Intembauzyo 103
103
Intembauzyo ya-Davida
1O muuya wangu, kolumba Jehova
Zyoonse zili mukati kangu azilumbe izina lyakwe lisalala.
2O muuya wangu, kolumba Jehova,
Akutaluba zyoolwe zyakwe zyoonse.
3 #
Is 33:24; Mt 9:2; Mk 2:5; Lk 7:47; Kul 15:26; Jer 17:14 Nguwe uukulekelela insendami zyako zyoonse,
Akuponya malwazi aako oonse.
4Nguwe uuvuna buumi bwako kuzwa kukabanda,
Akukusamika munsini waluzyalo abuuya.
5Nguwe uukukusya zintu zibotu,
Kuti bukubusi bwako bubukuluke mbuli insika,
6Jehova ulabeleka milimo iiluleme,
Akubeteka kabotu boonse bapenzegwa.
7Wakazibya Musa inzila zyakwe,
Abalo bana ba-Israyeli wakabazibya incito zyakwe.
8 #
Kul 34:6; My 14:18; Dt 5:10; Jak 5:11 Jehova ngusibuuya, ngusiluse,
Ulamuka kukalala, ulizwide luzyalo.
9 #
Is 57:16; Jer 3:5; Mik 7:18 Tayandi kukazyanya lyoonse,
Nikuba kukweeka mane kukabe kutamani.
10 #
Ezr 9:13
Tana kutucitila mbuli zibi zyesu,
Nikuba kutuboozezya mbuli insendami zyesu.
11Nkaambo ijulu mbulili idamfu kwiinda nyika,
Mbubonya obo mbulukomede luzyalo lwakwe kulibaabo bamuyoowa.
12 #
Is 43:25; Ef 1:7 Mbuli kujwe mbokuli kule kuzwa kumbo,
Mbuboobu mbwaalampya insotoko zyesu kuzwa kulindiswe.
13 #
Dt 8:5; Is 63:15,16; Mal 3:17 Mbuli muntu mbwafwida bana bakwe luzyalo,
Alakwe Jehova ulabafwida luzyalo abo bamuyoowa.
14Nkaambo ulizi mbububede buntu bwesu,
Ulaibulukwa kuti tuli bulongo buyo.
15Ncobeni buumi bwamuntu buli mbuli bwizu.
Mbuli malubaluba aamusokwe mbwaafulula.
16Nkaambo muuwo waunga, elyo malubaluba taaciwo,
Akwalo oko nkwaakabede takuciyooaboni limbi.
17 #
Kul 20:6
Pele luzyalo lwa-Jehova mpoluli lyoonse kulibaabo bamuyoowa,
Abululami bwakwe bulaboneka akubazukulu besu.
18 #
Dt 7:9
Bulalibonya kulibaabo balondola cizuminano cakwe,
Akuyeeya milao yakwe kuti baicite.
19 #
Int 47:2
Jehova ulikazikide cuuno cakwe cabwami mujulu,
Nkabela bwami bwakwe buleendelezya kuliboonse.
20 #
Mt 6:10
Amulumbe Jehova nobaangelo bakwe,
Inywe nobasintaze basinguzu nomucita mbwaamba,
Akuswiilila ijwi lyamajwi aakwe.
21 #
Matl 32:2; Dan 7:9 Araulumbe Jehova, nomakamu aakwe nyoonse,
Inywe nomumubelekela milimo akucita ncayanda.
22Amulumbe Jehova, nozilenge zyakwe nyoonse,
Koonse koonse nkwaendelezya.
O muuya wangu, kolumba Jehova.
Sélection en cours:
Intembauzyo 103: Ibbaib63
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
The Bible in Tonga (Zambia) © United Bible Societies, 1963.