Ляхнар 21
21
Ерусалимдиз рякъюъ
1Дурарихьан жара духьну, учу гимийиъди дишди Кос, хъайигъан Родос кӀуру островариина, хъа дилин Патара шагьриз гъафнийча. 2Финикияйиз гъябгъру гими дабгну, дидиъ эъну, рякъюъ учӀвча. 3Киприн кафари терефнахъантина душну, учу Сирияйиз гъафича ва Тир шагьриъ дергча, фицики душваъ гимийиан гъагъар адагъну ккундийи. 4Душваъ учуз ученикар гъидихъчуз ва дурарихъди саб гьяфта адапӀча. Гирами Рюгьнан амриинди дурари Павелиз, Ерусалимдиз мягъян, кӀури гъахьну. 5Ич душваъ шлу вахт ккудубкӀиган, учу дилин удучӀвну, ич рякъ давам гъапӀча. Ученикари, чпин хпарна веледар хъади, учу шагьриантина рякъюъ тӀаънийи, хъа гьюлин гъирагъдихъна гъафиган, учу кьамкьариина ис духьну, ккарагнийча.
6Дурарикан гьарурихъди, баркаллагь дупну, учу гимийиз за гъашича, хъа дурар чпин хулариз хътаку.
7Учу, рякъ давам апӀури, Тириан Птолемаида шагьриз гъафича ва душваъ гъардшар тебрик дапӀну гъафи йигъ гьадрарихъди адапӀча. 8Хъайигъан рякъюъ учӀвну, учу Къайсарияйиз гъафича ва Ерусалимди кадагънайи ургур гъардшикан сар вуйи Ужувлан хабар рабгъру Филипдин хулаъ дергча. 9Дугъаз швуваз душну адру, пайгъамбарвалин гафар кайи юкьур риш айи. 10Учу душваъ сакьюдар йигъар адаъхъан, дина Ягьудияйиан Агав кӀуру пайгъамбар гъафнийи. 11Учухьна дуфну, дугъу, Павелин чӀул гъадабгъну, дидихъди чан ликарна хилар йитӀну, гъапнийи:
– Гирами Рюгьну гьамци дупна: «Ерусалимдин жугьдари му чӀулин эйси магьа гьамци йитӀиди ва аллагьсузарин хилиз тувди».
12Му гафар гъеерхьиган, учу ва душваъ айи адмийир вари Павелиз, Ерусалимдиз мягъян кӀури, ккарагуз хъюгъча. 13Гьадмуган Павели жаваб тувру:
– Учву гьапӀрачва? Гьаз, ишури, йиз юкӀв дар апӀурачва? Узу, йитӀуб гъубзри, хъа гьацира Агъа Исайин ччвурнахъ Ерусалимдиъ йикӀузра гьязур вуза.
14Думу, учу кӀурайибдихъинди илтӀикӀуз дархьиган, «Гъит Агъайин амур ибшри», – пну, гъитча.
Павел Ерусалимдиз гъюб
15Гьадму йигъарихъан гьязур духьну Ерусалимдиз гъушча. 16Къайсарияйиан сакьюдар ученикарра учухъди гъафнийи. Дурари учу ухдихъанмина ученик вуйи кипржви Мнасондихьна хъади гъафнийи. Учу гьадгъахь дергча. 17Ерусалимдиз гъафиган, гъардшари учу хушниинди кьабул гъапӀнийи. 18Хъайигъан Павел учухъди Якьубдин хулаз гъафнийи. Душваъ вари хъугънайидарин аьхюдар уч духьнайи. 19Павели, дурариз салам тувну, жугьуд дарударин арайиъ Аллагьди чан хилариинди гъапӀу вари ляхнарикан хъайи-хъайиси ктибтуру. 20Мидкан гъеебхьиган, дурари Аллагьдин ад апӀуру ва Павелиз кӀуру:
– Гъардаш, увуз хъугъувалиина дуфнайи швнуд-сад агъзур жугьуд гъяркъюнвуз, амма дурар вари Къанун уьбхбан ижми терефкрарди ими. 21Уву жугьуд дарударин арайиъ айи вари жугьдариз, дурари ихь аьдатар дюрюхри, веледарин суннат дарапӀри, Мусайин къанунар кӀули дурухри пну, аьгъювалар тувра, кӀури, дурариз увкан деебхьна. 22Гьаци вуйиган ухьу гьапӀхьа. Дурариз, икибаштӀан, уву гъюбкан ебхьиди. 23Гьаддиз учу кӀуруб апӀин: ич арайиъ Аллагьдиз ху дапӀнайи юкьур кас а. 24Дурарихъди душну, марцц хьпан аьдат тамам апӀин. Дурарихьан чпин кӀулар ултӀукъуз шлуганси, дурари гъапӀу харжарин пул уву тув. Гьадмуган варидариз увкан кӀурайиб гьякь дарувал ва увура къанундиз мютӀюгъ шулайивал аьгъю хьибди.
25Хъугъувалиина гъафи жугьуд дарударикан гъулхиш, дурариз учу, идолариз гъурбан гъапӀу йикк, бугъмишди гъабкӀибдин йикк дирипӀри, ифи дурубхъри ва кьяппавал дарапӀри пну, кагъаз хътапӀунча.
26Гьамци хъайигъан Павели, гьаму касар чахъди хъади душну, марцц хьпан аьдат тамам апӀуру. Хъасин, марцц хьпан йигъар фила ккудуркӀуруш ва дурарикан гьарурихъанди гъурбнар фила апӀуруш, аьгъю апӀбан бадали, Аллагьдин хулаз гъюру.
Павел дисуб
27Аьдатниинди дерккнайи ургуд йигъ улдубчӀвиган, Асияйиан вуйи жугьдариз думу Аллагьдин хулаъ ади рякъюру. Дурари халкьдик гъалабулугъ кипру ва, гьамци чӀигъар апӀури, думу дисуру:
28– Израилин агьалйир! Кюмекназ гъачай! Му жви инсанар къанундиз, ихь халкьдиз ва ихь Аллагьдин хулаз къаршу вуди дих апӀурайи кас ву. Мидихьна мугъу, Аллагьдин хулаз грекарра хъади дуфну, ихь гирами йишв чиркин гъапӀну.
29Дурариз, улихь йигъари шагьриъ дугъахъ Эфесдиан вуйи Трофим хъади гъяркъган, Павели думура Аллагьдин хулаз хъади дуфнайиси гьибгънайи.
30Шагьриъ гъалабулугъ абхъру, варишварихъанди адмийир, жаргъури дуфну, уч хьуз хъюгъру. Дурари Павел, дидисну, гужназ Аллагьдин хулʼан адагъуру ва дишла раккнар хъяркьру. 31Дурариз Павел йикӀуз ккун гъабхьиган, кьушмарин аьхюрихьна, вари Ерусалимдик гъал кабхъна пну, хабар гъябгъюру. 32Дугъу, эскрарна юзбашйир гъадагъну, гьадина гьяракат апӀуру. Аьхюрна эскрар гъяркъиган, дурари Павел урччвувал дебккру. 33Гьадмуган аьхюри, дуфну, думу дидисну, кьюриз думу зунжрари йитӀуз буйругъ тувру ва гьерхру:
– Му фуж ву? Мугъу фу гъапӀну?
34Халкьдин арайиан сари саб, тмунури саб кӀури, чӀигъар апӀурайи. Дурарин гъугънагъян гъаври ахъуз даршиган, аьхюри Павел эскрарин йишваз гъахуз гъитру. 35Павел умбрарихьна гъахиган, эскрари гьадлантина думу хилариинди гъахуру, гьаз гъапиш халкьдин гъварчну думу парчйир апӀуб мумкин вуйи. 36Дурари, дугъахъ хъергну:
– Думу йивну йикӀай! – кӀури, чӀигъар апӀурайи.
37Эскрари чав гьадрарин йишваъ аърайиган, Павели кьушмарин аьхюрихьан гьерхру:
– Увхьан гьерхуз хай шулин?
Дугъу жаваб тувру:
– Увуз грек чӀал аьгъявузки! 38Дици вуш, багарихьди гъалабулугъ гъитӀибккну, ичӀи чюлиз юкьуд агъзур гъачгъар адау Египетжви уву вуна?
39Хъа Павели жаваб тувру:
– Узу Киликияйиан вуйи жугьуд вуза, аьгъю Тарс шагьрин ватандаш вуза. Увкан миннат вуйиз, узухь халкьдихъди улхуз гъит.
40Гьадмуган дугъу ихтияр тувру. Павелира, умбриина за духьну, халкьдиз хилин ишара апӀуру. Хъа вари яваш гъашиган, думу жугьуд чӀалниинди улхуз хъюгъру.
Sélection en cours:
Ляхнар 21: ТабГК
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© Институт перевода Библии, 2010, 2013, 2016, 2018, 2023
