Hosea 2
2
1Amwaambile bakwanu kuti, Mukowa wangu, Abacizi banu amubambe kuti mbafwidwaluzyalo.
Buvule bwacisi ca-Israyeli
2 #
Is 50:1; Jer 3:1,9,13; Ezk 16:25; Hos 1:2 Amukazyanye abanyoko, amukazyanye, nkaambo tabeensi mukaangu pe, ambebo nsili mulumyaakwe. Agwisye mavuule aakwe kuzwa kubusyu bwakwe, amamambe aakwe kuzwa kunkolo zyakwe. 3#Jer 13:22; Ezk 19:13; Am 8:11Inga njoomusamununa cacintanda akumubika mbubonya mbwaakabede mubuzuba obo mbwaakazyalwa. Njoomucita mbuli inkanda, akumubika mbuli ibbuwa, akumujazya nyota. 4Abalo bana bakwe nsikooyoobafwida luzyalo pe, nkaambo mbana babuvuule. 5#Jer 44:17Nkaambo banyina bakavuula, ayooyo iwakabazyala wakacita cakuusya bweeme. Wakati, Nkayandaule basimamambe bangu bandaabila insima amaanzi aboya bwambelele azisani zituba amafuta azintu zyakunywa.
6 #
Job 19:8
Lino amubone. Njoosinka inzila yakwe amamvwa, akumuzyungulusya lubaya, kuti atajani mazwido. 7#Lk 15:18; Ezk 16:8Elyo uyooya butobela basimamambe bakwe, pele takooyoobeenzya pe. Uyoobayandaula, pele takooyoobajana. Lino uyooamba kuti, Njiinke, nkapiluke kumulumyaangu mutaanzi, nkaambo ciindi eco ncendakali awe cakandibotela kwiinda ciindi ecino. 8Nkaambo teewakaziba kuti ndime ndakamwaabila maila awaini amafuta, akumuvuzizya insiliva angolida nzibakabelesezya Baala. 9Nkaambo kako njoomunyanzya alimwi maila aangu kuciindi cao, awaini wangu kuciindi cakwe, akuliboozezya boya bwambelele azisani zituba nzindakamupa cakulivumba mubili. 10Njoovumbununa bweeme bwakwe kumeso aabasimamambe bakwe boonse, nkabela takukooyooba muntu naba omwe wakumuvuna kumaanza aangu. 11#Is 24:7; Jer 7:34; Am 8:10Alimwi njoolesya kusekelela kwakwe koonse ama pobwe aakwe, mapobwe aamwezi mupya amapobwe aasabata ambungano zyakwe zyoonse. 12#Is 5:5Nkabela njoosaala masaansa aakwe amikuyu yakwe, nzenzizyo nzyaamba kuti ncipego cangu ncibandipa basimamambe bangu, Njoocita kuti zibe mbuli lusaka, banyama bamusokwe bazilye. 13#Bab 3:7; Ezk 23:40Njoomuboozezya milandu yakwe yamazuba ayo aababaala, naakali kubatentela zinunkilizyo. Wakali kusama bukume abulungu, akuya buyandaula basimamambe bakwe, anukuti mebo wakandiluba, mbwaamba Jehova.
14 #
Ezk 20:35
Lino amubone! Njoomuongelezya akumutola musokwe, nkaambile moyo wakwe majwi mabotu. 15#Is 65:10; Malo 3:21; Zek 9:12; 1 Kor 13:13; Jos 7:24-26Nkabela oko njoomupa myuunda yakwe yamasaansa, awalo mumpata wa-Akori uyoomubeda mulyango wabulangizi. Uyooimba oko mbubonya mbwaakali kucita kuciindi cabwanike bwakwe amubuzuba obo mbwaakazwa mucisi ca-Egepita. 16Nkabela mubuzuba obo, mbwaamba Jehova, uyoondaamba Mulumaangu, tokooyoondaamba limbi Mwami wangu, pe, 17#Kul 23:13Nkaambo njoolesya mazina aaba-Baala mumulomo wakwe, kuti mazina aabo ataibalukwi limbi. 18#Job 5:23; Zek 9:10; Is 11:6; 2:4; Lev 26:5; Jer 23:6Alimwi mubuzuba obo njoobatangila cizuminano; tuyootangana cizuminano abanyama bamusokwe abayuni bakujulu abauka baansi. Elyo buta apanga ankondo njoozilobya zyoonse mucisi, nkabaoneke cakutayoowa.
19Njookutangila, ube wangu lyoonse. Njookutangila cakululama acabuluzi, cabuuya acaluzyalo. 20#Is 54:13; Jer 31:33Ncobeni njookutangila calusyomo, ukazibe Jehova. 21#Zek 8:12Elyo mubuzuba obo njoovwiila, mbwaamba Jehova. Njoovwiila ijulu, nkabela ijulu liyoovwiila nyika. 22Elyo nyika iyoovwiila maila awaini amafuta, azeezi ziyoovwiila Jezreeli. 23#Zek 10:9; 13:9; Rom 9:25; 1 Pet 2:10Lino njoomubyala kulindime munyika, nkabela sikutafwidwaluzyalo njoomufwida luzyalo, abalo ibatakali basimukowa bangu njoobaambila kuti, Ndinywe mukowa wangu, nkabela bayooamba kuti, Nduwe Leza wesu.
Sélection en cours:
Hosea 2: Ibbaib63
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
The Bible in Tonga (Zambia) © United Bible Societies, 1963.