Matta 21
21
Isa dakhal Madiinat al-Khudus
1Wa Isa wa talaamiizah garrabo le Madiinat al-Khudus wa lihgo hillit Beet Faaji fi jabal al-Zaytuun. Wa Isa rassal giddaamah itneen min talaamiizah 2wa gaal leehum : «Amchu fi l-hille al-giddaamku di wa wakit wisiltu, talgo humaara marbuuta be dahachha. Hilluuhum wa jiibuuhum leyi hini. 3Wa kan naadum yuguul leeku kalaam, guulu leyah : ‹Al-Rabb yidoorhum.› Wa be da, yikhalluuhum yaju ajala.»
4Wa bigi misil da achaan kalaam Allah al-gaalah al-nabi yitimm. Al-nabi gaal :
5<Guulu le naas jabal Sahyuun al-misil bineeye :
«Daahu malikku jaayi leeku.
Wa hu miskiin wa raakib fi humaar.
Aywa, hu raakib fi dahach wileed humaara.»>#21:5 Al-kalaam da talgooh fi Zakariiya 9:9.
6Wa l-talaamiiz al-itneen sawwo misil Isa gaalah leehum. 7Wa jaabo al-humaara be dahachha wa chaalo khulgaanhum wa farrachoohum fi l-humaara wa fi l-dahach wa Isa rikib. 8Wa naas katiiriin marra waahid lammo wa farracho khulgaanhum fi l-derib. Wa naas aakhariin gataʼo furuuʼ al-chadar wa farrachoohum fi l-derib. 9Wa naas katiiriin jaayiin maʼa Isa giddaamah wa waraayah wa kulluhum gaaʼidiin yachkuru be hiss aali wa yuguulu :
«Al-majd le Ibn Dawuud !
<Mabruuk le l-naadum al-jaayi be usum Allah !>#21:9 Al-kalaam da talgooh fi Zabuur 118:26.
<Ahmudu Allah fi l-aali !>»#21:9 Al-kalaam da talgooh fi Zabuur 148:1.
10Wa wakit Isa dakhal fi Madiinat al-Khudus kulla naas al-madiina harrako wa assaaʼalo ambeenaathum wa gaalo : «Al-naadum da yaatu ?» 11Wa l-naas al-jaayiin maʼa Isa raddo leehum wa gaalo : «Da Isa al-nabi min hillit al-Naasira fi daar al-Jaliil.»
Al-Masiih fi beet Allah
12Wa Isa dakhal fi beet Allah wa taradaahum le kulla l-naas al-gaaʼidiin yisaawugu fi l-fadaay. Wa chaglab kulla taraabiiz al-naas al-yibaddulu gurus wa kulla banaabir al-naas al-yisaawugu hamaam. 13Wa Isa gaal leehum : «Fi l-Kitaab, Allah gaal : <Beeti yisammuuh beet al-sala>#21:13 Al-kalaam da talgooh fi Ichaʼya 56:7. wa laakin intu <sawweetuuh beet al-saraariig.>»#21:13 Al-kalaam da talgooh fi Irmiya 7:11.
14Wa wakit Isa gaaʼid fi beet Allah, al-amyaaniin wa l-maʼduuriin jo leyah wa hu daawaahum. 15Wa kubaaraat rujaal al-diin wa l-ulama chaafo al-ajaayib al-Isa gaaʼid yisawwiihum wa simʼo fi beet Allah hiss al-iyaal al-yachkuru be hiss aali wa yuguulu : «Al-majd le Ibn Dawuud !» Wa l-kubaaraat ziʼilo. 16Wa saʼalo Isa wa gaalo : «Ma simiʼt kalaamhum walla ?» Wa Isa radda leehum wa gaal : «Aywa, simiʼt kalaamhum. Wa taʼarfu kadar al-Kitaab buguul : <Inta sawweet al-atfaal wa l-iyaal al-bardaʼo kula yimajjuduuk.>»#21:16 Al-kalaam da talgooh fi Zabuur 8:2.
17Wa khalaas marag khallaahum. Wa marag min al-madiina wa macha fi hillit Beet Anya wa ragad hinaak.
Chadarat al-tiin al-laʼanha al-Masiih
18Wa be fajur, Isa gamma jaayi fi l-madiina. Wa hu jiiʼaan. 19Wa chaaf chadarat tiin#21:19 tiin Al-tiin hu chadara al-beeha al-anbiya massalo Bani Israaʼiil. jamb al-derib. Wa macha leeha wa laakin ma ligi iyaal fiiha illa l-warchaal. Wa Isa gaal le l-chadara di : «Battaan ma talde iyaal marra waahid.» Wa ajala ke al-chadara yibsat.
20Wa l-talaamiiz chaafooha wa alʼajjabo marra waahid wa gaalo : «Al-chadara yibsat ajala !» 21Wa Isa radda leehum wa gaal : «Nuguul leeku al-hagg, kan aamantu wa ma tichakkuku, intu ma tisawwu bas misil ana sawweet le l-chadara di. Kan gultu le l-jabal da : ‹Amrug min hini wa agaʼ fi l-bahar›, khalaas yabga misil kalaamku. 22Wa kan induku iimaan, kulla cheyy al-tasʼalooh fi duʼa, Allah yantiiku.»
Al-Masiih saʼalooh yaatu al-antaah izin
23Wa wakit Isa dakhal beet Allah, bada yiʼallim al-naas. Wa kubaaraat rujaal al-diin wa l-chuyuukh jo leyah wa saʼalooh wa gaalo : «Tisawwi al-khidme di be izin yaatu ? Wa yaatu al-antaak al-izin da ?» 24Wa Isa radda leehum wa gaal : «Ana kula indi suʼaal nasʼalku. Kan intu turuddu leyi, ana nuguul leeku yaatu antaani al-izin achaan nisawwi al-khidme di. 25Yahya khattas al-naas be izin yaatu ? Indah izin min Allah walla min al-naas bas ?»
Wa achchaawaro ambeenaathum wa gaalo : «Kan nuguulu : ‹Yahya indah izin min Allah›, akiid Isa yuguul leena : ‹Maala ma aamantu beyah ?› 26Wa kan nuguulu : ‹Yahya indah izin min al-naas bas›, aniina nakhaafo min kulla l-chaʼab. Achaan fi fikirhum kulluhum, Yahya hu nabi.»
27Wa raddo le Isa wa gaalo : «Da ma naʼarfuuh.» Wa Isa radda leehum wa gaal : «Khalaas, ana kula ma niʼooriiku yaatu al-antaani izin achaan nisawwi al-cheyy da.»
Masal al-awlaad al-itneen
28Isa gaal battaan : «Chunu fikirku fi l-naadum da ? Hu indah awlaad itneen. Wa macha le l-kabiir wa gaal : ‹Wileedi, amchi akhdim al-yoom fi jineenti.› 29Wa l-wileed gaal : ‹La, ma namchi.› Wa laakin baʼadeen al-wileed nidim le l-kalaam al-gaalah wa macha wa khadam fi l-jineene. 30Wa l-raajil macha le wileedah al-sakhayyar wa gaal leyah nafs al-cheyy. Wa l-sakhayyar gaal : ‹Aywa, sayyidna, namchi.› Wa laakin ma macha.
31«Min al-itneen dool yaatu sawwa al-cheyy al-abuuhum yidoorah ?» Wa l-kubaaraat gaalo : «Al-awwal.» Wa Isa gaal leehum : «Wa nuguul leeku al-hagg, naas al-yichiilu miiri wa l-charaamiit yindasso fi mamlakat Allah giddaamku. 32Yahya ja leeku wa wassafaaku derib al-adaala wa intu ma saddagtu kalaamah. Laakin naas al-yichiilu miiri wa l-charaamiit saddagooh. Wa wakit chiftuuhum taabo min zunuubhum, intu ma khayyartu fikirku al-awwal. Wa ma tubtu wa ma saddagtu kalaamah.
Masal al-harraatiin al-fasliin
33«Asmaʼo, nuguul leeku masal aakhar. Naadum waahid siid al-maal maggan inab fi jineene wa zarabaaha wa sawwa foogha assaara hana inab wa bana beet hana haraasa. Wa hu ajjar harraatiin achaan yakhdumu foogha wa khalaas khatar wa macha fi balad aakhara. 34Wakit lammiin al-inab garrab, hu rassal abiidah le l-harraatiin achaan yichiilu al-inab al-waajib leyah. 35Wa l-harraatiin karabo abiidah wa l-waahid daggooh wa l-aakhar katalooh wa aakhar battaan, rajamooh. 36Wa baʼadeen siid al-jineene rassal abiid aakhariin, ziyaada min al-awwal. Wa l-harraatiin sawwo leehum nafs al-cheyy al-sawwooh le l-naas al-jo awwal.
37«Wa khalaas, rassal leehum wileedah wa gaal : ‹Akiid yikarrumu wileedi.› 38Wa laakin al-harraatiin chaafo wileed sayyidhum wa gaalo ambeenaathum : ‹Da bas al-wariis. Khalli naktuluuh wa nichiilu warasatah.› 39Wa khalaas karabooh wa maragooh barra min al-jineene wa katalooh. 40Wa wakit siid al-jineene yigabbil min al-safar wa yaji le l-harraatiin dool, hu yisawwi leehum chunu ?»
41Wa l-naas raddo leyah wa gaalo : «Akiid yaktulhum le l-naas al-fasliin dool. Wa yijiib fi l-jineene harraatiin aakhariin al-yantuuh al-inab fi l-wakit al-waajib.» 42Wa Isa gaal leehum : «Akiid gareetu al-kalaam al-maktuub fi l-Kitaab al-yuguul :
<Al-hajar al-bannaayiin al-beet awwal ma dawwarooh
bigi al-hajar al-muhimm fi buna al-beet.
Wa l-cheyy da jaayi min Allah
wa chifnaah ajiib !>#21:42 Al-kalaam da talgooh fi Zabuur 118:22-23.
43«Wa achaan da, nuguul leeku Allah yichiil mamlakatah minku wa yantiiha le l-umma al-tijiib leyah faayde. 44Wa ayyi naadum al-yagaʼ foog al-hajar da, yinkasir marra waahid. Wa kan al-hajar da yagaʼ foogah naadum, yarhakah marra waahid.»
45Wa kubaaraat rujaal al-diin wa l-Fariiziyiin simʼo amsaal Isa wa irfo kadar Isa gaaʼid yikallim fooghum. 46Wa fattacho fursa achaan yakurbuuh fi l-sijin laakin humman khaayfiin min al-naas achaan fi fikir al-naas Isa hu nabi.
Sélection en cours:
Matta 21: ADT19
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Arabe tchadien (alphabet latin) Bible © Alliance Biblique du Tchad, 2019.