1 Tesalonaika 4
4
1Alupipei, fowa' afa' wa'ipipa wihi'ambepa waf ipe' pepe pefe' andeande' ma pilana, si'i God okom na'iami. Fowa' pailana dei' wapoti' pilana la'ela'ef. Ea' afa' wahali'ipa wafela ukup ipe'imi ma agel Dembinai Jisasa pilana penda'ana nefe' etin notaga lu'una. 2Ipe' pegawa basef amama wawalapama ipe' ma agel Dembinai ape'inai Jisas. 3Okom Godi nape na'ama. Ipe' amam nematawa pepe bo'wepa andeande' ananipei etipa ma pindihi'ama waf anama so'a waolanai. 4Ipe' amam hipei, maina nemaf pa'i peso' nematawa pila waf God na'ianai pese'ama pepe andeande'. Ukup mopaipa pimafi alop ipe'inai andeande' ma waf aonai so'a waolanai a'epa. 5Waf anama na'ama. Opalef ipe'imi ina usihima waf aonai sanda' so'a waolanai, si'i isima sololama God sanda'anai, owa'. Hapainai. 6Ea' ipe' amam ina penda' waf aonai ma esis sahin owan ipe'isi pefa' nematawa anom amami, owa'. Dembinai okom wandafunai napoma epes isima sanda' waf anama ma na'i nogwamasa waf anama aonai esis sanda'anai. Fowa' afa' wawalapa amama alihim wa'ipipam mehip. 7Dembinai God ina nofalapa ma monda' waf anama aonai, owa'. Anan nofalapa ma mila waf bu'unai andeande'. 8Basef Godi ma'i ape' ina monda' waf so'a waolanai, owa'etin. Ea' emi egafis sowa' alafugaha basef amama, ina sowa' alafugaha epes etis, owa'. Sowa' alafugaha God wapoti'. God atona nase'epa Ambal Bu'unai Ananinai.
9Dei' afa' ina ata' onda' anom basefa ipe' ma waf anama ipe' ukup mimila esis hiesi sahin owan, owa'. God nawalipa ipe' hipei andeande' ma waf anama. 10Ipe' ukup maimaila esis sahin owan anama etap hiagoma Masedonia. Ipe' alupipei, afa' wa'ipipa na'ama wa'i, ipe' ukup mimila esis sahin owan isima penda' waf anama netaga nefe' lu'una. 11Ipe' ukup matamea mefe la'ifipa pepe so'umbel pimafi amamaga ipe'imi andeande'. Penda' maol lagof ipe'imi si'i fowa' wa'ipipa. 12Penda'am na'ama ma pefe' andeande' naep esis isima owa' ata' somboma opalef sotaga Kristen. Ea' penda'am na'ama ma ina kwahupa anom amamaga, owa'.
Anona Nemaf Dembinai notanima nifi'i wapoti'
13Ipe' sahin owan, afa' wa'i ipe' pegawa andeande'ma amam nematawa isima saga'i. Na'ama opalef ipe'imi ukup mimilas pelomas si'i isima sololama God sanda'am. Esis owa' sogawa ma sope sohafa nemaf anama saga'i sotanima sohafel wapoti' hi'agilif. 14Ape' mombale'efa Jisas, anan naga' sawana ea' notanima nohafel. Amama atom dei' mogawa mombale'efa Goda anona nemaf nofa'ai esis Kristen isima sombale'efana endilisi ma saga'i sohafel wapoti' sifi'i sulumai Jisas.
15Afa' wawalapa basef Dembinai atoma ipe' na'ama. Anona nemaf Dembinai notanima nifi'i, ape' amam nematawa ata' mape etapi ambagof ata' mapaipai, ape' ina muli' ma esis saga'i, owa'. 16Dembinai nifi'i ni'i mehip endilisi ea' ensel Dembinai noga ni'i basef la'ifimi mehip, nufapula alof lu'unai Godi nonda'am nogal mehip. Nogota anama Dembinai nokwaha heven nisila'i. Ea' sombale'efa Kraisi fowa' sali' saga'i, atuwasi sili' sohafel. 17Ea' nemaf anama atona Dembinai nofa'apa amam nematawa ambagof mapaipai molata otaga ilif moloma amam nematawa isima miti Dembinai. Ea' ape' hiapai mope molomana la'ela'ef hihif. 18Ea' dei' monda'epa motaga la'ifipa ma opalef ape'imi ma basef amama.
Sélection en cours:
1 Tesalonaika 4: aojF
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2013, Wycliffe Bible Translators, Inc. All rights reserved.