रोमियों 4
4
अब्राहम के संमझाऊणी
1ईन्देंखे आँमें का बुलो, के अमाँरा कुल़ का पुराँणियाँ अब्राहम के बारे दो का बुलो? 2किन्देंखे के जे अब्राहम काँम-काज़ कर्णो लई पंणमिश्वर की नंजरी दा बै-कसूर बंणायाँ ज़ादा, तअ तेस्खे तारीफ कर्णो के जागा हंदी, परह् से पंणमिश्वर के साम्णें तारीफ ने करी सक्दा। 3पबित्र-ग्रन्थों का बुलो? ऐजो के “अब्राहम ऐ पंणमिश्वर गाशी बिश्वाष करा, अरह् से बिश्वाष शा पंणमिश्वर की नंजरी दा बै-कसूर बंणा।” 4काँम-काज़ कर्णो वाल़े धियाढ़ूवा की धियाड़ी देणी दाँण ने आथी, परह् सेजा तेस्का हंक माँना ज़ाँव। 5परह् जुण्जा काँम-काज़ ने करदा, परह् तेसी पंणमिश्वर गाशी बिश्वाष करह्, जू पापी लोगो खे आप्णी नंजरी दे बै-कसूर बंणाँव, तअ से आप्णें बिश्वाष के जाँणें पंणमिश्वर की नंजर दा बेकसूर माँना ज़ाँव। 6ऐशा ही दाँई राजा दाऊद भी तेसी आदमी खे भागोईत बुलो; जेस्खे बिना काँम-काज़ के पंणमिश्वर आप्णी नंजरी दा बेकसूर बंणाँव:
7“राजा दाऊद ऐ भे ऐजो लिखी थो: भागोईत सेजा जेस्के अपराध माँफ हुऐ, अरह् जेस्के पाप दबाऐं गुऐ।
8भागोईत सेजा आदमी जेसी प्रभू पापी ने बाँणों।”
9तअ ऐजे भागोईत बचन, कियों खतना वाल़े खे ही असो; के बिना खतना वाल़े खे भे असो ऐ? आँमें ऐजो बुलो, के “अब्राहम खे तेस्का बिश्वाष के जाँणें पंणमिश्वर की नंजरी दा बै-कसूर माँना गुवा।” 10तअ से केशा दाँई माँना गुवा? खतने की दषा शा के बिना खतने की दषा शा? खतने की दषा दा नें, परह् बिना खतने की दषा दा माँना गुवा। 11अरह् तबे ऐक चींन के रूप दा तेने खतना धारण करा। जू तेसी बिश्वाष के नंतीजे शा पंणमिश्वर की नंजरी दे ऐक बै-कसूर की छ़ाप थी, जू तेसी बख्ते दे:खाऐ थी, जेख्णों तेस्का खतना ने हऐ रंई थी। ईन्देंखे तेसी तिनू सोभी का बाबा माँना गुवा, जुण्जे बिना खतने के बिश्वाषी असो। ईन्देंखे सेजे लोग भे पंणमिश्वर की नंजरी दे बै-कसूर माँनें गुऐ; 12अब्राहम खतना करे अंदें का बाबा, ना के सिर्फ बिना खतने करे अंदें का बाबा असो, परह् तिनका भे बाबा असो, जुण्जे तेसी बिश्वाष की बाटो दे चाला, जुण्जा अमाँरे बाबा अब्राहम ऐ बिना खतने की दषा दा धारण करा थिया।
बिश्वाष के जाँणें बाय्दा भेटा
13किन्देंखे के ऐजा बाय्दा करा गुवा, के तू संईसारी का बारिस हंईदा, ना अब्राहम खे अरह् ना तेस्के बंष खे, अरह् ना ऋषी-मूसा खे भेटे गुऐं निय्म के जाँणें; परह् सिर्फ बिश्वाष कर्णो के जाँणें पंणमिश्वर की नंजरी दा बै-कसूर बंण्णों के जाँणें सेजा बाय्दा पुरा हुआ। 14किन्देंखे के जे ऋषी-मूसा खे भेटे गुऐं निय्म पाल्ण कर्णो वाल़ें वारिस असो, तअ बिश्वाष बै-कार अरह् बाय्दा नीषफल़ बंण्दा। 15ऋषी-मूसा खे भेटे गुऐं निय्म का नंतीजा पंणमिश्वर का कोप असो; किन्देंखे के लोग तेस्के निय्म का पाल़्ण ना कर्णो लई, पंणमिश्वर की सजा ज़ुगे बंणों; परह् जेथै निय्म ने आथी तेथै अपराध भे आथी ने।
16ईन्दी के जाँणें निय्म बिश्वाष गाशी काऐंम असो, के कृपा के मुँताबिक हों, पंणमिश्वर का बाय्दा ना सिर्फ तिनू लोगो खे जुण्जे निय्म का पाल़्ण करह्, परह् तिनू सोभी बंष-पीढ़ी खे असो, जुण्जे आँमों सोभी के बाबा अब्राहम जेष्णें बिश्वाषी हों, 17जेष्णों पबित्र-ग्रन्थों दो लिखी थो, के “पंणमिश्वर बुलो, के मुँऐं ताँव भहिती गऐर यहूदी का बाबा बंणाऐ थुवा,” तेसी पंणमिश्वर के नंजरी दा अब्राहम अमाँरे बाबा असो, अब्राहमें तेसी पंणमिश्वर गाशी बिश्वाष करा, जुण्जा मरे अंदे ऊबे जीयाल़ो; अरह् जुण्जी बातो आथी ने, तिनका नाँव से तेष्णों लों, के ऐजी बातो असो ऐ। 18अब्राहम ऐ बैजाऐ निराष हंणों गाशी भे, पंणमिश्वर गाशी बिश्वाष करा; ईन्देखे के तेसी बचन के मुताबिक के “तेरा बंष ऐशा हंदा, के से बैजाऐ भहिती गैऐर यहूदियों का बाबा बंण्दा।” 19से जू ऐक षौह् सालो का थिया, आप्णी मरी अंदी जेई देह्-शरीर अरह् आप्णी घरवाल़ी सारा की कोख की मरी अंदी शी दषा जाँणियों भी बिश्वाष दा कंंमजोर ने हई, 20अरह् ना बै-बिश्वाषी बणियों पंणमिश्वर के बाय्दे गाशी किऐ षक-शुभा करी; परह् बिश्वाष दा पाका रंह्ऐयों पंणमिश्वर के बड़ियाऐ करी; 21अरह् ऐजो पाको जाँणों के जियों बातो का बाय्दा पंणमिश्वर ऐ करी थुवा, से तेसी बाय्दा पुरा कर्णो के भे शक्त्ति थंह्। 22ऐसी ही बिश्वाष के जाँणें अब्राहम पंणमिश्वर की नंजरी दा बै-कसूर माँना गुवा। 23अरह् सेजा बचन, “बिश्वाष के जाँणें से पंणमिश्वर की नंजरी दा बेकसूर माँना गुवा,” सेजा बचन सिर्फ अब्राहम खे ने लिखी थई, 24परह् आँमों खे भे असो, जे आँमें तेसी पंणमिश्वर गाशी बिश्वाष करूबे, जिन्ऐं अमाँरे प्रभू यीशू मरे अंदे मुँझ्शे जीयाल़े, तअ आँमें भे आप्णें बिश्वाष के जाँणें पंणमिश्वर के नंजर दे बै-कसूर माँनें ज़ाँदे।
25तिनू अमाँरे अपराध की ताँईऐं थंम्ब्ड़ाऐ गुऐ, अरह् आँमों पंणमिश्वर की नंजरी दे बै-कसूर बंणाँणों की ताँईऐं ऊबे जीयाल़े भे गुऐ।
Sélection en cours:
रोमियों 4: sri
Surbrillance
Copier
Comparer
Partager
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2022, Wycliffe Bible Translators, Inc. All rights reserved.
