Malakay 3
3
Yóm kdaw kkukum Dwata yó kem tau
1Yó balaen kul yóm Dwata laen dù là gbeken du, monen, “Ngem, angat wen hógówu elem blóng ye mò eles hemtifes yóm angat lanu. Ominen yó tódô mekto sut elem yóm kun Gónô yóm tendo nangat ye, duhen yóm Dwata hol gónó mogot. Yóm hógówu tendo gel nangat ye yó, dohò sut se kun mò hetngón du kuy yóm deng senfasad tekuy.” 2Okóm bè yóm ksuten, tau du se gembek hembala du? Tau du se gembek mdà bè soluhen bè yóm kdaw kegdeken? Laen duen. Abay se yóm nangat ye yó, hol mkél bè yóm tey ofi gbeken hnò bala tók, duhen ke mkél bè yóm sabun alì lóbô gbeken hbukay nes. 3Yó nmoen, nan e myón kmukum. Yó kmò kkukumen, hol lómón ke yóm tau hnò blówón bukay, gotu kóhen ke wen bolen. Hol lómón yó se angat nmoen bè yó kem sfu Libay, nmoen lu tau laen dù belenen. Yó kmoen du, lómón ke lu yóm tahu blówón ne blówón bukay hnoen anì kóhen ke wen bolen, ngangen efet tódô hono tahu duhen. Ke lómón yó, gbek le bud demsù du ebè Dwata yóm dsù henmóyóen. 4Duhe kóm, bud blay yó kem tau bè Juda ne tau bè Jirusalim ebè Dwata yóm dsù gónón hligal, lómón yóm tehe gel nmò le bè yóm kdaw gnan. 5Yó udél yóm Dwata laen dù là gbeken du, monen, “Angate sut elem blóng ye naw e knukum yu. Ne henmung tenksiu yó kem tau demwata ne yó kem tau mdà yehen ne yó kem tau tmifù kéng ne yó kem tau là tedeng ksukéy le yó kem tau mò nmò bélê le, ne yó kem tau hen-gnok le yó kem libun bolu ne yó kem ngà hikit ne yó kem tólóng tau menwu lem blóng ye. Tenksiu yó kem tau mò du yóm yó abay se hono tau laen dù klikò le dou,” udél yóm Dwata laen dù là gbeken du.
Kubug Dwata yó kem tau Israél anì hol le hegsel
6“Ou se yóm sana Dwata hol gónó mogot ne là kóen monol nawahu. Yó se gónó ye là deng sulék meglà yu kem sfu Jakub lemwót bè yóm là konol nawahu. 7Tódô lenwóten bè yóm tehe kul kdaw yó kem tehe fù ye ekni yóm kkogol ye du yó kem dou hlau ne là kô lolò ye du. Semfulék ye ebéléu dé ne bude semfulék ebélê ye se dou,” udél yóm Dwata laen dù là gbeken du.
Okóm mom yó snólók ye, “Tedu kmò bud kesfulék me ebéléem du igò me sem là hlayuk béléem?”
8Bnalà Dwata, monen, “Hyu kô ke wen gel hennagaw le bè Dwata yó kem tau? Là kóen hyu. Bede ewenem sana gel knagaw ye béléu.”
Okóm yó bud mon ye, “Tedu de kmò knagaw me béléem du?”
Bud bnalà Dwata, monen, “Là kóen sikof yóm gel bad ye dou ne yó kem dumu gel blay ye do. 9Deng ye gotu megtafak ne yóm kdê ye, yakà deng ye mnagaw béléu. 10Hensulék nwit ye ebè dou Gónô dé yóm gesfoloen gel bad ye dou anì tendo wen ken lem yóm dou Gónô. Hol na ye tilów ou dé,” mon yóm Dwata laen dù là gbeken du, “ngem kà tódô hennasu du yó kem tembó beng bè longit ne tódô ludusu ebélê ye yó kem tóbóng, botong laen kô dù bud gónó ye hemsù du. 11Ke yó nmò ye, angat tey kbungu yó kem hulu ye abay se hensengu yó kem kuled hemsidek du. Ne yó kem grép hulu ye, là kóen skas tendo kbungu le,” udél yóm Dwata laen dù là gbeken du. 12“Ne yó angat taba le kuy yóm kdéen tau bè klamangen benwu, kem tau tnóbóng Dwata yakà teyen knóón yóm benwu gónó ye nô,” udél yóm Dwata laen dù là gbeken du.
13Bud mon Dwata, “Tey dê udél ye sidek etahu.”
Okóm mom bud mon ye he, “Tedu de alì udél me sidek ebéléem du?”
14“Yó sidek gel mon ye, ‘Laen dù muhen yóm lemolò ke Dwata. Tedu de bang guta tekuy du yóm gel kimón tekuy yó kem kun hlau tekuy? Tedu de bang guta tekuy du se yóm kehegfan tekuy du béléen yóm ksidek kegnóm tekuy du bè yóm kegsalà tekuy? 15Bè kton tekuy du, hligal le kul yó kem tau heklabak. Tilob klowil le yó kem tau gel mò sidek ne baluen ke là nimón le ke Dwata, là kô gel tnafak Dwata kul.’ Ni se yóm udél ye sidek ebéléu,” mon Dwata.
Kfasad Dwata du bè yó kem tauhen yóm kkoduhen kul
16Ominen yó, lemwót yó kem tau wen klikò le ke Dwata gotu le stulón, sentulón le yóm tey tóbóng Dwata kul. Ne yó nmò Dwata, hnungolen yóm sentulón le yó. Duhen yó, bè yó bè soluhen wen gónó le smulat du yóm boluy yó kem tau wen klikò le du, yó kem tau tendo nulón nawa le yóm kun boluy. 17Yó udél yóm Dwata laen dù là gbeken du, monen, “Lu se yó kem dou tau. Ke hto yóm butengu tmafak tau, lómón ke lu yó kem kimu legen alì mebtes htólóngu mò dou nfun. Là kô tnafaku kul mom knoduhu lu, lómón kkodu yóm mà yóm ngaen logi tendo gel mimón du. 18Omin ye yó he mton du yóm gónón stólóng kbalau yóm tau tedeng ne yóm tau gel mò sidek ne gónón stólóng kbalau yóm tau mimón ke Dwata ne yóm tau là mimónen.”
Sélection en cours:
Malakay 3: tbl
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2007, Wycliffe Bible Translators, Inc. All rights reserved.