Incito 8
IBBAIB63
8
1Saulo wakazumina akufwa kwakwe.
Imbungano mboyakapenzegwa akumwaisigwa
Kuliboobo buzuba imbungano yamu-Jerusalemu yakatalika kupenzegwa kapati, boonse bakamwaikila muzisi zya-Judaya a-Samariya, pele kwakasyaala baapostolo balike, 2Baalumi basyomi bakamuzika Stefano, bakamu-bungila dilwe pati. 3Kwalo Saulo wakali kuya buundunganya mbungano, wakanjila mumaanda oonse, uya bukwela baalumi abakaintu akubanjizya muntolongo.
Milimo ya-Filipo
4Aboobo abakamwaika bakeendeenda baya bukambauka makani. 5Ndilyonya Filipo wakasika kumunzi wa-Samariya, wabakambaukila Kristo, 6Eno bantu bakaswiilila amoyo omwe kuzintu ezyo nzyaakali kwaamba Filipo nobakamvwa akubona zitondezyo nzyaakacita. 7Nkaambo myuuya iisofweede yakazwa kubanji babo abakanjidwe njiyo, iloompolola ejwi pati, abanjibanji abayuminide mibili abatyokede baponyegwa. 8Kwakaba kubotelwa kupati kulooyo munzi.
9Eno kwakali mwaalumi uutegwa Simoni, uwali musonzi mumunzi oyo akuyoosya bantu ba-Samariya, wati muntu mupati. 10Bakamuswiilila boonse, kuzwa kumuniini mane kumupati, bakati, Oyu muntu ninguzu zyaLeza ezyo izitegwa Nzipati, 11Bakamumvwa nkaambo wakabayoosya ciindi cilamfu akusonda kwakwe, 12Pele nobakasyoma Filipo naali kukambauka makani mabotu aa-Bwami bwa-Leza ezina lya-Jesu Kristo, bakabapatizigwa, baalumi abakaintu. 13Awalo Simoni wakasyoma. Naakabapatizigwa wakakakatila kuli-Filipo, wakayoowa naakabona zitondezyo emilimo yenguzu mpati iyali kucitwa.
14Elyo baapostolo bamu-Jerusalemu nobakamvwa kuti cisi ca-Samariya cakatambula makani aa-Leza, bakabatumina Petro a-Johane. 15Nobakasika oko bakabakombela kuti bapegwe Muuya Uusalala, 16nkaambo tuwalina kuselukila naba omwe wabo, bakabapatizigwa muzina lya-Mwami Jesu pele. 17Nkabela bakababika maanza, bakapegwa Muuya Uusalala. 18Eno Simoni naakabona kuti Muuya Uusalala ulapegwa akubikwa maanza aabaapostolo, wakabaletela mali, 19wati, Amundipe amebo nguzu ezi, kuti kufumbwa ngwenti bike maanza atambule Muuya Uusalala, 20Petro wakamwaambila wati, Mali aaka afwidilile antoomwe ayebo, nkaambo wayeeya kuti cipego ca-Leza caulwa mali. 21Tojisi caabilo nebuba busena kumakani aya, nkaambo moyo wako tuululeme kumbele lya-Leza. 22Sanduka kububi bwako obu, ukumbile kuli-Leza, ambweni kulajatilwa kuyeeya kwamoyo wako, 23Nkaambo ndabona kuti uli mundulwe iilula amukwaangwa bubi. 24Simoni wakavuwa wati, Amundikombele ku-Mwami, entasikilwa neciba comwe cazeezi zintu nzooamba.
25Aboobo nobakasinizya akwaamba makani aa-Mwami, bakabweeda ku-Jerusalemu, baya bukambauka Makani Mabotu muminzi minjiminji yaba-Samariya.
Muzibe mbwaakasanduka
26Pele angelo wa-Mwami wakaambila Filipo kuti, Nyamuka uye kumusanza, kunzila iizwa ku-Jerusalemu iiya ku-Gaza, njenkanda. 27Mpoonya wakanyamuka wainka, Eno mwaalumi waku-Etiopiya, muzibe wabwami bupati bwa-Kandake, mwami mukaintu waba-Etiopiya, ngowakali mulangi walubono lwakwe loonse, wakainkide ku-Jerusalemu kuyookomba, 28Eno kukupiluka, wakalikede munkalaki yakwe, uza bubala kuli-Isaya musinsimi. 29Nkabela Muuya wakaambila Filipo kuti, Swena afwaafwi unjile munkalaki eyo. 30Ndilyonya Filipo wakamuzuzaanina, wamumvwa ulabala kuli-Isaya musinsimi. Wati, Sena ulacimvwisya eco ncobala? 31Vakavuwa kuti, Ino ndilakonzya buti, aatakwe muntu uunditondezya? Mpoonya awo wakakumbila Filipo kuti atante, akale awe. 32Eno caandaano ncaali kubala nceeci:
Wakeenzegwa mbuli kabelele kaya kukujayigwa,
Ambuli kabelele kaumuna kumbele lyauugela,
Mbubonya awalo takajulide mulomo wakwe,
33Kukulyeetezya kwakwe takabetekedwe kabotu,
Nguni uyooamba izyalani lyakwe?
Nkaambo buumi bwakwe bwagwisigwa ansi,
34Nkabela muzibe wakamuvuwa Filipo wakati, Ndakubuzya, ino nguni ngwaamba musinsimi kumakani aya? Sa ulyaamba lwakwe mwini, na uamba umbi? 35Filipo wakajula mulomo wakwe, wasaanguna kulugwalo olu ndulonya kumwaambila aa-Jesu, 36Nobakali kweenda munzila, bakasika kwakali maanzi. Muzibe wakati, Ngaaya maanzi, ncinzi ino icindikasya kubapatizigwa? 37Filipo wateeti, Na wasyoma amoyo wako woonse ulakonzya, Wavuwa wati, Ndasyoma kuti Jesu Kristo ngu-Mwana a-Leza, 38Nkabela wakalailila kuti inkalaki iime, bakaselukila mumaanzi boonse babile, Filipo amuzibe, wamubapatizya. 39Nobakazwa mumaanzi Muuya wa-Mwami wakakwempa Filipo. Muzibe taakacili kumubona limbi, nkaambo wakatola munzila yakwe uya bubotelwa. 40Pele Filipo wakajanwa ku-Azotu, waandulula minzi yoonse uya bukambauka Makani Mabotu, mane wasika ku-Kaisareya.