Íꞌdóngárá 3
3
Ũnjĩkãnyã ágó rĩ pi ní ꞌoó ũkú ni be rĩ
1Ãꞌá Úpí Múngú ní gbií rĩ pi ãsámvú gé, ị̃nị̃ ri ãꞌá riípi mị ũꞌbãápi agaápi rá ni. Ụ́ꞌdụ́ ãlu, ĩri ní ũkú rĩ zịzú kĩnĩ, “Ẹ̃ndẹ́pị Múngú ꞌyo nyo kínĩ ĩmi nyakí pẹtị ũꞌa ọ́mvụ́ agá ꞌdĩꞌbée ku ꞌdíni rá?”
2Ũkú rĩ ní újázú ị̃nị̃ rĩ ní kĩnĩ, “Múngú kĩnĩ, ꞌbâ ícó pẹtị ọ́mvụ́ agá ꞌdĩꞌbée vé ũꞌa nya rá, 3ꞌbo Múngú kĩnĩ, ‘Pẹtị ọ́mvụ́ ágáŋá gá ꞌdãri vé ũꞌa, lẽ ĩmi nyakí ku, dõku ĩmi úlókí ku, ĩmi nyakí dõ gí, ĩmi ícó ũdrã rá.’ ”
4Ị̃nị̃ rĩ ní újázú ũkú rĩ ní kĩnĩ, “Ĩmi ícókí ũdrãá ku. 5Múngú nị̃ rá ꞌyozú kínĩ, ĩmi nyakí dõ pẹtị rĩ vé ũꞌa gí, ĩmî mị ri ꞌi zị̃ tã nị̃zú ámázú rá, ĩmi adri sụ̃ Múngú tị́nị, ĩmi tã múké pi nị̃ tã ũnjí be rá.”
6Ũkú rĩ kã ndreé pẹtị rĩ vé ũꞌa índré ꞌí mị gé ꞌdãá múké, ĩ ícó nya rá, ãzini ĩ tã múké pi nị̃ ãní tã ũnjí be rá, ĩri ní pẹtị rĩ vé ũꞌa ĩtĩzú nyazú, ĩri ní ụrụkọ ni sẽzú ágó ni adriípi ꞌí gãrã gá rĩ ní, ágó ni ní ẹ́ꞌyị́zú nyazú. 7Koro kộpi ẽ mị ní ꞌi zị̃zú, kộpi nị̃kí ámá ĩ nóni pílílí rú. Kúru kộpi ní ị̃bị́bị́ ŋõzú údézú ĩ rụ́ꞌbá ọ̃zụ̃zú ãní.
8Ũndréŋá ꞌdãri sĩ, ágó rĩ pi ũkú rĩ be yịkí Úpí Múngú vé kụ́bị́, ĩri ri ẹ́cị́ ọ́mvụ́ rĩ agásĩ, kộpi ápákí Úpí Múngú sĩ mụụ́ ĩ zụ̃ụ́ pẹtị rĩ pi ãsámvú gé ꞌdãá. 9Úpí Múngú ní kộpi zịzú kĩnĩ, “Ĩmi íngõlé?”
10Ágó rĩ ní újázú kĩnĩ, “Á yị mî kụ́bị́ ọ́mvụ́ agá ꞌdãá, sẽ má ní ụ̃rị̃, ãꞌdiãtãsĩyã ma pílílí rú, má ní ma zụ̃zú ãní.”
11Múngú ní ĩri zịzú kĩnĩ, “Ãꞌdi lũ mí ní kínĩ mi pílílí rú nĩ? Mí nya pẹtị rĩ vé ũꞌa má ní ꞌyoó mî nya ku rĩ gí?”
12Ágó rĩ ní ꞌyozú kĩnĩ, “Ũkú mí ní sẽé má ní rĩ, sẽ má ní pẹtị rĩ ã ũꞌa, á nya gí.”
13Kúru Úpí Múngú ní ꞌyozú ũkú rĩ ní kĩnĩ, “Mí ꞌo ꞌdíni ãsĩ?”
Ũkú rĩ ní ꞌyozú kĩnĩ, “Ị̃nị̃ ũꞌbã mâ mị nĩ, má ní pẹtị ũꞌa rĩ nyazú ãní.”
Múngú lị tã kộpi drị̃gé
14Kúru Úpí Múngú ní ꞌyozú ị̃nị̃ rĩ ní kĩnĩ, “Tã mí ní ꞌoó ꞌdĩri sĩ,
“Ãnyãpá rĩ pi ãsámvú gé ãꞌá rĩ pi be,
á tri mi gí!
Mi ímụ́ mi use bẹ̃drị̃ sĩ,
mi ímụ́ fụ́rụ́ndị́ mvũ cĩmgbá cazú ụ́ꞌdụ́ céré mí ní adrizú rĩ gé.
15Ma sẽ ĩmivé ãsámvú ũkú rĩ be rĩ adri ũnjí,
anjiŋá mívé rĩ pi ĩrivé rĩ be, kộpi ãsámvú rĩ adri ũnjí.
Ĩrivé mvá ágó ri ímụ́ mi gbã drị̃gé,
mi ímụ́ mvá ágó rĩ ga pá gá.”
16Múngú ní ꞌyozú ũkú rĩ ní kĩnĩ,
“Sâ mí ní mvá tĩzú rĩ gé, ma sẽ mi ĩzãngã nya ambamba.
Mí kãdõ mvá tĩí, ãzó ni ri ásó ambamba.
Mi áwí ẹ́sị́ ꞌbã ku mí ágó ni drị̃gé,
ꞌbo ĩri adri ãmbúgú mí drị̃lé gá nĩ.”
17Múngú ní ꞌyozú Ãdámã ní kĩnĩ, “Mí ní mívé ũkú ẽ tị yịị́, ãzini mí ní pẹtị ũꞌa má ní ꞌyoó, ‘Mî nya ku’ rĩ nyaá rĩ sĩ,
“Á tri nyọ̃ọ́kụ́ rĩ gí, mî tã sĩ.
Sâ mí ní adrizú ídri rú rĩ gé,
mi ọ́mvụ́ ꞌã ũkpõ sĩ, ụ́rụ́ndẹ be, mí íbí ngá nya ndõ.
18Ũcékúcé ri ĩfũ dụ nyọ̃ọ́kụ́ rĩ agá,
mi ngá ĩfũꞌbá dụꞌbá nyọ̃ọ́kụ́ drị̃gé rĩ pi nya.
19Mi ọ́mvụ́ ꞌã ũkpõ sĩ, ụ́rụ́ndẹ be,
mi íbí ngá nya ndõ,
cĩmgbá mí ní fizú gõzú nyọ̃ọ́kụ́ agá rĩ gé,
ĩtĩkí nyọ̃ọ́kụ́ ĩ ní mi gbizú ãní,
mi gõ fi nyọ̃ọ́kụ́ agá ũzi.”
20Ãdámã ꞌda ꞌî ũkú ni ã rụ́ Évã#3:20 Évã: Évã vé ífífí ídri. ꞌi, ãꞌdiãtãsĩyã ĩri adri ẹ́ndrẹ́pị ꞌbá ídri rú rĩ pi vé ni céré.
21Kúru Úpí Múngú ní lãꞌbú údézú, ĩri ní Ãdámã pi ã rụ́ꞌbá ọ̃zụ̃zú ãní ũkú ni Évã be.
22Kúru Úpí Múngú ní ꞌyozú kĩnĩ, “Nóni ꞌbá ꞌdĩꞌbée ícákí sụ̃ ꞌbá tị́nị, kộpi nị̃kí tã múké pi tã ũnjí be gí. Ícókí kộpi ãꞌyĩí pẹtị ídri sẽépi rĩ nyaá ku, ãꞌdiãtãsĩyã kộpi ã adrikí rí mụzú nyonyo ku.” 23Kúru Úpí Múngú ní kộpi drozú ọ́mvụ́ Ẽdénẽ vé rĩ agásĩ, kộpi ã mụkí ọ́mvụ́ ꞌãá nyọ̃ọ́kụ́ ꞌí ní ĩtĩí kộpi gbizú rĩ agá. 24Múngú kã kộpi droó fũú ọ́mvụ́ Ẽdénẽ vé rĩ agásĩ gí, ĩri ní mãlãyíkã rĩ pi#3:24 Mãlãyíkã rĩ pi: Mãlãyíkã rĩ pi Ẽbérẽ tị sĩ, ĩ kộpi zị Kẽrũbímũ. Kộpi ꞌbụ̃ gé ꞌdãá ídri rú Úpí be trụ́. ꞌbãzú ọ́mvụ́ rĩ vé wọ̃ọ́kọ̃ ụ̃tụ́ ní ĩfũngárá gálé rú rĩ gé, ãzini ĩri ní ị́lị́ ãco sị́ be dị̃ị́pi lọ̃wụ̃ lọ̃wụ̃ ãcí rú ni ꞌbãzú, ĩri ẹ́cị́ ọ́mvụ́ rĩ agásĩ kụ́rụ̃, ã ũtẽ rí lẹ́tị mụụ́pi pẹtị ídri sẽépi rĩ gé rĩ.
Sélection en cours:
Íꞌdóngárá 3: kbo
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2017, Wycliffe Bible Translators, Inc. All rights reserved.