Incito 6
IBBAIB63
6
Mbobakasalwa badaikona abakali musanu mubabili
1Kumazuba ayo nobakali kuya buvula basikwiiya, ba-Giriki bakatongaukila ba-Hebrayo, nkaambo bamukabafu bakulimbabo bakalengaalwa kumwaabo wabuzuba bumwi bumwi. 2Nkabela abali kumi mubabili bakaita mbungano yabasikwiiya bati, Takweelede kuti swebo tuleke makani aa-Leza, tugame kwaaba zilyo. 3Aboobo, bakwesu, amusale akati kanu baalumi abali musanu mubabili, abali empuwo mbotu, abazywide Muuya Uusalala abusongo, mbotuti bike mumulimo oyo, 4Kwalo swebo tuyoojatisya kukukomba akumulimo wamakani. 5Eno ijwi elyo lyakakonda bantu boonse, Bakasala Stefano, mwaalumi uuzywide lusyomo a-Muuya Uusalala, antoomwe a-Filipo, a-Prokoro, a-Nikanora, a-Timo, a-Parmena, a-Nikolao, musyomi waku-Antiokeya, 6bakabaimika kumbele lyabaapostolo. Nkabela nobakamana kukomba, bakabika maanza alimbabo,
7Elyo makani aa-Leza akaanda, basikwiiya bakavulisya mu-Jerusalemu, abapaizi banjibanji bakasyoma.
Imilimo ya-Stefano
8Eno Stefano mbwaakazywide luzyalo enguzu, wakali kucita ziyoosya ezitondezyo zipati akati kabantu. 9Nkabela bakanyamuka bamwi bacikombelo icitegwa caba-Libertino, abaku-Kurene, abaku-Alesandreyo, abazwa ku-Kilikiya, aku-Asiya, bakazyanya a-Stefano, 10Kwalo teebakali enguzu kukazya busongo a-Muuya ngwaambya. 11Ndilyonya bakaleta baalumi abakati, Twakamumvwa ulaamba majwi aakusampaula Musa a-Leza, 12Nkabela bakasungilizya bantu, abapati, abalembi. Baboola bamujata, bamutola alubeta. 13Mpoonya bakanyamusya bakamboni bakubeja abakateeti, Oyu muntu taleki kwaamba majwi aakusampaula busena obu busalala amulao, 14nkaambo twakamumvwa uti, Oyu Jesu wa-Nazareta uyoobumwaya busena obu, asandule ziyanza nzyaakatupa Musa. 15Boonse abakede mulubeta bamulangisisya, babona busyu bwakwe bwaba mbuli busyu bwaangelo.