Johane 14
14
1 #
Joh 14:27; Mk 11:22 Myoyo yanu itapengi, kamusyoma Leza, kamundisyoma amebo, 2Muŋanda ya-Taata mwaali makalilo manji, nekwatali boobo nenda mwaambila nkaambo ndiya kukumubambila busena, 3#Joh 12:26; 17:24Kuti na ndainka kuyoomubambila busena ndiyooboola alimwi, nzoomutolelele, kuti oko nkwembede anywebo mukabe nkuko. 4Alimwi oko nkwenja mulikuzi, ayalo nzila iiya nkuko muliizi. 5Tomaso wakamwaambila kuti, O mwami, tatuzi nkoya, ino twiizibe buti nzila? 6#Heb 10:20; Mt 11:27; Joh 11:25; Rom 5:1,2Jesu wakamwaambila kuti, Ndime nzila, ndime bwini, ndime buumi. Takukwe uuza kuli-Taata, pele mulindime. 7Kuti nomwali kundizi, nomumuzi awalo Taata, pele kutalika sunu mulimuzi, mulimubwene, 8Filipo wakamwaambila kuti, O mwami, tubonye Uso, kwalo nkotuyandisya. 9#Joh 12:45; Heb 1:3; Mt 17:17Jesu wakamwaambila kuti, Cakomenesya buti ciindi ncotwakali ayebo, Filipo, tonandiziba asunu na? Oyo uwandibona, wamubona awalo Taata, eno uambilanzi kuti, Tubonye Uso? 10#Joh 12:49Sena tosyomi kuti mebo ndili muli-Taata, awalo Taata uli mulindime? Majwi ngendamwaambila nsilyaambili ndemwini, pele Taata uukede mulindime nguucita milimo yakwe mwini. 11#Joh 14:20; Joh 10:25,38Amundisyome kuti ndili muli-Taata, awalo Taata uli mulindime, nokutabi boobo amundisyome nkaambo kamilimo yalo. 12#Mk 16:19,20Ncobeni ndamwaambila kasimpe, Oyo uundisyoma, uyoocita milimo iili mbuli njencita, mane do akiicite mipati iinda eyi, nkaambo ndiya kuli-Taata. 13#Joh 15:7; Mk 11:24; 1 Joh 5:14Eno coonse icili buti ncomuti kakumbile muzina lyangu ndiyoocicita, kuti Taata akalumbaizigwe mu-Mwanaakwe, 14#Joh 16:23,24Kufumbwa ncomuyookumbila muzina lyangu, ndiyoomucitila ncico. 15#Joh 15:10; 1 Joh 5:3Mwanoondiyanda, kamubamba milao yangu. 16#Joh 14:26; 15:26; 16:7; 1 Joh 2:1Amebo ndiyookumbila Taata, uyoomupa Mugwasyi umbi kuti akale anywebo lyoonse. 17#Joh 7:39; 16:13; Mt 10:20; Rom 8:26Ngonguwe Muuya wabwini, oyo inyika ngwiitakonzya kutambula, nkaambo tiimuboni nekuba kumuziba. Nywebo mulimuzi, nkaambo ulikede anywebo, alimwi unookede mulindinywe. 18Nsikooyoomusia mbuli bamusyaala, ndileza kulindinywe. 19#Joh 16:16Kwasyaala ciindi ciniini, inyika tiicindiboni limbi, pele nywebo mulandibona, Nkaambo ndi muumi, anywebo munooli baumi. 20#Joh 17:21-23Elyo zuba muyooziba kuti ndili muli-Taata, anywebo muli mulindime, amebo ndili mulindinywe. 21#2 Kor 3:18; 1 Joh 5:3Oyo uujisi milao yangu, akwiibamba nguundiyanda, Awalo uundiyanda uyooyandwa Taata, amebo ndiyoomuyanda, ndiyoolitondezya kulinguwe. 22#Inc 10:41Judase (kutaamba Iskariote) wakamwaambila kuti, O mwami, nkaambo kanzi ncoyooliyubulula kulindiswe, kutali kunyika? 23#Joh 13:34; 14:21; Tus 8:17; Mt 18:20; 28:20; Ef 3:17; 2 Kor 6:16Jesu wakavuwa kuti, Na muntu ulandiyanda unoobamba ijwi lyangu, awalo Taata ulamuyanda, tulasika kulinguwe, tukakale awalo, 24#Joh 7:16; 1 Joh 2:5Oyo uutandiyandi tabambi majwi aangu, alyalo ijwi ndomumvwa talili lyangu, pele ndilya-Taata uwakandituma.
25Ndamwaambila makani aya, nencili anywebo. 26#Joh 14:16; Mt 10:19Pele Mugwasyi, Muuya Uusalala, Taata ngwayootuma muzina lyangu, uyoomwiisya zintu zyoonse, uyoomuyeezya zyoonse nzendakamwaambila. 27#Joh 1:16,33; Flp 4:7Ndamusiila luumuno, ndamupa luumuno lwangu, nsimupi mbuli mbwiipa nyika, Myoyo yanu itapengi nokuba kuyoowa. 28#Joh 14:3,6,18; Lk 24:52Mwakamvwa mbwendakamwaambila kuti, Ndainka, alimwi ndaboola kulindinywe. Kuti nomwali kundiyanda, nomwali kukondwa nkaambo nja kuli-Taata, nkaambo Taata mupati kwiinda ndime. 29#Joh 13:19Eno ndamwaambila nentanainka kuti ndaakwiinka mukasyome, 30#Joh 12:31; Ef 2:2N sikooyoomwaambila limbi makani manjimanji, nkaambo mwami wenyika wasika, walo taakwe ncajisi kulindime, 31#Joh 10:18; Mt 26:46; Mk 14:42Pele nkokuti inyika izibe kuti ndamuyanda Taata, akwalo kuti ndacita mbuli mbwaakandilailila Taata. Amunyamuke, tuzwe kuno.
Sélection en cours:
Johane 14: Ibbaib63
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
The Bible in Tonga (Zambia) © United Bible Societies, 1963.