Эвел 42
42
Юсуфдин гъардшар Египетдиз ризкь гъадабгъуз гъягъюб
1Якьубдиз Египетдиъ рузи айиб аьгъю гъабхьиган, дугъу чан баяриз кӀуру:
– Сар-сариз гьаз лигурачва?
2Хъа давам апӀуру:
– Узуз Египетдиъ рузи а кӀури деебхьназуз. Гъарахай, ухьу дарчӀиди гъузбан бадали, ухьуз рузи гъадабгъай.
3Юсуфдин йицӀур гъардаш Египетдиз ризкь гъадабгъуз гъягъюру, 4амма Вениамин, Юсуфдин багъри чве, Якьубди дурарихъди деетундайи, гьаз гъапиш дугъу гъапнийи:
– Нагагь фукӀа дугъаз гъабшиш…
5Гьамци имбударихъди Израилин (Якьубдин) баярра ризкь гъадабгъуз гъафнийи, гьаз гъапиш Ханаан жилариинра гаш алийи.
6Гьюкуматдин аьхювал апӀурайир Юсуф вуйи. Гьадму вуйи гьюкуматдиъ вари халкьдиз рузи масу туврайирра. Юсуфдин гъардшар гъафиган, дурари дугъаз жилиинакьан икрам гъапӀу. 7Юсуфдиз гъардшар, гъяркъюбси, аьгъю гъаши, аммаки, чаз дурар аьгъдру мисал дапӀну, думу дурарихъди ижмиди улхуз хъюгъю.
– Наънан гъафидар вучва? – гьерхру дугъу.
– Ханаан жиларилан, – жаваб туву дурари, – ипӀруб гъадабгъуз.
8Юсуфдиз дурар аьгъю гъахьнийи, хъа гъардшариз думу аьгъю гъахьундайи. 9Дугъаз дурарикан вуйи чан нивкӀар кӀваин гъаши ва гъапи:
– Учву шпионар вучва! Учву ич гьюкуматдин зяиф йишвар агуз дуфнайидар вучва.
10– Уву фу кӀурава, агъа, – жаваб туву дурари, – яв лукӀар ипӀруб гъадабгъуз дуфнайидар ву. 11Учу вари сар адашдин баяр вуча. Яв лукӀар марцци касар ву, шпионар дар.
12Дугъу дурариз:
– Ваъ, учву ич гьюкуматдин зяиф йишвар агуз дуфнайидар вучва, – гъапи.
13Амма дурари гьамциб жаваб туву:
– Яв лукӀар, Ханаан жилариин яшамиш шулайи сар адашдин баяр – йицӀикьюр гъардаш вуча. БицӀинур адашдихъди хъми, хъа сарнур – сарун амдар.
14Юсуфди дурариз гъапи:
– Узу гъапнийзаки, учву шпионар вучва! 15Магьа гьамус узу учву ахтармиш апӀидизачву: фяряуьндин уьмриинди ху апӀураза, мина ичв бицӀину гъардаш дарфиди учву мушвʼан гъягърудар дарчва. 16Учвкан сар, чве хуз гъарахри, хъа имбудар дустагъдиъ деъди. Гьамци узу учву дюз кӀураш-кӀурадарш ахтармиш апӀидиза. Эгер дюз дарш, фяряуьндин уьмриинди ху апӀураза, учву якьин шпионар вучва! – гъапи.
17Хъасин дурар Юсуфди шубуд йигъазди дустагъдиъ иту.
18Шубудпи йигъан Юсуфди дурариз гъапи:
– Учву чӀивиди гъузуз, узу кӀурубси апӀинай. Узу Заанурихьан гучӀ хьади лицурайир вуза. 19Эгер учву дюз ксар вуш, гъит учвкан сар гьаму дустагъдиъ гъузри, хъа имбудар ичв гаш хизанариз рузи хьади гъарахри. 20Лигай гьа, ичв гафар гьякь хьузди ва учву чӀивиди гъузузди, ичв бицӀи гъардаш учву узухьна хъади дуфну ккунду.
Дурари гьаци гъапӀу.
21Чвйири чиб-чпиз гъапи:
– Рябкъру гьялнаан, Заанури ихь гъардшин жазайикк ккаънахьу. Дугъу ухькан аман-миннат апӀурайи вахтна дугъахъ хъпехъундайхьа ва магьа гьамус бедбахтвал ихь кӀулʼина гъафийихь.
22Рувимди гъапи:
– Узу учвуз гъапундайин: бализ къаршу гуннагь мапӀанай кӀури, хъа учву хъпехъундайчва! Гьамус дугъан ифдихъанди жаваб тувуб алабхъна.
23Чпин гафарин Юсуф гъавриъ ахърайиваликан дурарин гьич фикриъкьан адайи, гьаз гъапиш думу дурарихъди таржумачийин кюмекниинди улхурайи. 24Юсуф дурарихьан гьудучӀвну ишуз хъюгъю, ва хъана, дуфну, дугъу улхуб давам гъапӀу. Дугъу, дураригъян Симеон гъядягъну, дурарин улихь думу гъийитӀу.
Юсуфдин гъардшар Ханаандиз адашдихьна гъюб
25Юсуфди дурарин шишлар ризкьнахьди ацӀуз, гьардихь хьайи арсар кьяляхъ, чпин билхаризди къяляхъ ивуз ва дурариз рякъюзра кади гьюрбйириъ ипӀруб ивуз буйругъ туву. Гьаци гъапӀнира вуйи. 26Гъардшари рузи дажйириин иливу ва рякъюъ учӀву.
27Чвйир йишв адапӀуз дийигъган, сари даждиз ккабхьруб адабцӀуз шишал хъадабшву ва билхиъ дугъаз чан арс гъябкъю: фу лигурва – чан арс ими.
28– Йиз арс кьяляхъ гъафи! – гъапи дугъу чвйириз. – Лигуруш, магьа думу йиз шишлиъ ади гъабхьну.
Дурарин юкӀв дийибгъу. Дурар, гучӀ кабхъну, чиб-чпихьинди гъилигу ва гъапи:
– Ухькан Заанури гьапӀра?
29Ханаан жилиина чпин адаш Якьубдихьна гъафиган, дурари гъабхьиб вари хъайи-хъайибси ктибтуру. Чвйири:
30– Гьадму жилариин гьюкум гъабхурайи адми учухъди писди улхуз хъюгънийи, – кӀуру, – ва учу шпионар вуди гьисаб гъапӀнийи. 31Амма учу дугъаз: «Учу шпионар дарча, марцци адмийир вуча. 32Учу йицӀикьюр гъардаш вуйча, сар адашдин баяр. Сарнур сарун имдар, хъа гьамусяаьт бицӀинур адашдихъди Ханаандиъ айич», – гъапнийча.
33Гьадму жилариин гьюкум гъабхурайи адмийи: «Магьа узуз учву дюз касар вуйиб фици аьгъю шулуш: сар гъардаш узухъди гьамушваъ гъитай, ичв гаш хизанариз ипӀруб гъабадгъну, ичв рякъ дибисну, гъарахай. 34Аммаки ичв бицину гъардаш узухьна хъади гъачай – гьаци узуз учву шпионар даруб, хъа дюз адмийир вуйиб аьгъю хьибдизуз. Гьадмуган узу учвухьна ичв гъардаш тувдизачвухьна ва архаинди му жилариин лицуз гъитдизачвухьди», – гъапунчуз.
35Шишлариан мутмйир адагъруган, гъардшариз гьардиз чан арс айи турба гъибихънийи. Чпин адашдикси, арс гъябкъю дурарикра гучӀ кабхънийи.
36Якьубди дурариз гъапи:
– Учву узу веледарихьан гъапӀунчва. Сарун Юсуф имдар, Симеонра имдар, хъа гьамус Вениамин гъадагъуз ккундачвуз. Вари узуз къаршуди гъедебгну!
37Рувимди адашдиз гъапи:
– Эгер узу увухьна Вениамин кьяляхъ дархиш, йиз кьюрид баярра йивну йикӀ. Думу йиз ихтиярназ тув, Вениамин узу кьяляхъ хидиза.
38Аммаки Якьубди гъапи:
– Йиз бай увухъди дина гъягъидар! Дугъан гъахи чве дукӀна. Чан дадайин веледарикан гъузнайир сар гьадму вуйиз! Эгер рякъюъ дугъаз фукӀа гъабшиш, гьадму дердерихьди йиз лизи кӀул накьвдиз гъябгъюз гъитдичва.
Sélection en cours:
Эвел 42: ТабГК
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© Институт перевода Библии, 2010, 2013, 2016, 2018, 2023
