Эстер 5
5
Эстер паччагьдихьна илтӀикӀуру
1Шубуд кӀуру йигъан Эстер, чан багьа палтарра алахьну, паччагьдин дараматдин айтӀан гьяятдиъ, паччагь яшамиш шулайи хуларин улихь, дийигъуру. Хъа паччагь чан тахтниин, учӀвру йишваз машна-машди деънайи.
2Паччагьдиз гьяятдиъ Эстер дийигъну гъяркъган, дугъан дугъак юкӀв кабсру. Паччагьди дугъан терефназди чан хилиъ айи гъизилин маргъ гьачӀабккуру. Багахьна дуфну, Эстери гъизилин маргълин кӀукӀшик кучру.
3Паччагьди дугъхьан гьерхру: «Фу дерди вуяв, Эстер? Фициб тӀалаб аяв? Паччагьлугъдин гьацӀ пай тӀалаб гъапӀишра, вари явуб ву». 4Эстери кӀуру: «Эгер паччагьдиз ккун гъабхьиш, гъит дугъу чахъди Аманра гъадагъри ва гъи узу паччагьдин сагълугъназ тешкил апӀурайи демраз гъюри». 5Паччагьди кӀуру: «Кьан дарапӀди Амандиз дих апӀинай, ва гъит Эстериз ккуниганси ибшри!» Паччагь ва Аман Эстери тешкил гъапӀу демраз гъюру.
6Дурари чяхир убхъуру, ва паччагьди Эстерихьан гьерхру: «Фу тӀалаб апӀурава? Увуз фу ккундушра тувдиза. ТӀалаб фициб вуяв? ГьацӀ паччагьлугъ тӀалаб апӀин – яв хаиш тамам апӀидиза». 7Эстери жаваб тувру: «ТӀалаб вуйиз ва миннат апӀураза, 8эгер узу паччагьдин рягьимлуваликк ккаш, эгер паччагьдиз йиз хаиш тамам апӀуз ният аш, гъит думу Аманра хъади закурра узу дурариз тешкил апӀурайи демраз гъири, гьадмуган узу паччагьдиз жаваб тувдиза».
Амандин Мярдягьяйихьна вуйи ажугъ
9Думу йигъан Аман разиди ва шадди гъушнийи. Амма паччагьдин дараматдин раккнарихъ деънайи Мярдягьяй гъяркъиган ва чан улихь думу гъудудужвган, Амандиз Мярдягьяйикан яман хъял гъафнийи, 10амма дугъу сабур гъюбхнийи ва хулаз гъушнийи.
Чан дустариз ва хпир Зерешдиз чахьна дих апӀуб амур дапӀну, 11Аманди дурариз чаз айи девлетнакан, адлуваликан, гизаф баяр айиваликан ва паччагьди чав жара гьякимартӀан зади дисурайиваликан фурслуди ктибтуз хъюгъю. 12«Сабсана, – гъапи Аманди, – паччагьдин хпир Эстери дем тешкил дапӀну, паччагьдихъди гьадина сар шлиз-вушра ваъ, хъа узуз теклиф гъапӀну. Закурра узуз паччагьдихъди теклиф дапӀна. 13Хъа жугьуд Мярдягьяй паччагьдин дараматдин раккнарихъ узуз рякъюрайиган, узуз му фу вухъа?»
14Дугъан хпир Зерешди ва дустари дугъаз насигьят тувру: «Гъит къанна хьуб метр али буруз дубсри, хъа гвачӀинган паччагьдикан, Мярдягьяй гьадму буруздикк ккерхуб тӀалаб апӀин ва юкӀв азадди паччагьдихъди демраз гъарах». Му гафар Амандиз кьабул гъахьнийи, ва дугъу буруз дубсуз амур апӀуру.
Sélection en cours:
Эстер 5: ТабГК
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© Институт перевода Библии, 2010, 2013, 2016, 2018, 2023