Паччагьлугъар-4 12
12
1Израилиъ Егьуйин паччагьвалин ургудпи йисан Юаш Ягьудайиъ паччагь гъахьнийи, ва дугъу Ерусалимдиъ ягъчӀвур йисан паччагьвал гъапӀнийи. Дугъан дадайиз Цивья кӀуйи, думу тухмиинди Беэр-Шевайиан вуйи. 2Юашди РАББИЙИН улариан дюз вуйиб апӀуйи, Заанурин гъуллугъчи Югьудайи чаз насигьятар туври имидикьан гагьди. 3Амма тепйирилан гирами йишвар терг дапӀнадайи. Халкьди душвариин гъурбнар апӀувал ва иццидар ниар хъайи шейʼар ургувал давам апӀури имийи.
Юашди Заанурин Хал цӀийи алапӀуб
4Юашди Заанурин гъуллугъчйириз гъапнийи:
– РАББИЙИН Хулаз гирами пешкешди хру вари пул уч апӀинай. Гьадму гьисабнаан инсанарилан уч гъапӀу налуг ва Хулаз хушниинди гъурбан гъапӀуб. 5Гъурбан апӀрударихьан гьарсарихьан пул гъадабгъри ва РАББИЙИН Хулан чӀур гъабхьи йишв рас апӀбаз ишлетмиш апӀри.
6Амма Юаш паччагьдин паччагьвалин къанна шубудпи йисаз Заанурин гъуллугъчйири Хал гьеле цӀийи алапӀундайи. 7Юаш паччагьди Заанурин гъуллугъчи Югьудайиз ва Заанурин жара гъуллугъчйириз дих гъапӀнийи ва дурарихьан гьерхнийи:
– Гьаз Хал рас апӀурадарчва? Гъурбан апӀуз гъафидарихьан пул сарун учвухьна мибисанай, хъа Хал рас апӀуз тувай.
8Думуган Заанурин гъуллугъчйир я халкьдихьан сарун пул дибрисуз, я Хал цӀийи алапӀбан жаваб тутрувуз рази гъахьнийи.
9Заанурин гъуллугъчи Югьудайи ишикӀ гъадабгънийи ва дидин зиин кьуликан урхъ ктипнийи. Дугъу думу гъурбан апӀрушван багахь, РАББИЙИН Хулаъ учӀврушван арччул терефнаъ дивнийи. РАББИЙИН Хулаз хру вари пул учӀврушв уьбхюрайи Заанурин гъуллугъчйири ишкӀиъ ипуйи. 10ИшкӀиъ пул гизаф хьувал дурариз гъябкъю гьар ражну паччагьдин бикӀрур ва Заанурин сарпи гъуллугъчи гъюйи. РАББИЙИН Хулаз гъабхи пул дурари гьисаб апӀуйи ва шишлариъ ивуйи. 11Пул гьисаб апӀбахъан Хулан рас апӀбан ляхнариз лигрударихьна тувуйи. Дурари РАББИЙИН Хулаъ гъилиху харатчйириз ва тикилишчйириз, 12цалар апӀрудариз, гъванар ктаърудариз гьякъи тувуйи. Гьацира дурари РАББИЙИН Хал цӀийи алапӀуз гакӀул ва ктау гъванар масу гъадагъуйи ва Хал цӀийи алапӀбаз гъахьи харжарин кьимат тувуйи.
13Амма Хулаз хру пулихъ я арснан гъабар, я лампйирин пилтйир гьадатӀру убрушвар, я захар, я зурнйирстар алатар, я РАББИЙИН Хулаз вуйи гъизилин ва арснан жара шейʼар гьязур апӀурдайи. 14Арс ва гъизил Хал цӀийи алапӀбиин лихурайидариз тувуйи. 15Лихурайидариз гьякъи тувуз думу пул тувнайидарихьан гьякь-гьисаб тӀалаб апӀурдайи, гьаз гъапиш дурари намуслуди ляхин апӀуйи. 16Тахсиркарвал ва гуннагь апӀбаз лигну гъурбан апӀбан пул ишкӀиъ ипурдайи, РАББИЙИН Хал рас апӀбаз харж апӀурдайи – думу пул Заанурин гъуллугъчйириз тувуйи.
Юашди Ерусалим Хазаилихьан къутармиш апӀуб
17Гьадму вахтна Арамдин паччагь Хазаил Гъат шагьриин алархьнийи ва думу гъибиснийи. Хъасин дугъу Ерусалимдиин алжагъуз кьаст гъапӀнийи. 18Амма Ягьудайин паччагь Юашди чан абйир Югьушафатди, Ярамди ва Ахазияйи РАББИЙИН Хулаз бахш гъапӀу, чав бахш гъапӀу гирами пешкешар, РАББИЙИН Хулаъ ва паччагьдин гъалайиъ гъибихъу вари гъизил уч гъапӀнийи. Думу Арамдин паччагь Хазаилиз хътапӀнийи. Дидин кьяляхъ Хазаил Ерусалимдихьан гьудучӀвнийи.
Юаш йивну йикӀуб
19Юашди паччагьвал гъапӀу вахтнан жара гьядисйирикан ва дугъу гъапӀу ляхнарикан «Ягьудайин паччгьарин тарихарин китабдиъ» дибикӀна. 20Дугъан багахь гъуллугъ апӀурайидари дугъаз къаршу жини йикьрар гъапӀнийи. Дурари Бет-Миллойиъ Силлайихьна гъябгъру рякъюъ думу йивну гъакӀнийи. 21Шиматдин бай Юзавад ва Шумерин бай Югьузавад – магьа Юаш паччагь йивну гъакӀи гъуллугъчйир. Думу чан архйирихъди Давуддин Шагьриъ накьвдик кивнийи. Дугъан бай Амасия дугъан кьяляхъ паччагь гъахьнийи.
Sélection en cours:
Паччагьлугъар-4 12: ТабГК
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© Институт перевода Библии, 2010, 2013, 2016, 2018, 2023