2 Tesalonik 2
2
Kisíosíó ɛ́ɛ́ Ɔkɔ́n ásiám
1Paandimán, é púúpú púyoosonée kuól kú Ɔkɔ́n waasɔ́ Yésus Kilíis kúpíkúsikan kúásɔ́ á masíá mɛ́ɛ́yɛ́, tuónúówon puandá púmoómí: 2Indi mɔɔnd sianútían ɛ́ɛ́ puɔ́s pú Ɔkɔ́n máasíám, nutipípueŋitenyi kunyiánɛ nutipíá pumbíla, nutiátáp tɛ kúpá ɛ́ɛ́ wuɛ́pítɛtɛn ɛ́ɛ́ unyi eŋémímekélíe má Támbák kunyiánɛ pónúólin nɔ niɔy. 3Mɔɔnd tinúpúlít, puɔ́s pukáaní tiányiasíám kati kupítuŋuliti kúkúsúkin máasíam ɛ́ɛ́ mépitiinyi. 4Unyi okóyikoyi wányákanɛ́ imfɛ́l é púúpú pɛɛnd kúmesíe pond pápílan ɛ́ɛ́ Támbákɛ́ɛ, kuám aná weényípíkené á kitamb kí Támbák unyɔ́mbɛt upípílan wúmuɛ́tí ɛ́ɛ́ Tambákɛ́. 5Nutipá nuand apítááká ɛ́ɛ́ kisikɛl imaápá naanɔ imɔnúɔyítín púa? 6Nuémenyen peseé kese puandá púmɛ́ɛ́kɛtikɛnɛ́ wuɛ́tɛ okóyikoyi ɛ́ɛ́ úsunɔk á kisikɛl kiipɔ́kɔ́. 7Á kiákí ɛ́ɛ́ pukaaka puŋosíkɔ́n pu ifil ámaná etúmu puólí púɛyí; káka kɔk ewú umɛɛ́tíkín pú ɛ́nyíɛ́ŋunɛnɛ́ iŋilí. 8Akáanɛ, olokí ányísunɔk káakáanɛ Ɔkɔ́n Yésus ɔ́nyíɔ́nɔ́nɛ́ wɔ́ ne emfúnu ú niít níɛyi woond u sɛ́lun wɔ́ na pukaaka pú kuol kúɛyí. 9Olokí ónyíol upianan pukaaka pú sáátan, puényípítíínyi ne melínyé má pukaaka, ne pisey ne mekesí má pisupɔ́. 10Wɛ́nyíɛlɛ tunamá tú mandá kitikit ɛ́ɛ́ úpíkɔ́kitin pɛɛnd páyuukan é punyím, á kiákí ɛ́ɛ́ pátimaátap tɛ iŋɔyɔ í kémuémue imaápá kusóti pɔ. 11Tɛ ɔɔ́pɔn Támbák mátúmɛn pɔ́ pukaaka pú kutamtam púɛlɛnɛ́ ɛ́ɛ́ páátapan pisupɔ́. 12Akáanɛ epé pɛ́mɛɛ́lɛ́ pátiátap kémuémue páakaátap pisupɔ́ Támbák ɛ́nyípɛn pɔ.
Kupílúndɛn á kuátap
13Káásɔ kɔk, tuɛ́kɛsikɛnɛn kusuŋuna é kuekenyi Támbákɛ́ɛ ilémbie ó pusíó puánɔ paandimán páámɛ pí iŋɔyɔ pɔ́ Ɔkɔ́n, á kiákí ɛ́ɛ́ Támbák manúyɔɔ́n énitúmín ɛ́ɛ́ ú núsóti ne emfunukufúúmɛ wɛɛlɛnɛ́ ɛ́ɛ́ núsɔ́tɔn aná Támbák ɔ́ɔyɔnɛ́ nopipíondínyi ɔtɛ́m píánɔ é kémuémue. 14Púpukáanɛ Támbák maánúpílíkɛn ni insɔ́m yi indámb eyí tumeénukemen ɛ́ɛ́ nupia niap é nukúm nú Ɔkɔ́n waasɔ́ Yésus Kilíis. 15Akáanɛ kɔk paandimán énutímbímít peseé kése, núond núnɛkɛn iŋónyítónyí esí tu meénúekenyi tɛ́ á tukál kúnyaánɛ á pakálátɛ epé tumaánutumanɛn. 16Ɛ́nyiɛlɛ́ Ɔkɔ́n wasɔ́ Yésus Kilíis wɔ́ muɛ́t na Támbákɛ́ɛ Síí wasɔ́ umɔɔ́túɔ́yɛ́t woond watúfá kɛ́ɛ́yɛ́ kɔ́ ɔtɛ́m peseé ilúndɛ i teeníík na kiták kí kipíondinyí ɔtɛ́m 17úwónyi itɛ́m síánɔ na kutáam, únúátapɛn pukaaka pú kuɛlɛ peseé tɛ é melínyé, tɛ á tukál.
Sélection en cours:
2 Tesalonik 2: yav
Surbrillance
Copier
Comparer
Partager
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2026, CABTAL