مَتَّى 11
11
كلام المسيح في يَحْيَى
1وَ بَعَدْ عِيسَى قَالْ كُلَّ الْكَلَامْ دَا لِتَلَامِيذَهْ الْأَتْنَا عَشَرْ، هُو قَمَّ مِنْ هِنَاكْ وَ مَشَى يِعَلِّمْ النَّاسْ وَ يِبَلِّغْ الْبِشَارَةْ فِي حِلَّالْهُمْ.
2وَ فِي الْوَكِتْ دَا، يَحْيَى قَاعِدْ فِي السِّجِنْ. وَ سِمِعْ خَبَرْ هَنَا عَمَلْ الْمَسِيحْ وَ رَسَّلْ وَاحِدِينْ مِنْ تَلَامِيذَهْ لِعِيسَى 3أَشَانْ يَسْأَلَوْه وَ يُقُولُوا لَيَّهْ: «إِنْتَ النَّادُمْ الْيَجِي وَلَّا وَاجِبْ نَرْجَوْا نَادُمْ آخَرْ؟»
4وَ عِيسَى رَدَّ لَيْهُمْ وَ قَالْ: «أَمْشُوا وَ أَوْرُوا يَحْيَى بِكُلَّ شَيّءْ الشِّفْتُوهْ وَ السِّمِعْتُوهْ. 5الْعَمْيَانِينْ قَاعِدِينْ يِشِيفُوا وَ الْعُرُجْ قَاعِدِينْ يُرُوغُوا وَ الْعِنْدُهُمْ جِدَامْ قَاعِدِينْ يَلْقَوْا الْعَافَيْ وَ الطَّرْشَانِينْ قَاعِدِينْ يَسْمَعَوْا وَ الْمَيْتِينْ قَاعِدِينْ يَبْعَثَوْا. وَ الْمَسَاكِينْ قَاعِدِينْ يَسْمَعَوْا الْبِشَارَةْ. 6وَ مَبْرُوكْ لِلنَّادُمْ الْمَا يِشَكِّكْ فَوْقِي.»
7وَ وَكِتْ تَلَامِيذ يَحْيَى قَمَّوْا مَاشِينْ، عِيسَى بَدَا يِحَجِّي فِي يَحْيَى لِلنَّاسْ الْقَاعِدِينْ مَعَايَهْ وَ قَالْ: «وَكِتْ يَحْيَى قَاعِدْ فِي الْكَدَادَةْ، مَشَيْتُوا لَيَّهْ أَشَانْ تِشِيفُوا شُنُو؟ عَقَيْقَايْ الرِّيحْ تِهِزَّهَا وَلَّا؟ 8وَ كَنْ مَا كَيْ، دَوَّرْتُوا تِشِيفُوا شُنُو؟ نَادُمْ لَابِسْ خَلَقْ سَمَحْ؟ لَا! أَشَانْ النَّاسْ اللَّابْسِينْ خُلْقَانْ سَمْحِينْ قَاعِدِينْ فِي بُيُوتْ الْمُلُوكْ. 9زَيْن، مَرَقْتُوا أَشَانْ تِشِيفُوا شُنُو؟ أَشَانْ تِشِيفُوا نَبِي؟ أَيْوَى! وَ نُقُولْ لَيْكُو شِفْتُوا نَادُمْ أَكْبَرْ مِنْ نَبِي. 10وَ دَا بَسْ هُو الْبِسَبَبَهْ الْكِتَابْ يُقُولْ: <دَاهُو نِرَسِّلْ رَسُولِي قِدَّامَكْ وَ هُو يِعَدِّلْ لَيْك الدَّرِبْ.>#11:10 الكلام دا تلقوه في مَلاخِـي 3:1.
11«وَ نُقُولْ لَيْكُو الْحَقّ، مَا فِي نَادُمْ مَوْلُودْ مِنْ مَرَةْ أَكْبَرْ مِنْ يَحْيَى الْمُغَطِّسْ. وَ لَاكِنْ النَّادُمْ الصَّغَيَّرْ فِي مَمْلَكَةْ اللّٰهْ، أَكْبَرْ مِنَّهْ. 12وَ مِنْ أَوَّلْ يَوْم هَنَا خِدْمَةْ يَحْيَى الْمُغَطِّسْ لَحَدِّي الْيَوْم، مَمْلَكَةْ اللّٰهْ قَاعِدَةْ تِزِيدْ بِقُدْرَةْ وَ الْيَدْخُلُوا فَوْقهَا يِوَجُّهُوا الْعُنُفْ. 13اللّٰهْ كَلَّمْ لِلنَّاسْ فِي التَّوْرَاةْ وَ فِي كُتُبْ الْأَنْبِيَاء كُلُّهُمْ لَحَدِّي يَحْيَى جَاءْ. 14وَ كَنْ عِنْدُكُو نِيَّةْ تِصَدُّقُوا كَلَامِي دَا، يَحْيَى هُو إِلِيَاسْ الْقَاعِدِينْ تَرْجَوْه. 15أَيِّ نَادُمْ الْعِنْدَهْ أَدَانْ خَلِّي يَسْمَعْ!
كلام المسيح في ناس وكْته
16«وَ نُقُولْ شُنُو فِي نَاسْ وَكِتْنَا؟ هُمَّنْ يِشَابُهُوا شُنُو؟ هُمَّنْ مِثِلْ عِيَالْ دُقَاقْ لَامِّينْ فِي دَوْر وَ يِنَادُوا رُفْقَانْهُمْ وَ يُقُولُوا: 17‹أَنِحْنَ ضَرَبْنَا لَيْكُو الصُّفَّارَةْ لَاكِنْ إِنْتُو مَا لِعِبْتُوا. أَنِحْنَ غَنَّيْنَا غِنَيْ هَنَا مَوْت وَ إِنْتُو مَا بَكَيْتُوا!› 18يَحْيَى جَاءْ وَ هُو مَا يَاكُلْ وَ لَا يَشْرَبْ وَ قَالَوْا: ‹هُو مُشَوْطِنْ›. 19وَ بَعَدَيْن أَنَا إِبْن الْإِنْسَانْ جِيتْ وَ أَنَا قَاعِدْ نَاكُلْ وَ نَشْرَبْ وَ قَالَوْا: ‹هُو أَكَّالْ وَ سَكَّارِي وَ رَفِيقْ لِنَاسْ الْيِشِيلُوا مِيرِي وَ الْمُذْنِبِينْ.› لَاكِنْ حِكْمَةْ اللّٰهْ الصَّحِيحَةْ تِنْشَافْ فِي عَمَلْ النَّاسْ الْيِتَابُعُوهَا.»
20وَ عِيسَى بَدَا يَهْرِجْ الْحِلَّالْ السَّوَّى فَوْقهُمْ عَجَايِبْ كَتِيرِينْ وَ نَاسْهُمْ مَا تَابَوْا مِنْ ذُنُوبْهُمْ. 21وَ قَالْ: «الْعَذَابْ يَرْجَاكِ، يَا حِلَّةْ كُورَزِينْ! الْعَذَابْ يَرْجَاكِ، يَا حِلَّةْ بَيْت صَيْدَا! كَنْ أَوَّلْ نَادُمْ سَوَّى الْعَجَايِبْ دَوْل فِي مُدُنْ الْكُفَّارْ صُورْ وَ صَيْدَا، نَاسْ الْمُدُنْ دَوْل يُتُوبُوا مِنْ ذُنُوبْهُمْ مِنْ زَمَانْ وَ يَلْبَسَوْا خُلْقَانْ الْحِزِنْ وَ يَقْعُدُوا فِي رُمَادْ. 22وَ نُقُولْ لَيْكُو، فِي يَوْم الْحِسَابْ، الْعَذَابْ الْيَنْزِلْ فَوْق مُذْنِبِينْ صُورْ وَ صَيْدَا مَا يَبْقَى شَدِيدْ مِثِلْ الْعَذَابْ الْيَنْزِلْ فَوْق نَاسْكُو. 23وَ إِنْتِ حِلَّةْ كَفَرْ نَاحُومْ، رَفَعْتِ رَاسْكِ لَحَدِّي السَّمَاءْ وَلَّا؟ نُقُولْ لَيْكِ اللّٰهْ يَرْمِيكِ فِي الْهَاوِيَةْ أَشَانْ كَنْ أَوَّلْ نَاسْ سَدُومْ شَافَوْا الْعَجَايِبْ النَّاسْكِ شَافَوْهُمْ، حِلَّةْ سَدُومْ تَقْعُدْ لَحَدِّي الْيَوْم. 24وَ لَاكِنْ نُقُولْ لَيْكُو، فِي يَوْم الْحِسَابْ، الْعَذَابْ الْيَنْزِلْ فَوْق نَاسْ حِلَّةْ سَدُومْ مَا يَبْقَى شَدِيدْ مِثِلْ الْعَذَابْ الْيَنْزِلْ فَوْق نَاسْكِ.»
المسيح نادى التعْبانين
25وَ فِي الْوَكِتْ دَا، عِيسَى حَجَّى وَ قَالْ: «شُكْراً، يَا أَبُويِ رَبّ السَّمَاوَاتْ وَ الْأَرْض أَشَانْ إِنْتَ لَبَّدْت كَلَامَكْ دَا مِنْ الْحَكِيمِينْ وَ مِنْ الْعُلَمَاءْ. وَ وَصَّفْتَهْ لِلنَّاسْ الْجُهَّالْ. 26أَيْوَى، يَا أَبُويِ، أَشَانْ دَا بَسْ الشَّيّءْ الْإِنْتَ رَاضِي بَيَّهْ».
27«أَبُويِ اللّٰهْ وَكَّلَانِي بِكُلَّ شَيّءْ. مَا فِي نَادُمْ الْيَعَرِفْ إِبْن اللّٰهْ إِلَّا أَبُوهْ. وَ مَا فِي نَادُمْ الْيَعَرِفْ اللّٰهْ، إِلَّا إِبْن اللّٰهْ وَ النَّادُمْ الْإِبْن اللّٰهْ يِدَوْر يِوَصِّفْ لَيَّهْ أَبُوهْ.
28«تَعَالُوا لَيِّ إِنْتُو كُلُّكُو التَّعْبَانِينْ مِنْ التَّقَلَةْ الشَّايْلِينْهَا فِي رَاسْكُو وَ أَنَا نَنْطِيكُو جُمَّةْ. 29شِيلُوا التَّقَلَةْ النَّنْطِيهَا لَيْكُو وَ أَبْقَوْا تَلَامِيذِي أَشَانْ أَنَا ضَلُولْ وَ حَنُونْ وَ تَلْقَوْا جُمَّةْ لِنُفُوسْكُو. 30أَشَانْ التَّقَلَةْ النَّنْطِيهَا لَيْكُو دِي، مَا تَقِيلَةْ. أَيْوَى، التَّقَلَةْ النُّخُطَّهَا فَوْقكُو خَفِيفَةْ.»
Sélection en cours:
مَتَّى 11: ع.د.ت19
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
La Bible en arabe tchadien © Alliance biblique du Tchad, 2019