Паччагьлугъар-1 2
2
Аннайин ккарагуб
1Хъа Анна ккарагуз хъюгъю:
– РАББИЙИ кӀваз шадвал тувниз,
йиз кӀул за гъапӀну РАББИЙИ.
Душмнарин улихь мелз жикъи дариз,
шад вуза Уву узу уьрхбиин.
2Адар гирамир, РАББИСИ.
Я УвутӀан жарар адар!
Ич Заанур мюгькам ву гъарзси,
я адар Дугъаз барабар!
3Дебккай ичв фурс кайи лягълягъ,
мапӀанай гафар такабур!
Ич РАББИЙИЗ вари аьгъя,
думу ву ихь ляхнар ерцрур!
4ГукӀни гъабхьну игитарин
хилариъ ай дерккучӀимир,
алдакдар кьувват адарди
цӀийикӀултӀан гъахьну гужли.
5Чпин фунар ацӀну айидар
уьлин кьацӀнахъ лихури а,
Хъа гашди вуйи инсанар
Сарун аьжузвалиъ имдар.
БицӀир даршлу дишагьлийи
ургур велед гъахну магьа.
Хъа гизаф бицӀидар айир
сарна-сарди чурхури а.
6РАББИЙИ, ккундуш, йикӀуру,
чӀиви апӀуру, Чаз ккундуш,
вая тму дюнʼяйиз гатӀархьуру,
ккундуш, душвʼан адагъуру.
7РАББИЙИ касиб апӀуру,
девлетра тувру, Чаз ккундуш.
Чаз ккундуш, асккан апӀуру,
заан апӀуру, Чаз ккундуш.
8Касибриз – биширугдиан,
гъилицнациз уршвлилан за
хьуз гъитур ва дитур дурар
абурлуйирихъди, гьацира
гьюрматлуйихъди саб йишвʼин.
РАББИЙИН гьюкмиъ а мурхьлар,
чибʼин Дугъу жил гъудубкьдар.
9Чаз вафалударин рякъяр
уьрхюру Дугъу, хъа писдар
мучӀушнаъ чиб хьиди фана,
адми за апӀруб чан гуж дар.
10РАББИЙИЗ аькси вуйидар
терг апӀиди; завариан
сес ипну, дурарин зиин,
апӀиди Дугъу хъухърумар.
РАББИ жилин Диванчи ву,
саб кӀакӀнахъан кӀакӀнахъна тму.
Чан ччим ктатур#2:10 Ччим ктатур: паччагь. Кюгьне вахтарианмина жугьдарин зейтундин ччим ктатувалиинди инсанар асас гъуллугъназ адаъру аьдат ади гъабхьну., паччагь Дугъу
апӀуру кьувватлу, адлу!
11Элкана чпин хулаз, Рамайиз, кьяляхъ хътаку, хъа бай Заанурин гъуллугъчи Илийихь РАББИЙИЗ гъуллугъ апӀуз гъузу.
Илийин баяр
12Илийин баяр мердимазарар вуйи – дурариз РАББИ аьгъдайи. 13Дурари, Заанурин гъуллугъчйир вушра, халкьдихъди чиб гьамци гъахуйи: шли-вуш гъурбан гъапӀиган, хлиъ шубуб кӀакӀ али шиш ади, Заанурин гъуллугъчийин гъараваш гъюйи, ва, йикк гьязур шули имиди, 14шиш йигьгиъ, баттлиъ, чӀакьаъ вая гъазниъ убччвуйи. Шишрахъди ккадабгъуз шлуб вари Заанурин гъуллугъчийи чахьди гъабхуйи. Чпихьна Шилойиз гъафи вари израиларихъди дурари гьациб ляхин апӀуйи. 15Хюл убгайизра#2:15 Хюл убгайизра: гъурбан апӀруган, РАББИЙИН гьюрматназ сифте хюл убгури, хъасин йикк убхьури гъахьну., гъурбан апӀру касдихьна гъуллугъчийин гъараваш гъюйи ва дугъаз кӀуйи: «Заанурин гъуллугъчийиз убжуз йикк ча. Гъубхьуб дугъу кьабул апӀидар, анжагъ дурубхьубтӀан!»
16Хъа думу касди, «сифте хюл убгри, гьадмуган увуз ккуниб вари гъадабгъидива!» кӀури, наразивал улупури гъахьиш, гъуллугъчийин гъаравашди жаваб тувуйи: «Гьамусяаьт ча, дархьиш узу тадабгъидиза!»
17Заанурин жигьил гъуллугъчйирин гунагь РАББИЙИН улихь гизаф зурбаб вуйи: дурар РАББИЙИЗ гъурбан апӀбарихьна дерин гьюрмат адарди янашмиш шули гъахьну!
18Шамуили РАББИЙИН Хулаъ гъуллугъ апӀурайи, ва дугъахь гинбин ирин улгьани#2:18 Улгьани: Заанурин гъуллугъчйири алабхьрударикан саб. Заанурин аьхюну гъуллугъчийин улгьанийиъ кьюб гирами гъван ади гъахьну. РАББИЙИН амур аьгъю апӀбан бадали думу гъванарихъди тупут ипри гъахьну. гьабхънайи. 19Гьарсад йисан дадайи дугъаз бицӀи чуха бирхуйи ва, жилирихъди гьарисандин гъурбан апӀуз гъюруган, думу хуйи. 20Илийи гьар ражну Элканайиз ва дугъан хпириз ужувлар ккун апӀуйи:
– РАББИЙИЗ бахш гъапӀурин ерина гъит РАББИЙИ увуз гьаму дишагьлийикан насил туври!
Ва дурар хулаз хътаркуйи. 21РАББИЙИ Анна кӀваин гъапӀнийи, дугъак саб-швнубан бицӀир киршнийи, ва дугъу шубурсана бай ва кьюр риш гъахнийи, хъа Шамуил РАББИЙИН Хулаъ гъуллугъ апӀури аьхю шулайи.
22Хъа Илий бегьем кьаби гъахьнийи. Дугъаз израиларихъди чан баяри чпи гьякьсузди гъахруваликан ва дурар Гюрюшнан Чадрикк#2:22 Гюрюшнан Чадур: Заанурин амриинди Муса пайгъамбри тикмиш гъапӀу ибадат апӀрушв. Сулейман паччагьди РАББИЙИН Хал тикмиш апӀайиз, думу чадурин улихь Заануриз гъурбнар апӀуйи. Анжагъ Заанурин гъуллугъчйиризтӀан думу чадрин айитӀ учӀвуз ихтияр адайи. ккучӀврушвахь гъуллугъ апӀурайи дишагьлийирихъди дахъруваликан ктибтури шуйи. 23Дугъу чан баяриз кӀуйи:
– Гьаз мициб апӀурчва? Варидикан узуз ебхьруб ичв гьяясуз ляхнарин гьякьнаан ву! 24ЧӀяаьн ву, йиз баяр! РАББИЙИН халкьдин арайиъ учвкан чӀуру хабрар лицура. 25Сар касди тмунуриз къаршуди гунагь гъапӀиш, Заанурихьан дугъхъан хъюгъюз шулу. Хъа эгер РАББИЙИЗ къаршуди гунагь гъапӀиш, дугъхъан фуж хъюгъди?
Амма дурар адашдин гафарихъ хъпехъундайи, гьаз гъапиш РАББИЙИ дурар талаф апӀуз къарар адабгънади гъабхьнийи.
26Хъа Шамуил саб кьадар аьхю духьнайи, ва думу гьам РАББИЙИЗ, гьамсана инсанариз артухъ-артухъди хуш шулайи.
Илийин хизандиз къаршуди улукьру гафар
27Илийихьна пайгъамбар гъафну, ва дугъу гъапну:
– РАББИЙИ гьамци кӀура: «Яв тухмин архйириз, дурар Египетдиъ фяряуьндин хулан лукӀар вуйиган, Узу Узу улупнийза. 28Йиз Заанурин гъуллугъчйир хьпан, йиз гъурбан апӀрушвʼина улдучӀвбан, цӀа кипбиинди ицци ниар адаъбан ва Узуз гъуллугъ апӀруган, улгьани гьабхъбан бадали, Израилин вари тухмарикан Узу дурар ктагънийза! Израилари гъахи вари садакьйирин эйвал апӀуз яв архйир дерккнийза. 29Узу Узуз хуз амур гъапӀу гъурбнар ва садакьйир учву гьаз рихшанд апӀурачва? Гьаз уву яв баяр УзутӀан заанди дерккунва? Израилин Йиз халкьди Узуз хру гъурбнарин ужударсдар парчйир итӀури, учву чагъ шулачва!»
30Гьамци кӀура Израилин Заанури, РАББИЙИ: «Узу гаф тувнийза, яв хизан ва яв тухум Йиз машнан улихь гьарган яшамиш хьиди, кӀури. Хъа гьамусдихъантина дици хьибдар!» – кӀура РАББИЙИ. «Узу Йиз гьюрмат уьбхрудар заан апӀидиза, хъа Узу гьясппикк ккадрудар асккан апӀидиза. 31Узу яв арчул хил – яв хизандин кьувват – хъадабтӀру йигъ багагь дубхьна: яв бицӀидарикан гьич саркьан кьаби хьайиз гъузидар! 32Уву Израилин бахтлу ва арбаб уьмриз бахилвалиинди лигидива, гьаз гъапиш яв хизандиан сарун сарра кьаби хьайиз гъузидар. 33Узу яв наслар Йиз гъурбан апӀрушвхьан ярхла апӀидарза – дурар душвахь, пашманвалиан яв улар кур ва рюгь иццури хьпан бадали, гъитдиза. Вари яв наслар уьмрин кьувватнан чагълариъ ади йикӀиди.
34Магьа увуз дугъри лишан: яв баяр Хофни ва Пинехас кьюридра сад йигъан йикӀиди. 35Хъа Узу Узуз вафалу, Йиз амриинди ляхнар апӀру гъуллугъчи агидиза. Узу дугъан тухум дурумлуди дийибгъруб апӀидиза. Дугъан наслари гьарган Узу ччим ктату паччагьдиз гъуллугъ апӀиди. 36Яв тухумдиан чӀивиди гъуздарикан гьарсар дурарихьна, сацӀибкьана пул ва уьлин кьацӀ ккун апӀури, икрамниинди гъиди, ва дугъу пиди: „Узхьан узуз уьлин кьацӀ гъазанмиш апӀуз хьпан бадали, узу Заанурин гъуллугъчивалин фунуб вушра гъуллугъниин деркк“».
Sélection en cours:
Паччагьлугъар-1 2: ТабГК
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© Институт перевода Библии, 2010, 2013, 2016, 2018, 2023