खास-चैले के काँम 6
6
सात्त सेंवक च़ूणें-छाँटे गुऐ
1तोदी तिनू देसे जबे चैले की तादाऐत-गिन्त्ती बैजाऐ बड़्दी लागी, तबे यूनानी भाषा बुल़्णों वाल़े यहूदी बिश्वाषी लोग, इब्रानी भाषा बोल़्णों वाल़े बिश्वाषी यहूदी लोगो के बिरूध दे तुड़-खुड़ाऐ के रोज की सेंवकाई दी अमाँरी बिध्वायों के किऐ भे सुद्धी-खबर ने लंऐ ज़ाँदी। 2ईन्देंखे बारंह् खास-चैले ऐं आपु मुँझी खुम्ल़ी बंईठाल़ियों बुलो, “ऐजो ठीक आथी ने, के आँमें खियाँणों-पीयाँणों की सेवा खे पंण्मिश्वर का बचन शुँणाँणा छ़ुड़ी दियों। 3तअ तबे: हे मेरे भाऐ-बंईणों! तुऐं लोग आपु ही मुँझ्शे सात्त आच्छ़ै चाल-चल़्ण वाल़े मरोद् च़ूणीं-छ़ाँटी दियों; जुण्जे के पबित्र-आत्त्मा अरह् बुद्धी शे भे भर-पुर हले; जिनू आँमें ऐसी काँम-काज़ खे तैयार करी सको। 4अरह् तबे आँमें आँपु प्रार्थना दें अरह् बचन की सेंवा दे लागे अँदे रँह्ऊबे।” 5तबे ऐजी बात तियों बादी मंड्ल़ी के लोगों के आच्छ़ी लागी, अरह् तिन्ऐ स्तिफनुस नाँव का ऐक आदमी जुण्जा बिश्वाषी अरह् पबित्र-आत्त्मा शा भरा अँदा थिया; अरह् फ़िलिप्पुस, प्रोखुरूस, निकानोर, तीमोन, परमिनास, अरह् अन्ताकिया का रंहणों वाल़ा; जुण्जा के यहूदी मंत्त दा आऐ रूवा थिया, जेस्को नाँव निकोलास थियों तेसी भी तियों सेंवा खे च़ूणीं-छ़ाँटी पाया। 6अरह् तबे तिन्ऐं च़ूणें-छ़ाँटे अँदे लोग खास-चैले कैई हाजीर करे, अरह् खास-चैले ऐं तिनखे प्रार्थना करी; अरह् आप्णें हाथ तिनके मुँढों गाशी थंऐयों तिनखे आशिर्बाद दिता। 7तबे पंण्मिश्वर का बचन फऐल्दा लागा, अरह् तबे यरूशलेम दी चैले की गिनती बैजाऐ बड़्दी लागी; अरह् तबे बैजाऐ याजकों ऐं भे बिश्वाष करियों तिनका मंत्त माँनी पाया।
स्तिफनुस बाँनी दिता
8स्तिफनुस कृपा अरह् शक्त्ति शा भरियों लोगो मुँझी बड़े-बड़े काँम-काज़ अरह् चींह्न-चंम्त्तकार देखाँव थिया। 9तेख्णीं तेसी ही बख्त्ते लिबर्तीन खुम्ल़ी के चौत्रे के किऐ लोग, जुण्जे के आगे ही कुरेनीं अरह् सिकन्दरिया नंगरों अरह् किलिकिया अरह् आसिया ईलाके के किऐ लोग स्तिफनुस का बिरोध अरह् तेसी आरी बाद-बिबाद कर्दे लागे। 10परह् सेजे लोग स्तिफनुस की बुद्धी अरह् आत्त्मा का मुकाबला ने करी संकी, किन्देंखे के से पबित्र-आत्त्मा की शक्त्ति लई बुलो थिया। 11तबे तिन्ऐं कऐ लोग दुरताऐ जुण्जे ऐजो बुल्दे लागे; के “आँमें ऐसी आदमी ऋषी-मूसा अरह् पंण्मिश्वर के बिरूध दा नींन्दया कर्दे शुँणी थुवा।” 12अरह् ऐशे दाँई लोगों के दाँने-माँने अरह् यहूदी निय्म के शिकाणों वाल़े लोग भड़्काणों पाछ़ी तिन्ऐं ऐक-दंम स्तिफनुस थाँहम्बड़ियों बड़ी खुम्ल़ी के सहाँम्णें आगु नींयाँ। 13अरह् तेथै तिन्ऐ झुठे गुवाह्-शाज़्त ख्हल़्याऐ दिते, जिन्ऐं ऐजो बुलो, के “ऐजा आदमी सदा पबित्र देऊँठी, अरह् ऋषी-मूसा खे भेटे गुऐ अज्ञाँ-निय्मो के बिरूध दी नींन्दया करह्। 14आँमें ऐसी आदमी ऐजो बुल्दे शुँणीं थुवा, के सेजा ही यीशू नासरी ईयों जागा ढाल़ी देंदा; अरह् सेजी अज्ञाँ-निय्म जुण्जी के ऋषी-मूसा खे भेटी रंऐ थी, से तियों भे बद्ल़ी देंदा; जुण्जी तिन्ऐं आँमों खे देऐ थंऐ थी।” 15तबे तिनू बड़ी खुम्ल़ी दे बंईठै अँदे लोगे ऐं तेसी स्तिफनुस नींह्जाऐयों ऐकठ्डिऐ देखा; तअ तिनके तेस्का मुँख्ड़ा ऐक स्वर्गदूत्त जेष्णाँ देखाई पड़ा।
Sélection en cours:
खास-चैले के काँम 6: sri
Surbrillance
Copier
Comparer
Partager
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2022, Wycliffe Bible Translators, Inc. All rights reserved.
