʉm: “Pʉctsóuga mit cáyga ni'c ayʉ̱́j ma̱s̈anʉ̱n as̈am tʉncuerpu, mit ayé tʉnyacp pa mijchat. Watí̱jca ayʉ̱́j pa pi is̈nijawigac ʉ̱.” 25Icʉ́s̈caj u̱cma̱pay, ipʉguey tu'c vasu mit inʉm: “Lo que ijtʉpay ayʉ̱́j vasu, ayé as̈am tʉnyipin, ni'c tʉntuwat tu'c nam acuerdu. Watí̱jca ayʉ̱́j cada is̈tu-u̱jcawa'n pa pi is̈nijawigac ʉ̱.” 26Ni'c cada vez is̈caygawa'n ayé ma̱s̈anʉ̱n, mit is̈tu-u̱jcawa'n ayé vasu, inactujawigap jayajwat ni'c je' o'c pa iguitso'cwa'n nama̱jlat. Watí̱jca ayé hasta imi'nwa'n el Señor.
Nat iguiwatcawa'n ayé cena
27Pʉmba'tu jeme icayámpay ayé ma̱s̈anʉ̱n mit itu-u'gámpay el Señor ivasu, te igawatp as̈am imerecia̱t, tsʉ̱náj culpa̱tic ni'c iyajcau mal el Señor icuerpu mit inipin. 28Jemni'c tu'c jayau ma e'jpʉ'c te yo'yp oy, mit cʉs̈wa'n ma cáyama ayé ma̱s̈anʉ̱n mit ma tu-u'gama ayé vasu. 29Ni'c jeme caypay mit jeme u̱cpay, te igawatp as̈am imerecia̱t, tsʉ̱náj castiga̱tic ni'c cayp mit u̱cp wename, ni'c igapensa̱tp ni'c ayé as̈am el Señor icuerpu. 30Jemni'c mayo'c mijchat mitu'nijat mit inga-aguepcap maj, mit mayo'ganu i-o'jca. 31Ni'c te na-e'jpʉ'jcap te nayo'ygap oy, Dios nas̈cacastiga̱tcáj. 32Po cuandu nas̈castiga̱tcap Dios, ayé ni'c nas̈acyacs̈cap pa nagatsʉ̱nga condena̱tic as̈am jayajwat ayʉ̱́j mundujway.
33Jemni'c hermanujat, cuandu inyi-apʉcmújcʉjʉ pa incaygawa'n, ni-atsʉ̱́ngʉjʉ. 34Te tu'c jayau cayo'jcʉp, ma cay itʉcm, pa we'n Dios is̈cacastiga̱tcáj cuandu inyi-apʉcmújcʉjʉ. Mit japu̱t asuntujat tʉnʉmgʉs̈áj cuandu tʉmi'nwa'n.
હાલમાં પસંદ કરેલ:
1 Corintios 11: PSNT
Highlight
નકલ કરો
Compare
શેર કરો
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].